លោកនាយករដ្ឋមន្ត្រីហ៊ុន សែន មានប្រសាសន៍ក្នុងពិធីប្រគល់សញ្ញាបត្រ
ដល់និស្សិតសាកលវិទ្យាល័យ CUS នាព្រឹកថ្ងៃអង្គារ ទី៤ ខែកញ្ញា ឆ្នាំ២០១២នេះ
ភ្នំពេញៈ ប្រមុខរាជរដ្ឋាភិបាលកម្ពុជា លោកនាយករដ្ឋមន្ត្រីហ៊ុន សែន បានប្រកាសនៅថ្ងៃអង្គារនេះថា ក្រោយពីការវាស់វែងដីធ្លីទូទៅប្រទេស ប្រមាណជាពីរខែកន្លងមកនេះ ដោយក្រុមនិស្សិតស្ម័គ្រចិត្ត រាជរដ្ឋាភិបាលកម្ពុជា នឹងផ្តល់ជូននូវបណ្ណកម្មសិទ្ធិកាន់កាប់ដីធ្លីជាផ្លូវការដល់ប្រជាពលរដ្ឋ។ លោក ហ៊ុន សែន ក៏គ្រោងនឹងចុះចែកបណ្ណកម្មសិទ្ធជូនពលរដ្ឋដោយផ្ទាល់នៅថ្ងៃទី ២១ ខែកញ្ញា ២០១២ ខាងមុខនៅខេត្តក្រចេះផងដែរ។
មានប្រសាសន៍ក្នុងពិធីប្រគល់សញ្ញាបត្រដល់និស្សិតសាកលវិទ្យាល័យ CUS នាព្រឹកថ្ងៃអង្គារ ទី៤ ខែកញ្ញា ឆ្នាំ២០១២នេះ លោកនាយករដ្ឋមន្រ្តី ហ៊ុន សែន បានបញ្ជាក់ថា «ចាប់ពីពេលនេះតទៅ ការចុះវាស់វែងបែងចែកដីធ្លីជូនប្រជាពលរដ្ឋរួចភ្លាម នឹងត្រូវប្រគល់ប័ណ្ណកម្មសិទ្ធិស្របច្បាប់តែម្ដង ដោយមិនចាំបាច់ប្រគល់បង្កាន់ដៃកាន់កាប់បណ្ដោះអាសន្នដូចពេលមុន នោះទេ»។
លោកបានបន្តថា ការផ្តល់បណ្ណកម្មសិទ្ធិជាស្ថាពរនេះ គឺអាចកាត់បន្ថយដំណាក់ការអន្តរកាលពីការឈប់ផ្តល់បណ្ណកម្មសិទ្ធិបឋម ទៅជាបណ្ណកម្មសិទ្ធិជាស្ថាពរវិញ ដោយសារមានហេតុផលមួយចំនួន។
លោកបានមានប្រសាសន៍ថា «ក្រុមនិស្សិតដែលចុះទៅវាស់វែងដីធ្លី បានអនុវត្តយ៉ាងត្រឹមត្រូវតាមនិតីវិធីដែលមានចែងនៅក្នុងអនុក្រឹត្យលេខ៤៦ ដែលត្រូវឲ្យបំពេញគ្រប់លក្ខខណ្ឌដោយមានការចូលរួមពីគ្រប់ស្ថាប័ន និងសហគមន៍ក្នុងតំបន់»។
លោកនាយករដ្ឋមន្ត្រីបានបន្តថា ទាំងនេះគឺដោយសារមានការចូលរួមរបស់ប្រជាពលរដ្ឋទូទៅផង តាំងពីការបំពេញសាលាប័ត្រក្បាលដី រហូតដល់ការចុះវាស់វែងដីផ្ទាល់។
សូមបញ្ជាក់ថា តាមតួលេខដែលអានដោយលោកនាយករដ្ឋមន្ត្រីហ៊ុន សែន គិតមកត្រឹមថ្ងៃនេះ ការវាស់វែងដីធ្លីបានរួចរាល់ចំនួន ១៧៦ឃុំ ស្មើនឹង ១៨៥ ២៤៣ហិកតាដល់គ្រួសារចំនួន ១៤២ ៨៨៣គ្រួសារហើយ។
No comments:
Post a Comment
yes