រតនគិរី ៖ មន្ត្រីកងរាជអាវុធហត្ថម្នាក់ដែលត្រូវបានគេស្គាល់ថាជាកូនរបស់លោកមេបញ្ជាការកងរាជអាវុធហត្ថខេត្តរតនគិរី ឈ្មោះ គឹង ស៊ាងឡៃ បាននិងកំពុងតែលេចធ្លោជាងគេនៅក្នុងការចុះបង្ក្រាបរាល់សកម្មភាពបទល្មើសព្រៃឈើហើយមិនតែប៉ុណ្ណោះបុគ្គលម្នាក់នេះពូកែខាងចាប់ជំរិតទារលុយពីប្រជាពលរដ្ឋដែលរកស៊ីដឹកឈើតូចតាច គ្រាន់តែចិញ្ចឹមជីវិតគួរឲ្យអាណិតអាសូរជាទីបំផុត។
ជាក់ស្តែងកាលពីថ្ងៃទី ៣ ខែកញ្ញា ឆ្នាំ២០១២ វេលាម៉ោង ៧ និង ៣០ នាទីយប់ មានឡានកាមរីកែច្នៃមួយគ្រឿងសណ្តោងគ្នាបានដឹកគ្រែមួយគ្រឿងដែលបាញ់ថ្នាំនិងប៉ូលារួចហើយ ត្រូវបានលោកប៉េអឹម ម្នាក់មានឋានៈជាអនុសេនីយ៍ឯកឈ្មោះ គឹង ស៊ាងឡៃ បានចាប់គ្រែរបស់ប្រជាពលរដ្ឋ ដែលរស់នៅក្នុងស្រុកវ៉ើនសៃ ឈ្មោះ ស៊ឹង រួចហើយបានជំរិតទារលុយចំនួន ១២ ម៉ឺនរៀល និងបានយកឈើនាងនួនចំនួន ២ សន្លឹក មានប្រវែង២ ម៉ែត្រ ទទឹង ៤ តឹក ហើយក៏បានដោះលែងឲ្យមកផ្ទះវិញ។
ពាក់ព័ន្ធករណីនេះមានមតិមួយចំនួនទាំងប្រជាពលរដ្ឋនិងកម្លាំងប្រដាប់អាវុធ បាននាំគ្នារិះគន់យ៉ាងខ្លាំងចំពោះលោកអនុសេនីយ៍ឯក គឹង ស៊ាងឡៃ ដែលចុះបង្ក្រាបបទល្មើសទាំងយប់ទាំងថ្ងៃមិនចេះនឿយហត់នោះ បែរជាខ្លួនឯងជាអ្នករកស៊ីដឹកឈើទៅវិញ ។ មិនតែប៉ុណ្ណោះលោកអនុសេនីយ៍ឯករូបនោះ បានយករថយន្តពាក់ស្លាកលេខ ខ.ម បិទពីក្រោយឡានដឹកឈើទៀតផង។
ទង្វើទាំងអស់នេះបានផ្ទុយពីបទបញ្ជារបស់លោកនាយឧត្តមសេនីយ៍ សៅ សុខា មេបញ្ជាការកងរាជអាវុធហត្ថលើផ្ទៃប្រទេស ដែលបានដាក់បទបញ្ជាឲ្យកងរាជអាវុធហត្ថទាំងអស់សូមឲ្យដកខ្លួនចេញពីបទល្មើសព្រៃឈើ។ ជាពិសេសនោះវាកាន់តែផ្ទុយនឹងសកម្មភាពរបស់អង្គភាពប្រឆាំងអំពើពុករលួយដែលកំពុងចាត់វិធានការក្តៅបង្ក្រាបមន្ត្រីខិលខូច ។ ប្រសិនបើកម្លាំងកងរាជអាវុធហត្ថដទៃទៀតធ្វើដូចតែលោក គឹង ស៊ាងឡៃ ដែលអាងខ្នងឪពុកជាមេបញ្ជាការកងរាជអាវុធហត្ថខេត្តរតនគីរីនោះ មិនដឹងទៅជាយ៉ាងណាទេ៕
No comments:
Post a Comment
yes