រហូតមកដល់ពេលនេះ សមាគមការពារសិទ្ធិមនុស្សអាដហុក ពុំទាន់ប្រាកដនៅឡើយទេថា សកម្មជនល្បីឈ្មោះរបស់ខ្លួន ដែលមានដីកាតុលាការកោះហៅឲ្យចូលខ្លួនបំភ្លឺជុំវិញសំណុំរឿងអបគមន៏ដ៏ចម្រូងចម្រាសនឹងវិលពីប្រទេសក្រៅវិញនៅថ្ងៃណាទេ ?
លោក នី ចរិយា ប្រធានផ្នែកស៊ើបអង្កេតរបស់អាដហុក បានថ្លែងប្រាប់ក្រុមអ្នករាយការណ៏ព័ត៌មានកាលពីម្សិលមិញថា គម្រោងធ្វើដំណើរបស់លោក ចាន់ សុវ៉េតនៅមិនទាន់ច្បាស់នៅឡើយទេ , ” រហូតមកដល់ពេលនេះ ខ្ញុំមិនទាន់បានទទួលព័ត៌មានណាមួយពីគាត់ទេ ។ ខ្ញុំគិតថា គាត់ស្នាក់ក្នុងទីក្រុងបាងកកសម្រាប់វិសមកាល ..” ។
ប៉ុន្តែយ៉ាងណាក៏ដោយមន្ត្រីរូបនេះបានអះអាងថាលោក ជឿថា លោក ចាន់ សុវ៉េត នៅតែគ្រោងវិលត្រឡប់មកកម្ពុជាវិញ ។ ដោយបានបញ្ជាក់ថា រហូតមកដល់ពេលនេះតុលាការពុំទាន់បានឲ្យដឹងអំពីកាលបរិច្ឆេទថ្មីសម្រាប់បើកសវនាការរឿងក្ដីនេះទេ ។
បន្ទាប់ពីការថ្លែងដោយប្រយោលជាសាធារណៈរបស់នាយករដ្ឋមន្រី ហ៊ុន សែន អំពីថា មន្រ្តីអង្គការសង្គមស៊ីវិលបានលាក់បំពួននិងផ្ដល់មធ្យោបាយដល់អ្នកដែលត្រូវបានចោទថា ជាមេខ្លោងអបគមន៏នោះ ក្រោយមកតុលាការក្រុងភ្នំពេញបានកោះហៅលោក ចាន់ សុវ៉េត ឲ្យចូលខ្លួនបំភ្លឺនៅថ្ងៃទី ២៤សីហា ក្រោមបទ ជួយឧក្រិដ្ឋជន , ប៉ុន្តដោយជាប់បេសកម្មនៅក្រៅប្រទេស មេធាវីរបស់លោក បានសុំពន្យារពេល។
គួរបញ្ជាក់ថា ក្រុមប្រជាពលរដ្ឋដែលរងការចោទជាដំបូងថា បានរំលោភកាន់កាប់ដីរបស់ក្រុមហ៊ុនចំការកៅស៊ូមួយឈ្មោះកាសូទីម ក្នុងស្រុក ឆ្លូងខេត្ត ក្រចេះ ក្រោយមកពួកគេ ដែលត្រូវបានរកឃើញថា មាន ព្រួញ និង ស្នារ ជាអាវុធបុរាណ ដែលពេលនេះត្រូវបានគ្រួសារខ្មែរខ្លះប្រើសម្រាប់បរបាញ់សត្វតូចតាចនោះ បានរងការចោទពីបទអបគមន៏ទឹកដី ហើយនាំទៅដល់ការបង្រ្កាបយ៉ាងព្រៃផ្សៃកាលពីខែ ឧសភា ដែលបានធ្វើឲ្យក្មេងស្រីជំទង់ម្នាក់ស្លាប់ ។សំណុំរឿងនេះក៏ជាផ្នែកនាំឲ្យមានការចាប់ខ្លួនលោក ម៉ម សូណង់ដូ ប្រធានសមាគមអ្នកប្រជាធិបតេយ្យ និង ជានាយកវិទ្យុសំបុកឃ្មុំកាលពីខែ កក្កដា ផងដែរ ៕
No comments:
Post a Comment
yes