ប្រជាពលរដ្ឋបានបន្តនាំគ្នាផ្តិតមេដៃប្តឹងចូលលោកប្រធានការិយាល័យរ៉ែនិងថាមពលស្រុកស្អាងឲ្យជួយអន្តរាគមន៍
ខេត្តកណ្តាល ៖ ប្រជាពលរដ្ឋ៣នាក់រស់នៅក្នុង ឃុំឃុំត្រើយស្លា ស្រុកស្អាង បានដួលសន្លប់ជាបន្ទាប់កាលពីថ្ងៃទី២៤ ខែកញ្ញា ឆ្នាំ២០១២ ដោយសារតែពុលផ្សែងដែលហុយចេញពីទីតាំងសិប្បកម្មផលិតទឹកកកមួយកន្លែង ដែលមានទីតាំងស្ថិតនៅភូមិលេខ៣ ឃុំឃុំត្រើយស្លា ស្រុកស្អាង។
បន្ទាប់ពីមានហេតុការណ៍ផ្សេងហុយចេញពីទីតាំងខាងលើ បណ្តាលឲ្យមានមនុស្សពុលដួលសន្លប់រួចមក ប្រជាពលរដ្ឋមានទីលំនៅរស់នៅក្បែរទីតាំងសិប្បកម្មផលិតទឹកកកមួយនេះដែលមានម្ចាស់ឈ្មោះ ហ៊ង សុផល ភេទប្រុស អាយុ៤៣ឆ្នាំ បាននាំគ្នាផ្តិតមេដៃដាក់ពាក្យបណ្តឹងចូលប្រធានការិយាល័យរ៉ែ និងថាមពលស្រុកស្អាង ដើម្បីឲ្យជួយធ្វើអន្តរាគមន៍អំពីបញ្ហាបញ្ចេញចំហាយក្តៅ សម្លេងឮខ្លាំង ជាពិសេសបញ្ចេញផ្សែងបណ្តាលឲ្យប្រជាពលរដ្ឋពុលដួលសន្លប់ជាបន្តបន្ទាប់។
យោងតាមពាក្យបណ្តឹងរបស់ប្រជាពលរដ្ឋបានឲ្យដឹងថា សិប្បកម្មផលិតទឹកកករបស់ឈ្មោះ ហ៊ង សុផល ដែលមានទីតាំងស្ថិតក្នុងភូមិលេខ៣ ឃុំត្រើយស្លា ស្រុកស្អាង ខេត្តកណ្តាល នេះបានបើកដំណើរការផលិតទឹកកកអស់រយៈពេលជាច្រើនឆ្នាំមកហើយ ។ កន្លងមកទីតាំងមួយនេះបានធ្វើដំណើរការផលិតទឹកកកទាំងថ្ងៃទាំងយប់ ធ្វើឲ្យលានឮសម្លេងយ៉ាងខ្លាំងរំខាន ដល់ការរស់នៅរបស់ពួគគាត់មួយកម្រិតទៅហើយ។ ស្រាប់តែនៅថ្ងៃទី២៤ ខែមិថុនា ឆ្នាំ២០១២ ម្ចាស់សិប្បកម្មមួយនេះបានបន្ថែមឡដុតអូសមួយទៀត មកប្រើប្រាស់នៅក្នុងទីតាំងសិប្បកម្មដើម្បីធ្វើការផលិតទឹកក បណ្តាលឲ្យសាយភាយនៃចំហាយក្តៅចេញមកក្រៅនិងសម្លេងលានឮខ្លាំង ជាពិសេសផ្សែងខ្មៅយ៉ាងខ្មួលខ្មាញ់បានហុយចេញពីទីតាំងមួយនេះ បង្ករឲ្យប៉ះពាល់ដល់សុខភាពរបស់ពួកគាត់យ៉ាងធ្ងន់ធ្ងរ រហូតឈានដល់ប្រជាពលរដ្ឋខ្លះសម្រេចចិត្តចាកចេញពីផ្ទះខ្លួនឯង រត់ទៅរស់នៅផ្ទះបងប្អូន ។
ក្នុងពាក្យបណ្តឹបានបន្តថា កន្លងមកពួកគាត់បាននាំគ្នាផ្តិតមេដៃនិងធ្វើពាក្យបណ្តឹងប្តឹងចូលទៅអាជ្ញាធរមូលដ្ឋាន រួចមកហើយដើម្បីឲ្យអាជ្ញាធរជួយរកដំណោះស្រាយ។ តែសំណូមពររបស់ពួកគាត់ដែលធ្វើចូលទៅអាជ្ញាធរមូលដ្ឋានកន្លងមកនោះវាហាក់បីដូចជាគ្មានប្រសិទ្ធិភាពសោះជាមួយម្ចាស់សិប្បកម្មផលិតទឹកកកមួយនេះ ដោយម្ចាស់ទីតាំងមួយនេះនៅតែបន្តសកម្មភាពផលិតទឹកកក ធ្វើឲ្យផ្សែងខ្មៅយ៉ាងខ្មួលខ្មាញ់ហុយយ៉ាងទ្រលោមជារៀងរាល់ថ្ងៃ ។
ប្រជាពលរដ្ឋបានបញ្ជាក់ថា កាលពីថ្ងៃទី២៤ ខែកញ្ញា ឆ្នាំ២០១២ មានប្រជាពលរដ្ឋចំនួន៣នាក់ បានពុលក្លិនផ្សែងដែលហុយចេញពីឡដុតអូសនេះ រហូតដល់សន្លប់បាត់បង់ស្មារតី និងខ្លះទៀតពុលក្អួតចង្អោ។ ចំណែកឯប្រជាពលរដ្ឋមួយចំនួនទៀតមានអាការៈក្អក ប្រៀបបីដូចជាមនុស្សកើតរបេងអញ្ចឹងដែរ ដោយសារដែលពុលផ្សេងនេះ។
សូមបញ្ជាក់ កាលពីថ្ងៃទី២ ខែសីហា ឆ្នាំ២០១២ ជំនាញរ៉ែនិងថាមពល និងបរិដ្ឋានស្រុកស្អាង រួមជាមួយអជ្ញាធរមូលដ្ឋាន បានចុះទៅត្រួតពិនិត្យទីតាំងសិប្បកម្មផលិតទឹកកករមួយនេះដែលមានម្ចាស់ឈ្មោះ ហ៊ង សុផល ដែលមានទីតាំងស្ថិតក្នុងភូមិលេខ៣ ឃុំត្រើយស្លា ស្រុកស្អាងម្តងរួចមកហើយ។ តែការចុះមកពិនិត្យពីសំណាក់មន្ត្រីជំនាញខាងលើនេះគ្មានប្រសិទ្ធភាពទៅលើម្ចាស់ទីតាំងមួយនេះឡើយ ពោលគឺម្ចាស់ទីតាំងនៅតែបណ្តែបណ្តោយឲ្យសាយភាយចេញចំហាយក្តៅ និងផ្សែងដដែលជាដដែល។ ដោយម្ចាស់ទីតាំងមិនបានធ្វើការកែសម្រួលម៉ាស៊ីនផលិតទឹកកកនេះឲ្យបានស្រួល ព្រោះម្ចាស់ទីតាំងខ្លាចចំណាយប្រាក់ច្រើនទៅលើការកែសម្រួលម៉ាស៊ីន ដោយមិនខ្វល់ពីការប៉ះពាល់ដល់ប្រជាពលរដ្ឋរស់នៅក្បែរទីតាំងសិប្បកម្មរបស់ខ្លួនឡើយ ៕
No comments:
Post a Comment
yes