អតីតដីចំណតយន្តហោះនៅស្រុកសៀមប៉ាង ខេត្តស្ទឹងត្រែង ដែលអាជ្ញាធរគ្រោងទុកធ្វើជាតំបន់អភិវឌ្ឍន៍ទីរួមស្រុក រហូតបច្ចុប្បន្នមានសេចក្តីរាយការណ៍ថា ត្រូវបានគេបែងចែកជាដីឡូត៍លក់ជាលក្ខណៈឯកជន និងចែកទៅឲ្យបុគ្គលជាមន្ត្រីរាជការអស់មួយចំណែកធំហើយ។
ប្រជាពលរដ្ឋនៅស្រុកសៀមប៉ាង ខេត្តស្ទឹងត្រែង នៅថ្ងៃចន្ទ ទី២៤ ខែកញ្ញា ឆ្នាំ២០១២ អំពាវនាវឲ្យអាជ្ញាធរខេត្តស៊ើបអង្កេតទៅលើភាពមិនប្រក្រតីនៃការបែងចែក និងលក់ដីតំបន់អភិវឌ្ឍន៍ស្រុកទៅឲ្យឯកជន។
ប្រជាពលរដ្ឋរស់នៅឃុំសេកុង ស្រុកសៀមប៉ាង មួយរូបសុំមិនឲ្យបញ្ចេញឈ្មោះ មានប្រសាសន៍ឲ្យដឹងថា មានប្រជាពលរដ្ឋជាង ១០គ្រួសារបានទៅសាងសង់ផ្ទះ និងមានប្រជាពលរដ្ឋប្រមាណ ២០ម្ចាស់ទៀត បានទទួលលិខិតប្រគល់ដីពីអាជ្ញាធរស្រុក លើដីតំបន់អភិវឌ្ឍន៍នោះ។
ប្រជាពលរដ្ឋដដែលនោះបានបន្តថា មន្ត្រីរាជការសាលាស្រុកសៀមប៉ាង និងប្រជាពលរដ្ឋមួយចំនួនធំ កំពុងព្រួយបារម្ភថា ដីតំបន់អភិវឌ្ឍន៍នោះនឹងក្លាយទៅជាកម្មសិទ្ធិឯកជនអស់ ប្រសិនអាជ្ញាធរខេត្តមិនមានវិធានការទប់ស្កាត់ករណីលក់ដូរដីធ្លីទ្រព្យសម្បត្តិរដ្ឋនោះទេ៖ «ដីហ្នឹង ដីរដ្ឋទាំងអស់ ដីប្រលានយន្តហោះ ដីសម្រាប់ទីទួលសុវត្ថិភាព នៅពេលទឹកជំនន់ ប្រជាពលរដ្ឋអាចទៅរស់នៅលើទឹកដីហ្នឹងបាន។ មន្ត្រីធំៗនៅក្នុងស្រុកហ្នឹងហើយដែលគេបង្កើតកម្មវិធីវាស់ដីកន្លែងហ្នឹង ចែកចាយគ្នា ហើយលក់ឲ្យប្រជាពលរដ្ឋ»។
អតីតដីចំណតយន្តហោះនៅស្រុកសៀមប៉ាង ខេត្តស្ទឹងត្រែង មានប្រវែងជាង ៤គីឡូម៉ែត្រ និងទទឹងជាង ៣០០ម៉ែត្រ កសាងតាំងពីសម័យសង្គមរាស្ត្រនិយម សម្រាប់យន្តហោះធុនតូចចុះចត ជាពិសេស សម័យអាជ្ញាធរបណ្ដោះអាសន្នអង្គការសហប្រជាជាតិ (អ៊ុនតាក់=UNTAC) ក៏បានប្រើប្រាស់ចំណតយន្តហោះនេះសម្រាប់ចុះចតយន្តហោះក្នុងបេសកកម្មរៀបចំសន្តិភាពនៅប្រទេសកម្ពុជា ដែរ។
ប្រជាពលរដ្ឋរស់នៅស្រុកសៀមប៉ាង ឲ្យដឹងថា ចាប់ពីក្រោយថ្ងៃរំដោះ ៧មករា ឆ្នាំ១៩៧៩ ប្រជាពលរដ្ឋដែលចូលមករស់នៅតំបន់ជិតនោះ បានប្រើប្រាស់ចំណតយន្តហោះស្រុកសៀមប៉ាង ធ្វើជាទីទួលសុវត្ថិភាពពេលមានទឹកជំនន់ ហើយអាជ្ញាធរស្រុកក៏ត្រៀមទុកដីនោះសម្រាប់អភិវឌ្ឍន៍សាងសង់ជាទីរួមស្រុកថ្មីទៀតផង។
មេឃុំសេកុង លោក ចាន់ សុខា ទទួលស្គាល់ថា ពិតជាមានប្រជាពលរដ្ឋទៅសាងសង់ផ្ទះនៅតំបន់អភិវឌ្ឍន៍នោះមែន ដោយសារមានការឯកភាពពីអាជ្ញាធរមូលដ្ឋាន។ ក៏ប៉ុន្តែ លោកបដិសេធមិនធ្វើអត្ថាធិប្បាយលំអិតពីមូលហេតុនៃការអនុញ្ញាតនោះទេ ហើយលោកជំរុញឲ្យសួរបញ្ហានេះទៅលោកអភិបាលស្រុកវិញ៖ «ទាំងអស់គ្នាហ្នឹង ហើយគេឲ្យសាងសង់តាមផ្លូវណា! គេស្នើសុំពីថ្នាក់ជាតិហើយ។ អញ្ចេះ ខ្ញុំមិនសូវច្បាស់ទាក់ទងទៅអភិបាលស្រុកណា!»។
អភិបាលស្រុកសៀមប៉ាង លោក ស៊ី សួន បដិសេធសេចក្តីចោទប្រកាន់ទាំងអស់នោះ។ លោកឆ្លើយបំភ្លឺថា អតីតដីប្រលានយន្តហោះនោះ គឺអតីតអាជ្ញាធរស្រុកអាណត្តិមុន បានគ្រោងធ្វើជាតំបន់រដ្ឋបាលស្រុក និងបានបែងចែកជូនមន្ត្រីរាជការ ហើយបន្តមកដីនោះបានផ្ទេរបន្តពីប្រជាពលរដ្ឋម្នាក់ទៅម្នាក់តែប៉ុណ្ណោះ។
ចំណែកអភិបាលខេត្តស្ទឹងត្រែង លោក ឡូយ សុផាត បដិសេធថា អាជ្ញាធរខេត្តមិនមានគោលការណ៍ឲ្យបែងចែក ឬលក់ដីនោះទេ៖ «ទេ! ខ្ញុំដូចអត់មានគោលការណ៍អ្វីផង។ ចាំមើលខ្ញុំសួរសិន ព្រោះអត់ទាន់បានទទួលព័ត៌មានពីការបែងចែក»។
ប្រភពមន្ត្រីក្រុមប្រឹក្សាស្រុកសៀមប៉ាង មួយរូបសុំមិនឲ្យបញ្ចេញឈ្មោះបានបញ្ជាក់ថា កាលពីដើមឆ្នាំ២០១២ មន្ត្រីក្រុមប្រឹក្សាស្រុក បានប្រជុំអនុម័តស្នើសុំទៅក្រសួងមហាផ្ទៃ លក់ដីទីតាំងសាលាស្រុកបច្ចុប្បន្ន ដើម្បីយកប្រាក់ទៅសាងសង់សាលាស្រុកថ្មីលើដីអភិវឌ្ឍន៍របស់ស្រុក ក៏ប៉ុន្តែ មិនទាន់ឃើញមានលិខិតឆ្លើយតបបែបណាពីមន្ត្រីក្រសួងមហាផ្ទៃ ទាក់ទិនការស្នើសុំនោះទេ។
យ៉ាងនេះក្តី មន្ត្រីស្រុកសៀមប៉ាង ដដែលឲ្យដឹងថា ដីតំបន់អភិវឌ្ឍន៍ស្រុកដែលប្រជាពលរដ្ឋទៅតាំងទីលំនៅ ត្រូវគេបែងចែកជាដីឡូត៍លក់តម្លៃប្រមាណពី ១ពាន់ដុល្លារទៅ ៣ពាន់ដុល្លារ ហើយដីមួយចំណែកទៀត ត្រូវគេចែកទៅឲ្យមន្ត្រីស្រុក ដែលមានបក្ខពួកតែប៉ុណ្ណោះ៕
No comments:
Post a Comment
yes