សិស្សរៀនគួរបន្ថែម
មិនមែនតែកូនសិស្សទេដែលរត់ចេញពីសាលារដ្ឋ ប៉ុន្តែគ្រូបង្រៀនមួយចំនួនក៏រត់ចេញដែរ។ កូនសិស្សរត់ចេញពីសាលារដ្ឋ គឺដោយសារតែគុណភាពសិក្សា ប៉ុន្តែសម្រាប់គ្រូបង្រៀនវិញគឺដោយសារតែរឿងក្រពះ។ តើអ្វីទៅជាផលប៉ះពាល់មកលើវិស័យអប់រំនៅពេលដែលក្រពះគ្រូបង្រៀនស្រែកឃ្លាននោះ?។
នៅសល់តែពីរសប្តាហ៍ទៀតប៉ុណ្ណោះពិភពលោកទាំងមូលនឹងរៀបចំប្រារព្ធទិវាគ្រូបង្រៀនពិភពលោក។ ចំណែកឯនៅក្នុងប្រទេសកម្ពុជាឯណេះវិញ សមាគមគ្រូបង្រៀនកម្ពុជាឯករាជ្យមិនអាចបំភ្លេចព្រឹត្តិការណ៍ដ៏មានសារៈសំខាន់នេះបានឡើយ។
ជាក់ស្តែង កាលពីសប្តាហ៍កន្លងមកនេះលោក រ៉ុង ឈុន ប្រធានសមាគមគ្រូបង្រៀនកម្ពុជាឯករាជ្យបានដាក់លិខិតទៅកាន់អាជ្ញាធរក្រុងភ្នំពេញដើម្បីសុំធ្វើការរៀបចំពិធីសម្រាប់គ្រូបង្រៀននៅក្នុងប្រទេសកម្ពុជា។ ព្រឹត្តិការណ៍ដើម្បីរម្លឹកគុណដល់លោកគ្រូអ្នកគ្រូគឺជាឳកាសដែលមិនអាចបំភ្លេចបានឡើយ។ ប៉ុន្តែអ្វីដែលជាការកត់សម្គាល់សម្រាប់ប្រទេសកម្ពុជាគឺថា ទិវាគ្រូបង្រៀននៅឆ្នាំនេះធ្វើឡើងចំពេលដែលប្រាក់ខែគ្រូបង្រៀននៅមានកម្រិតទាបនៅឡើយនិងចំពេលដែលគ្រូបង្រៀននៅសាលារដ្ឋមួយចំនួនកំពុងចាកចេញទៅបង្រៀននៅសាលាឯកជនឬទៅបើកបង្រៀនជាលក្ខណៈឯកជនដោយខ្លួនឯងកាន់តែច្រើនឡើង។
ជាក់ស្តែង កាលពីសប្តាហ៍កន្លងមកនេះលោក រ៉ុង ឈុន ប្រធានសមាគមគ្រូបង្រៀនកម្ពុជាឯករាជ្យបានដាក់លិខិតទៅកាន់អាជ្ញាធរក្រុងភ្នំពេញដើម្បីសុំធ្វើការរៀបចំពិធីសម្រាប់គ្រូបង្រៀននៅក្នុងប្រទេសកម្ពុជា។ ព្រឹត្តិការណ៍ដើម្បីរម្លឹកគុណដល់លោកគ្រូអ្នកគ្រូគឺជាឳកាសដែលមិនអាចបំភ្លេចបានឡើយ។ ប៉ុន្តែអ្វីដែលជាការកត់សម្គាល់សម្រាប់ប្រទេសកម្ពុជាគឺថា ទិវាគ្រូបង្រៀននៅឆ្នាំនេះធ្វើឡើងចំពេលដែលប្រាក់ខែគ្រូបង្រៀននៅមានកម្រិតទាបនៅឡើយនិងចំពេលដែលគ្រូបង្រៀននៅសាលារដ្ឋមួយចំនួនកំពុងចាកចេញទៅបង្រៀននៅសាលាឯកជនឬទៅបើកបង្រៀនជាលក្ខណៈឯកជនដោយខ្លួនឯងកាន់តែច្រើនឡើង។
ប្រាក់ខែគ្រូបង្រៀននៅក្នុងប្រទេសកម្ពុជាត្រូវបានគេរិះគន់ថា មានកម្រិតទាបបើប្រៀបធៀបទៅនឹងតម្លៃទំនិញនៅលើទីផ្សារ។ លោក រ៉ុង ឈុន ប្រធានសមាគមគ្រូបង្រៀនកម្ពុជាឯករាជ្យបានបញ្ជាក់ថា គ្រូបង្រៀននៅក្នុងប្រទេសកម្ពុជាទទួលបានប្រាក់ខែក្នុងចន្លោះពី៥០ទៅ១០០ដុល្លារអាមេរិកអាស្រ័យទៅលើអតីតភាពនិងកម្រិតបង្រៀនរបស់គ្រូម្នាក់ៗ។
បើយោងតាមលោក រ៉ុង ឈុន ប្រាក់ខែកម្រិតនេះមិនអាចអនុញ្ញតអោយគ្រូបង្រៀនរស់បានសមរម្យទេប្រសិនបើពួកគេមិនប្រកបមុខរបរផ្សេងនោះ។ ដោយសារតែប្រាក់ខែរដ្ឋមិនគ្រប់គ្រាន់នេះហើយ ទើបគ្រូបង្រៀនមួយចំនួននាំគ្នាទៅបង្កើតមុខរបរទីពីររបស់ខ្លួន។ អ្នកខ្លះបង្កើតមុខរបរលក់ដូរតូចតាចនៅតាមផ្ទះ អ្នកខ្លះធ្វើចម្ការនៅក្បែរផ្ទះ អ្នកខ្លះលក់នំអោយកូនសិស្សអ្នកខ្លះសុំប្រាក់ពីកូនសិស្សត្រង់ៗ អ្នកខ្លះលក់ឯកសារចម្លងអោយកូនសិស្ស អ្នកខ្លះទៀតបង្រៀនគួរនៅក្នុងថ្នាក់ឬបង្រៀនគួរនៅតាមផ្ទះរបស់សិស្សជាដើម។
ទាំងអស់នេះគឺជាយុទ្ធសាស្រ្តរបស់គ្រូបង្រៀនម្នាក់ៗដើម្បីទទួលបានមកវិញនៅប្រាក់ចំណូលបន្ថែមសម្រាប់រស់នៅថ្ងៃស្អែកបន្តទៀត។
អ្វីដែលបានរៀបរាប់ខាងលើនេះគឺជាប្រភេទគ្រូបង្រៀនមួយក្រុម។ រីឯគ្រូបង្រៀនមួយក្រុមទៀតដែលមានបទពិសោធន៍ល្អហើយត្រូវបានកូនសិស្សល្បីថាពូកែនោះ ពួកគេបានរត់ចេញពីសាលារដ្ឋទៅបង្រៀននៅសាលាឯកជនឬទៅបើកបង្រៀនគួរឯកជនដោយខ្លួនឯងតែម្តង។ ក្រុមគ្រូបង្រៀនប្រភេទទីពីរនេះទទួលបានប្រាក់ចំណូលខ្ពស់ ជាងការបង្រៀននៅក្នុងសាលារដ្ឋច្រើនណាស់។
តើមានអ្វីកើតឡើងនៅពេលដែលគ្រូបង្រៀនទៅបង្កើតមុខរបរទីពីរនោះ?
ចម្លើយទីមួយដែលត្រូវឆ្លើយគឺថាវាជាការល្អពីព្រោះការបង្កើតមុខរបរទីពីរនេះអនុញ្ញតអោយគ្រូបង្រៀនអាចបង្កើនប្រាក់ចំណូលប្រចាំគ្រួសារបានបន្ថែមទៀត។
ប៉ុន្តែប្រសិនបើគេវាយតម្លៃដោយផ្អែកលើលក្ខណៈគរុកោសល្យអប់រំវិញ នៅពេលដែលគ្រូបង្រៀនម្នាក់ធ្វើការច្រើនជ្រុលពេក ជាពិសេសការងារដែលមិនទាក់ទងទៅនឹងការបង្រៀនទៀតនោះ ពេលនោះ គ្រូបង្រៀនម្នាក់នោះ ពិតជាមិនមានពេលសម្រាប់ត្រៀមមេរៀនឡើយ។ បើគ្រូបង្រៀនបង្រៀនកូនសិស្សដោយមិនបានត្រៀមមេរៀនអោយត្រឹមត្រូវទុកជាមុននោះទេ ការបង្រៀនពិតជាមិនមានគុណភាពឡើយ។
ម្យ៉ាងវិញទៀត ដោយមិននិយាយពីការត្រៀមមេរៀនក៏ដោយចុះ នៅពេលដែលគ្រូបង្រៀនម្នាក់ធ្វើការច្រើនម៉ោងដើម្បីទទួលបានកម្រៃក្រៅ ហើយដល់ពេលបង្រៀនទើបចូលមកបង្រៀននោះ តើគ្រូបង្រៀននោះមានកម្លាំងបង្រៀនពិតប្រាកដឬទេ? ចម្លើយទៅនឹងសំណួរនេះគឺពិតជាគ្មានឡើយ។ អ៊ីចឹង ជាលទ្ធផល គុណភាពសិក្សានៅក្នុងម៉ោងនោះគឺពិតជាគ្មាន។
អ្វីដែលគួរអោយព្រួយបារម្ភជាងនេះទៅទៀតគឺថា គ្រូបង្រៀនមួយចំនួនដែលរវល់បង្រៀនឯកជនច្រើននៅខាងក្រៅពួកគេមិនសូវខ្វល់ខ្វាយនឹងការបង្រៀននៅក្នុងសាលារដ្ឋទេ។ អ្នកខ្លះគ្រាន់តែចូលក្នុងថ្នាក់ហើយបង្រៀនលេងៗតែប៉ុណ្ណោះ។ ផ្ទុយទៅវិញ ពួកគេទុកកម្លាំងដើម្បីបង្រៀនគួរនៅខាងក្រៅឬបង្រៀននៅសាលាឯកជនទៅវិញ។
ក្នុងរយៈពេលចុងក្រោយនេះ គេសង្កេតឃើញថា មិនមែនតែកូនសិស្សទេដែលរត់ចេញសាលារដ្ឋសូម្បីតែគ្រូបង្រៀនមួយចំនួនក៏ពួកគេរត់ចេញពីសាលារដ្ឋដែរ។ មានមូលហេតុពីរផ្សេងគ្នា។ កូនសិស្សរត់ចេញពីសាលារដ្ឋគឺដោយសារគុណភាពសិក្សានៅសាលារដ្ឋអន់ពេក។ រីឯគ្រូបង្រៀនវិញគឺដោយសារប្រាក់ខែនៅសាលារដ្ឋទាបពេក។
សរុបសេចក្តីមកវិញ ដើម្បីលើកកម្ពស់វិស័យអប់រំនៅកម្ពុជា មិនថានៅក្នុងសាលារដ្ឋឬឯកជននោះទេ ការដំឡើងប្រាក់ខែជូនគ្រូបង្រៀនគឺជារឿងចាំបាច់មិនអាចប្រកែកបានឡើយ។នៅពេលដែលគ្រូបង្រៀនមានប្រាក់ខែសមរម្យ ពេលនោះគ្រូបង្រៀនមានពេលគ្រប់គ្រាន់សម្រាប់ត្រៀមការបង្រៀន ហើយនៅទីបំផុត គុណភាពអប់រំនឹងត្រូវបានកែលម្អរឡើងវិញ៕
No comments:
Post a Comment
yes