ភ្នំពេញ៖សមត្ថកិច្ចអង្គភាពប្រឆាំងអំពើពុករលួយ កាលពីរសៀលថ្ងៃទី៤ ខែកញ្ញា ឆ្នាំ២០១២ បានបញ្ជូនចាងហ្វាងកាសែតពន្លឺសាមគ្គីមកអយ្យការអមសាលាដំបូងរាជធានីភ្នំពេញ ដើម្បីសាកសួរករណីបរិហារបង្កាច់កេរអ្នកដទៃ តាមរូបភាពកាត់ឯកសារមកផ្គុំរួចថតចម្លង ហើយយកទៅរៀបចំពាក្យបណ្តឹងដាក់ទៅតាមស្ថាប័នមួយចំនួន ដើម្បីប្តឹងអ្នកដទៃដោយគ្មានមូលហេតុអ្វីទាំងអស់។
ចាងហ្វាងកាសែតរូបនេះឈ្មោះហង្ស ចំរើន ហៅហង្ស សាខន ភេទប្រុស អាយុ៤៧ឆ្នាំ មានទីលំនៅភូមិព្រៃរងៀង ឃុំស្គុះ ស្រុកសំរោងទង ខេត្តកំពង់ស្ពឺ បានត្រូវសមត្ថកិច្ចអង្គភាពប្រឆាំងអំពើពុករលួយឃាត់ខ្លួនកាលពីព្រឹកថ្ងៃទី៤ ខែកញ្ញា ឆ្នាំ២០១២ នៅទឹកដីខេត្តកំពង់ស្ពឺ រួចបញ្ជូនមកសាលាដំបូងរាជធានីភ្នំពេញ នៅរសៀលថ្ងៃដដែល។
ប្រភពពីមន្ត្រីក្រសួងព័ត៌មានបានឱ្យដឹងថា កាសែតពន្លឺសាមគ្គីនេះបានដំណើរការចាប់តាំងពីឆ្នាំ២០០៥ រហូតមកទល់ពេលនេះ គ្រាន់តែពុំសូវចេញផ្សាយជាប់លាប់ ហើយមិនដែល យកមកតម្កល់ទុកជាឯកសារនៅក្រសួងព័ត៌មានទេ។តាមប្រភពមួយបានបញ្ជាក់ថា កាលពីឆ្នាំ២០១១កន្លងទៅចាងហ្វាងកាសែតរូបនេះ បានតាំងខ្លួនជាដើមបណ្តឹងដើរដាក់ពាក្យបណ្តឹងដែលមានកម្មវត្ថុប្តឹងមន្ត្រីរាជការមួយចំនួនដែលមានមុខមាត់តាមស្ថាប័នមួយចំនួនដូចជា តុលាការក្រសួងមហាផ្ទៃ ក្រសួងព័ត៌មាន និង ក្រសួងមួយចំនួនទៀត។
បន្ទាប់មក ចាងហ្វាងកាសែតរូបនេះបានចេញមុខសម្ភាសន៍ចុះផ្សាយក្នុងសារព័ត៌មានមួយចំនួន សំដៅបង្ខូចកេរឈ្មោះមន្ត្រីរាជការទាំងនោះ ដូច្នេះហើយទើបជនរងគ្រោះទាំងអស់ដាក់ពាក្យបណ្តឹងមកសមត្ថកិច្ច ដើម្បីស្រាវជ្រាវករណីនេះ រួចឈានដល់ឃាត់ខ្លួនចាងហ្វាងកាសែតរូបនេះតែម្តង៕
No comments:
Post a Comment
yes