លោកម៊ឹក ដារ៉ា (អាវខៀវចាស់)ដើរចេញពីសាលាឧទ្ទរណ៍
ភ្នំពេញៈសាលាឧទ្ធរណ៍កាលពីព្រឹកថ្ងៃអង្គារ បានបន្តសវនាការឧទ្ធរណ៍ករណីពុករលួយ របស់លោក ម៉ឹក ដារ៉ា ជា ឡេងនិងម៉ម ឌឿនដែលបានរត់គេចខ្លួន នៅក្នុងអង្គហេតុទី៧និងទី៨។
លោក ចាយ ច័ន្ទតារាវណ្ណ ប្រធានក្រុមប្រឹក្សាជំនុំជម្រះនៃសាលាឧទ្ធរណ៍បានអានសំណុំរឿងថា សម្រាប់អង្គហេតុទី៨ លោកជា ឡេង និង ម៉ន ឌឿន ត្រូវបានចោទប្រកាន់ពីបទដោះលែងជនល្មើសគ្រឿងញៀន ចំនួន២នាក់នៅខេត្តបន្ទាយមានជ័យជាថ្នូរនឹងប្រាក់សំណូក និង ការរឹបអូសយកឯកសារប្លង់ដីចំនួន៣៦ឯកសារពីជនល្មើសនៅឆ្នាំ ២០០៩។ ចំណែកឯលោកម៊ឹក ដារ៉ាត្រូវបានចោទប្រកាន់ពីបទផ្សំគំនិតជាមួយលោកជា ឡេង ក្នុងការកែសំណុំរឿងនឹងដោះលែងជនល្មើសខាងលើ។
លោកចៅក្រមបានបន្តថា សម្រាប់អង្គហេតុទី៨ លោកជា ឡេង និងលោកម៊ឹក ដារ៉ាត្រូវបានចោទប្រកាន់ពីបទដោះលែងឧក្រិដ្ឋជនគ្រឿងញៀនចំនួនពីរនាក់ និងរក្សាទុកគ្រឿងញៀនដែលរក្សាបានមិនបញ្ជូនទៅតុលាការដើម្បីចាត់ការតាមផ្លូវច្បាប់ ដែលបានប្រព្រឹត្តក្នុង ទីក្រុងភ្នំពេញកាលពីខែឧសភាឆ្នាំ២០០៩។
ពាក់ព័ន្ធនឹងអង្គហេតុទី៨នេះ លោកចៅក្រម ច័ន្ទតារាវណ្ណ បានឲ្យដឹងថាកាលពីថ្ងៃទី៩ខែឧសភាឆ្នាំ២០០៩ វេលាម៉ោង៨:៣០នាទីឈ្មោះជា ឡេងបានដឹកនាំកម្លាំងចុះបង្ក្រាបឧក្រិដ្ឋជនជួញដូរគ្រឿងញៀននៅផ្លូវកម្ពុជាក្រោម សង្កាត់មិត្តភាពខណ្ឌ៧មករា ចាប់បានជនល្មើសចំនួនពីរនាក់ឈ្មោះជិន រស្មីនិងឈ្មោះថន រ៉ានី រឹបអូសបានគ្រឿងញៀនប្រភេទមេតំហ្វេតាមីនចំនួន១៥កញ្ចប់ និងយ៉ាម៉ាចំនួន២០០គ្រាប់។ ជនល្មើសទាំងពីរបានសារភាពថាពួកគេធ្លាប់រកស៊ីជួញដូរគ្រឿងញៀនអស់រយៈពេលជាង១ឆ្នាំមកហើយ ក៏ប៉ុន្តែឈ្មោះម៊ឹក ដារ៉ា និងឈ្មោះជា ឡេងបានបំភ្លៃអង្គហេតុឲ្យឧក្រិដ្ឋជនទាំងពីរនាក់ក្លាយជាជនប្រើប្រាស់គ្រឿងញៀនវិញ ហើយបញ្ជូនជនទាំងពីរទៅកាន់មណ្ឌលកែប្រែដើម្បីដោះលែង នៅថ្ងៃទី២០ខែឧសភា ឆ្នាំ២០០៩ដោយពុំមានការឯកភាពឬយល់ព្រមពីព្រះរាជអាជ្ញារឡើយ។ ហើយថ្នាំញៀនទាំងពីរប្រភេទដែលរឹបអូសបានក៏ត្រូវបានបាត់បង់ព័ត៌មានផងដែរ។
សូមបញ្ជាក់ថាសវនាការឧទ្ទរណ៍របស់លោកម៊ឹក ដារ៉ា, ជា ឡេង និងម៉ន ឌឿននឹងត្រូវបន្តនៅថ្ងៃស្អែកទៀត។
No comments:
Post a Comment
yes