ខេត្ដពោធិ៍សាត់ ៖ សត្វពង្រូលចំនួន៥ក្បាលមានទម្ងន់ជាង២០គីឡូក្រាម ត្រូវបានគរបាលសេដ្ឋកិច្ចខេត្ដពោធិ៍សាត់មួយ ក្រុម រួមនឹងភ្នាក់ងារកាសែតក្នុងស្រុកម្នាក់ផង បានស្ទាក់ចាប់ពីរថយន្ដក្រុងអ្នកដំណើរ១គ្រឿង ហើយបានយកសត្វពង្រូលនោះទៅលក់ឱ្យយកលុយចែកគ្នា និងបានយកទូរស័ព្ទដៃពីម្ចាស់សត្វពង្រូលនោះទៀតផង ។
ករណីនេះបានធ្វើឡើងកាលពីវេលាម៉ោង៩យប់ ថ្ងៃទី២៦ ខែកញ្ញា ឆ្នាំ២០១២ លើលើកំណាត់ផ្លូវជាតិលេខ៦ ត្រង់ចំណុចខាងលិចកសិដ្ឋានចិញ្ចិមស្វា ក្នុងភូមិស្រះស្រង់ សង្កាត់ព្រៃញី ក្រុង-ខេត្ដពោធិ៍សាត់ ។
ប្រភពព័ត៌មានបានឱ្យដឹងថា សត្វពង្រូលដឹកតាមរថយន្ដនោះមានចំនួន៥ក្បាល ទម្ងន់ជាង២០គីឡូក្រាម ចំណែកនគរបាលសេដ្ឋកិច្ចដែលចុះចាប់នោះមានឈ្មោះ ធា , ឈ្មោះ យាន , ឈ្មោះ សុខណា , ឈ្មោះ វណ្ណា និងភ្នាក់ងារកាសែតក្នុងស្រុកម្នាក់ ។ ក្រោយពេលចាប់យកសត្វពង្រូលនោះហើយ បក្ខពួកទាំងប៉ុន្មាននាក់ខាងលើបានដឹកម្ចាស់សត្វពង្រូលទៅទម្លាក់ចោលនៅម្ដុំសាលាក្រហម ក្នុងភូមិតាកែវក្រោម ឃុំបឹងកន្ទួត ស្រុកក្រគរ និងដកយកទូរស័ព្ទដៃ២គ្រឿង ។
ប្រភពបានបន្ដទៀតថា ក្រោយពីចាប់យកសត្វពង្រូលរួចហើយ បក្ខពួកនគរបាលសេដ្ឋកិច្ចខេត្ដទាំងនោះបានជិះរថយន្ដ៤គ្រឿង ដឹកសត្វពង្រូលនោះទៅឱ្យអ្នកផ្សេងទៀតយកទៅលក់នៅភ្នំពេញទាំងយប់ ដែលក្នុង១គីឡូក្រាមតម្លៃប្រហែលពី១៥០ទៅ១៨០ដុល្លារ ។
ករណីនគរបាលសេដ្ឋកិច្ចខេត្ដបង្ក្រាបទល្មើសជាក់ស្ដែង ហើយមិនបានប្រគល់វត្ថុតាងឱ្យទៅជំនាញ បែរជាយកទៅធ្វើ អាជីវកម្មខ្លួនឯងនេះ ថ្នាក់លើគួរពិចារណាពីទង្វើរបស់ពួកទាំងនេះផងចុះ ! ៕
No comments:
Post a Comment
yes