យ៉ាងហោចណាស់ មានសកម្មជនការពារសិទ្ធិមនុស្សនៅកម្ពុជាពីរនាក់ កំពុងមានវត្តមាននៅក្រៅប្រទេស ដោយបារម្ភពីសុវត្ថិភាពផ្ទាល់ខ្លួន បន្ទាប់ពីមានពាក្យបណ្តឹង និងការគំរាមកំហែងសិទ្ធិបញ្ចេញមតិរឿងជម្លោះដីធ្លី ។
មន្ត្រីស៊ើបអង្កេតនៅសមាគមការពារសិទ្ធិមនុស្សអាដហុក លោក ចាន់ សុវ៉េត ត្រូវបានអះអាងថា កំពុងបំពេញបេសកកម្មនៅក្រៅប្រទេស ដោយមិនទាន់កំណត់ពេលជាក់លាក់មកកម្ពុជាវិញ។ តុលាការចោទថា មន្រ្តីរូបនេះបានផ្តល់ជំនួយដល់ជនល្មើសដែលរដ្ឋាភិបាលតាមចាប់ខ្លួនរឿងជម្លោះដីធ្លីនៅខេត្តក្រចេះ ។
នាយកលេខាធិការដ្ឋាននៃក្រុមការងារពិសេសសិទ្ធិលំនៅឋាន លោក សៀ ភារម្យ ក៏អវត្តមាននៅកម្ពុជាដែរ បន្ទាប់ពីមានលិខិតព្រមានឲ្យបញ្ឈប់រិះគន់រដ្ឋាភិបាលរឿងជម្លោះដីធ្លី ។
មិនអាចសុំអត្ថាធិប្បាយពីសមាគមអាដហុក ដើម្បីសាកសួរវត្តមានលោក ចាន់ សុវ៉េត មកកម្ពុជានៅពេលណាបានទេ នៅព្រឹកថ្ងៃអង្គារនេះ។
ប្រធានកម្មវិធីពង្រឹងសហគមន៍ នៃក្រុមការងារពិសេសសិទ្ធិលំនៅឋាន លោក ណើប លី មានប្រសាសន៍ថា លោក សៀ ភារម្យ កំពុងបំពេញបេសកកម្មនៅក្រៅប្រទេស ហើយគ្រោងត្រឡប់មកកម្ពុជាវិញនៅដើមខែតុលាខាងមុខនេះ ៖ “ យើងធ្វើការនៅហ្នឹងតែងតែមានហើយ អ្នកណាក៏ដោយ គាត់ក៏ដោយ ខ្ញុំក៏ដោយ អ្នកផ្សេងក៏ដោយ តែងតែមាន អង្គការផ្សេងៗទៀត ដែលសមាជិក HRTF ក៏មានរឿងអញ្ចឹងកើតឡើងដែរ ប៉ុន្តែយើងនៅតែបន្តធ្វើ ធ្វើដោយ ប្រកបដោយលក្ខណៈវិជ្ជាជីវៈទៅ ហើយតាមដំណើរទៅ ដើរមួយជំហានគិតមួយជំហាន បើយើងចុះចេញម៉េចកើត ប្រជាជនត្រូវការយើង”។
អ្នកនាំពាក្យអង្គភាពព័ត៌មាន និងប្រតិកម្មរហ័សរបស់ទៅស្តីការគណៈរដ្ឋមន្ត្រី លោក ទិត្យ សុធា មានប្រសាសន៍ថា លោកមិនបានដឹងច្បាស់ពីអវត្តមាន របស់សកម្មជនសិទ្ធិមនុស្សទាំងពីរនេះទេ ប៉ុន្តែលោកថា បើមន្ត្រីទាំងនោះគេចខ្លួនដោយសារមានបណ្តឹងនៅតុលាការ សកម្មជនទាំងនោះមិនចូលរួមពង្រឹងនីតិរដ្ឋនៅកម្ពុជាទេ ៖ “សង្គមបច្ចុប្បន្នដែលយើងយកច្បាប់ធ្វើជាមូលដ្ឋាន នៅក្នុងការដោះស្រាយបញ្ហា ហើយគាត់ ជាពិសេសលោក ចាន់ សុវ៉េត គឺគាត់ជាជនសង្ស័យម្នាក់ ដែលត្រូវបានតុលាការកោះហៅ ដើម្បីមកបំភ្លឺជុំវិញការផ្តល់ចារីអីផ្សេងៗ ដែលពាក់ព័ន្ធនឹងរឿងបំបែកអបគមន៍ដែរ និយាយទៅគឺការផ្តល់ចារីនោះណា ដូច្នេះបើគាត់ថា មិនជាប់ពាក់ព័ន្ធរឿងនេះ គាត់គួរមានសេចក្តីក្លាហាននៅក្នុងការចូលទៅបំភ្លឺនៅតុលាការ ហើយបើតាមដឹងគឺមកដល់ម៉ោងនេះ គាត់មិនបានបញ្ជាក់ថា គាត់បានរត់គេចខ្លួនទេ គឺគាត់ជាប់បំពេញភារកិច្ចនៅក្រៅប្រទេស”។
សាលាដំបូងរាជធានីភ្នំពេញ បានបង្គាប់ឲ្យ លោក ចាន់ សុវ៉េត ចូលបំភ្លឺនៅថ្ងៃទី២៤ ខែសីហា ឆ្នាំ២០១២។ ដីកាកោះហៅនេះ បានធ្វើឡើងក្រោយពីលោកនាយករដ្ឋមន្ត្រី ហ៊ុន សែន ព្រមានមិនចំឈ្មោះកាលពីថ្ងៃទី១ ខែសីហាថា នឹងចាត់វិធានការលើមន្ត្រីសង្គមស៊ីវិលម្នាក់ ដែលផ្តល់មធ្យោបាយឲ្យជនសង្ស័យដែលរដ្ឋាភិបាលតាមចាប់ខ្លួន។
កាលពីថ្ងៃទី៣ ខែសីហា ឆ្នាំ២០១២ សហព័ន្ធនិស្សិតបញ្ញាវន្តប្រជាធិបតេយ្យកម្ពុជា និងសមាគមសិស្សនិស្សិតបញ្ញាវន្តក្មេងវត្ត បានចេញសេចក្ដីថ្លែងការណ៍ព្រមានលោក សៀ ភារម្យ ឲ្យបញ្ឈប់ការរិះគន់លើគោលនយោបាយរដ្ឋាភិបាល ក្នុងការវាស់វែងដីធ្លី៕
No comments:
Post a Comment
yes