ភ្នំពេញ: បន្ទាប់ពីមានការឃាត់ខ្លួនជនសង្ស័យម្នាក់ កាលពីថ្ងៃទី៣១ ខែសីហា ឆ្នាំ២០១២ ជនសង្ស័យ ៣នាក់ផ្សេងទៀត នៅថ្ងៃទី៤ ខែកញ្ញា ឆ្នាំ២០១២ ត្រូវបានតុលាការកោះហៅ មកធ្វើការសាកសួរ ពាក់ព័ន្ធនឹងការបំផ្ទុះគ្រឿងផ្ទុះ លើស្ពានអូរគគីរ តាមផ្លូវជាតិលេខ៤ នៅខេត្តកំពង់ស្ពឺ។
លោក ខេង ទីតូ អ្នកនាំពាក្យអាវុធហត្ថលើផ្ទៃប្រទេស បានឲ្យដឹង តាមទូរស័ព្ទ នៅថ្ងៃទី៤ ខែកញ្ញា ឆ្នាំ២០១២ ថា បន្ទាប់ពីសមត្ថកិច្ចអាវុធហត្ថ ឃាត់ខ្លួនបានជនសង្ស័យម្នាក់រួចហើយនោះ ជនសង្ស័យ ៣នាក់ផ្សេងទៀត ត្រូវបានតុលាការកោះហៅ មកធ្វើការសាកសួរព័ត៌មានបន្ថែម ពាក់ព័ន្ធនឹងបញ្ហាបំផ្ទុះគ្រាប់បែក។
លោក ខេង ទីតូ បានបញ្ជាក់ “នៅមិនទាន់មានការចោទប្រកាន់ ឬប្រកាសចាប់ឃាត់ខ្លួនអីនោះទេ”។
សូមរម្លឹកថា ជនសង្ស័យម្នាក់ ត្រូវបានយកមកសាកសួរនៅទីបញ្ជាការដ្ឋានកងរាជអាវុធហត្ថ ខេត្តកំពង់ស្ពឺ កាលពីព្រឹកថ្ងៃទី៣១ ខែសីហា ឆ្នាំ២០១២ ទាក់ទងបញ្ហាបំផ្ទុះគ្រឿងផ្ទុះនៅលើផ្លូវជាតិលេខ៤ ត្រង់ចំណុចស្ពានថ្មឈ្មោះអូរគគីរ ដែលស្ថិតនៅឃុំត្រែងត្រយឹង ស្រុកភ្នំស្រួច ខេត្តកំពង់ស្ពឺ ចន្លោះពីគីឡូម៉ែត្រ១០៦ និង១០៧ ជាប់ព្រំប្រទល់ឃុំអូរបាក់រទេះ ស្រុកកំពង់សិលា ខេត្តព្រះសីហនុ កាលពីវេលាម៉ោងជាង ៩ យប់ ថ្ងៃទី២៩ ខែសីហា ឆ្នាំ២០១២។
ករណីបំផ្ទុះគ្រឿងផ្ទុះកែច្នៃ នៅលើផ្លូវជាតិលេខ៤ ត្រង់ចំណុចស្ពានថ្ម អូរគគីរ ក្បែរពេជ្រនិល ដើម្បីប៉ុនប៉ងផ្តាច់ស្ពាន ដែលស្ថិតនៅក្នុងភូមិសាស្ត្រ ភូមិត្រែងត្រយឹង ឃុំត្រែងត្រយឹង ស្រុកភ្នំស្រួច ខេត្តកំពង់ស្ពឺ។ ប៉ុន្តែហេតុការណ៍នោះ មិនបណ្តាលឲ្យប្រជាពលរដ្ឋ និងអ្នកដំណើរណាម្នាក់ រងរបួសនោះទេ ដោយគ្រាន់តែរបើកថ្ម ទំហំប្រហែលមួយមែត្រការ៉េ។ ភ្លាមៗនោះ ក្រុមហ៊ុន AZ ដែលបានយកលុយផ្តាច់មុខពីឡាន ឆ្លងកាត់ផ្លូវជាតិលេខ៤ ក៏បានជួសជុល ប៉ះអ៊ុតភ្លាមៗផងដែរ៕
No comments:
Post a Comment
yes