ប្រជាពលរដ្ឋឃុំស្រយ៉ង់ ស្រុកគូលែនខេត្តព្រះវិហារ អង្គុយតវ៉ាមុខរដ្ឋសភាជាតិ
ភ្នំពេញៈ ប្រជាពលរដ្ឋប្រមាណជាង២០០នាក់ តំណាងឲ្យប្រជាពលរដ្ឋចំនួន ៣៦០គ្រួសារ រស់នៅភូមិស្រយ៉ង់ខាងជើងនិងខាងត្បូង ឃុំស្រយ៉ង់ ស្រុកគូលែន ខេត្តព្រះវិហារ បាននំាគ្នាមកដាក់ពាក្យស្នើសុំជួយអន្តរាគមន៍ ពីរដ្ឋសភាជាតិនៅព្រឹកថ្ងៃទី០៧ ខែកញ្ញានេះ ទាក់ទងនឹងការដកហូតដីធ្លីពីក្រុមទាហានកងពលលេខ៤១។
អ្នកស្រី វរៈ បូរ តំណាងអ្នកភូមិដែលមកធ្វើការតវ៉ា បាននិយាយថា ក្រុមអ្នកភូមិមករកបទសុំជួយអន្តរាគមន៍ពីរដ្ឋសភាជាតិ ជួយផ្តល់យុត្តិធម៌ ដោះស្រាយឲ្យប្រជាពលរដ្ឋ មានសិទ្ធិគ្រប់គ្រងប្រើប្រាស់ដីធ្លីរបស់ខ្លួន រឿងដីធ្លី ដែលត្រូវបានក្រុមទាហានកងពលលេខ៤១ យកទៅដាំដំឡូង ដាំស្វាយ។
អ្នកស្រីបានបន្តថា «ក្រុមអ្នកភូមិពួកយើងបានរស់នៅលើដីនោះ ១០ឆ្នាំមកហើយ និងបានស្នើសុំជួយអន្តរាគមន៍ពីអាជ្ញាធរខេត្តព្រះវិហារជាច្រើនលើកច្រើនសារមកហើយ ប៉ុន្តែអាជ្ញាធរខេត្តតែងតែថាដោះស្រាយឲ្យពួកយើង តែមិនឃើញដោះស្រាយឲ្យពួកយើង ទើបពួកយើងមករាជធានីភ្នំពេញ សុំឲ្យរដ្ឋសភាជាតិជួយអន្តរាគមន៍វិញម្តង»។
ក្នុងលិខិតស្នើសុំអន្តរាគមន៍របស់អ្នកភូមិដែលដាក់ជូនរដ្ឋសភា បានសរសេរថា អាជ្ញាធរស្រុកគូលែន ប្រធានសូរិយោដីខេត្ត និងអភិបាលខេត្តព្រះវិហារដែលឃុបឃិតជាមួយកងពលលេខ៤១ បានយកដីប្រជាពលរដ្ឋទៅដាំដំណាំរបស់ ក្រុមខ្លួននិង ម៉្យាងទៀតមិនឲ្យក្រុមយុវជនស្ម័គ្រចិត្ត ចុះវាស់វែងដីជូនពួកគាត់ ដោយអាជ្ញាធរខេត្តសំអាងថាដីនោះបានធ្វើអនុប្រយោគរួចហើយ និងតាមអំណាចលិខិតជូនដំណឹងលេខ ៦០៣ ស.ជ.ណ ចុះថ្ងៃទី២៥ ខែឧសភា ឆ្នាំ២០១១របស់ទីស្តីការគណៈរដ្ឋមន្ត្រី ដើម្បីយកដីឈូសឆាយធ្វើជាដីសម្បទានសង្គមកិច្ច ចែកជូនគ្រួសារកងទ័ពនិងយោធិនចូលនិវត្តន៍។
សូមបញ្ជាក់ថា ក្រោយពីបទបញ្ជា០១ បានប្រកាសផ្សាយទូទាំងប្រទេសអំពីគោលនយោបាយចាស់សកម្មភាពថ្មីលើវិស័យដីធ្លីរួចមកនេះជាលើកទីបីរបស់អ្នកភូមិស្រយ៉ង់ហើយដែលមករាជធានីភ្នំពេញធ្វើការស្នើសុំជួយអន្តរាគមន៍រឿងដីធ្លីរបស់ពួកគាត់ បន្ទាប់ពួកគាត់បានមកពីរម្តងមកហើយ និងដោយមានការសន្យាដោះស្រាយពីសំណាក់ មន្ត្រីទីស្តីការគណៈរដ្ឋមន្ត្រី និងខុទ្ទការល័យលោកនាយករដ្ឋមន្ត្រី ប៉ុន្តែមិនមានដំណោះស្រាយកើតឡើងឡើយ។
No comments:
Post a Comment
yes