ក្មេងៗសហគមន៍បឹងកក់ និងបុរីកីឡាស្រែកទាមទារមុខតុលាការរាជធានីភ្នំពេញ
ភ្នំពេញៈនៅព្រឹកថ្ងៃទី០៧ ខែកញ្ញានេះ ប្រជាពលរដ្ឋបឹងកក់ និងសហគមន៍បុរីកីឡា ប្រមាណជា៣០០នាក់ បានប្រមូលផ្តុំគ្នាដើរដាក់ញ្ញត្តិតាមស្ថាប័នជាន់ខ្ពស់រាជរដ្ឋាភិបាលនិងអង្គទូតនានា ដើម្បីស្នើសុំបទអន្តរាគមន៍រកយុត្តិធម៌ជូនប្រជាពលរដ្ឋបឹងកក់ម្នាក់ និងសហគមន៍បុរីកីឡាម្នាក់ដែលកំពុងជាប់ឃុំខ្លួនក្នុងពន្ធនាគារព្រៃសរ កាលពីដើមសប្តាហ៍នេះ។
អ្នកស្រីទេព វណ្ណី តំណាងប្រជាពលរដ្ឋបឹងកក់ បានឲ្យដឹងថា នៅព្រឹកថ្ងៃសុក្រនេះ ក្រុមប្រជាពលរដ្ឋបឹងកក់ និងបុរីកីឡាបានដាក់ញ្ញាត្តិជូនទីស្តីការគណៈរដ្ឋមន្ត្រីរួចរាល់ហើយ។ ហើយក្រុមប្រជាពលរដ្ឋយើងនឹងគ្រោងដាក់ញ្ញាត្តិបន្តទៀត នៅក្រសួងយុត្តិធម៌ ក្រសួងព្រះបរមរាជ្យវាំង ខុទ្ទការល័យលោកនាយករដ្ឋមន្ត្រីហ៊ុន សែន អគ្គស្នងការនគរបាលជាតិ និងស្ថានទូតនានាក្នុងប្រចាំប្រទេសកម្ពុជា។
អ្នកស្រីបានបន្តថា ក្រុមប្រជាពលរដ្ឋសហគមន៍បឹងកក់ និងបុរីកីឡានឹងនាំគ្នាទៅពន្ធនាគារព្រៃសរនៅថ្ងៃអាទិត្យនេះ ដើម្បីបង្ហោះប៉េងប៉ោង លើកទឹកចិត្តដល់សមាជិកខ្លួនដែលកំពុងជាប់ឃុំឃាំងក្នុងពន្ធនាគារនោះ។
សូមបញ្ជាក់ថា អ្នកភូមិបឹងកក់ម្នាក់ អ្នកស្រី យ៉ោម បុប្ផា ត្រូវបានសាលាដំបូងរាជធានីភ្នំពេញ សម្រេចឃុំខ្លួន ដោយធ្វើការចោទប្រកាន់ពីបទ ប្រើអំពើហិង្សាដោយចេតនា វាយលើបុរសពីរនាក់ កាលពីថ្ងៃ៤ ខែកញ្ញា ឆ្នាំ២០១២ និងអ្នកស្រី ទឹម សាក់មុន្នី ប្រជាពលរដ្ឋសហគមន៍បុរីកីឡា ក៏ត្រូវបានតុលាការរាជធានីភ្នំពេញ សម្រេចឃុំខ្លួនកាលពីព្រឹកថ្ងៃទី៥ ខែកញ្ញា ឆ្នាំ២០១២ ដោយចោទប្រកាន់ពីបទញុះញង់ឲ្យប្រព្រឹត្តបទឧក្រិដ្ឋ តាមបណ្តឹងរបស់ឧកញ៉ាស៊ុយ សុផាន។
ពាក់ពន្ធនឹងរឿងចាប់ឃុំខ្លួនសកម្មជនដីធ្លីសហគមន៍ទាំងពីរខាងលើ ក្រុមអង្គការសង្គមស៊ីវិល និងអង្គការសិទ្ធិមនុស្សជាច្រើន បានចេញសេចក្ដីថ្លែងការណ៍ ថ្កោលទោសនឹងការចាប់ខ្លួនស្ត្រីអ្នកភូមិបឹងកក់ និងបុរីកីឡាទាំងពីរនេះ ហើយបានទាមទារឲ្យមានការដោះលែងស្ត្រីទាំងពីរនាក់ផងដែរ។
No comments:
Post a Comment
yes