ទិដ្ឋភាពនៃចរាចរណ៍កកស្ទះ នៅតាមផ្លូវត្រឡែងកែងមួយ ក្នុងរាជធានីភ្នំពេញ
ភ្នំពេញៈ កាកបាទក្រហមកម្ពុជា និងគណៈកម្មាធិការជាតិសុវត្ថិភាពចរាចរណ៍ផ្លូវគោក ពីម្សិលមិញ បានធ្វើការផ្សព្វផ្សាយអំពីលទ្ធផលនៃដំណើរការធ្វើច្បាប់ចរាចរណ៍ ផ្លូវគោកថ្មី ទៅកាន់មនុស្សច្រើនជាង១០០នាក់ មកពីវិស័យឯកជន អង្គការសង្គមស៊ីវិលជាតិ អន្តរជាតិ ដើម្បីស្វែងរកការគាំទ្រមតិទៅលើសេចក្តីព្រាងច្បាប់ថ្មីនេះ ឲ្យមានលក្ខណៈពេញលេញនិងឆាប់បានបញ្ជូនទៅកាន់រដ្ឋសភាជាតិ។
លោក ស្រី ពុំ ចន្ទីនី អគ្គលេខាធិការកាកបាទក្រហមកម្ពុជាបានថ្លែងនៅក្នុងសិក្ខាសាលា នៅសណ្ឋាគារភ្នំពេញ កាលពីថ្ងៃពុធថា ដោយមើលឃើញកំណើនស្ថានភាពគ្រោះថ្នាក់ចរាចរណ៍ជារៀងរាល់ឆ្នាំ កាកបាទក្រហមកម្ពុជានិងអង្គការដៃគូបានបង្កើតសកម្មភាពថ្មីមួយ ទៀតនៅឆ្នាំ២០១២នេះ ដើម្បីស្វែងរកការគាំទ្រមតិក្នុងការជំរុញឲ្យច្បាប់ចរាចរណ៍ផ្លូវ គោកថ្មី បានទទួលការគាំទ្រពីគ្រប់អង្គភាព។
លោកស្រីបន្ត ថា ជាច្រើនឆ្នាំមកនេះកាកបាទក្រហមកម្ពុជាបានចំណាយថវិកាទៅលើ សកម្មភាពជាច្រើន ដូចជាយុទ្ធនាការអប់រំស្តីពីសុវត្ថិភាពចរាចរណ៍នៅតាមផ្លូវ សាធារណៈ បើកវគ្គបណ្តុះបណ្តាល ផលិតជាសម្ភារ ដូចជា ខិត្តប័ណ្ណ ផូស្ទ័រអប់រំ ប៉ាណូ បដានិងទិញមួកសុវត្ថិភាពផងដែរ។
លោកស្រី ថ្លែងថា៖ «ខ្ញុំសូមអំពាវនាវជាបន្តទៀតដល់គ្រប់បណ្តាអង្គភាព ដែលមានប្រធានឬតំណាងក្រសួងស្ថាប័ន អង្គការសង្គមស៊ីវិល និងវិស័យឯកជន មេត្តាបន្តគាំទ្រថែមទៀត ហើយខ្ញុំសង្ឃឹមថា ច្បាប់ចរាចរណ៍ថ្មីនេះនឹងឆាប់ទទួលបានការគាំទ្រ ឯក-ភាពពីរដ្ឋាភិបាល រដ្ឋសភា ព្រឹទ្ធសភា និងព្រះមហាក្សត្រ ដើម្បីឆាប់បានដាក់ឲ្យប្រើប្រាស់ប្រកបដោយប្រសិទ្ធភាពខ្ពស់»។
ច្បាប់ចរាចរណ៍ផ្លូវគោកកម្ពុជា បានឡាយព្រះហស្ដលេខា នាថ្ងៃទី៨ ខែកុម្ភៈ ឆ្នាំ២០០៧ នឹងដាក់ឲ្យអនុវត្ត ពីថ្ងៃទី១១ ខែកញ្ញា ឆ្នាំ២០០៧ ប៉ុន្តែ ដោយសារការខ្វះចន្លោះខ្លះ មិនទាន់តម្រូវឲ្យអ្នករួមដំណើរតាមម៉ូតូពាក់មួកសុវត្ថិភាព ទើបអ្នកប្រើប្រាស់ម៉ូតូបានស្លាប់រហូតដល់ទៅ ៦៧ភាគរយនៃអ្នកស្លាប់សរុប។ ដោយសារតែស្ថានភាពគ្រោះថ្នាក់ចរាចរណ៍មានសភាពបែបនេះ ទើបរដ្ឋាភិបាលស្នើឲ្យរៀបចំកែទម្រង់ច្បាប់ចរាចរណ៍បន្ថែមទៀត។
លោក ពៅ ម៉ាលី អគ្គលេខាធិការរងនៃគណៈកម្មាធិការជាតិសុវត្ថិភាពចរាចរណ៍ផ្លូវគោក បានឲ្យដឹងថា ក្រសួងសាធារណការនិងដឹកជញ្ជូន បានសហការជាមួយក្រសួង ស្ថាប័នពាក់ព័ន្ធ បានរៀបចំសេចក្តីព្រាងច្បាប់ចរាចរណ៍ផ្លូវគោកថ្មី ដែលចេញពីការធ្វើវិសោធនកម្មច្បាប់ចរាចរណ៍ចាស់លើមាត្រាសំខាន់ៗ ៣៤ មាត្រា និងបានបន្ថែមមាត្រាថ្មី៦មាត្រា។ លោកបន្តថា ការតាក់តែងច្បាប់ថ្មីនេះឡើង គឺដើម្បីឆ្លើយតបនឹងស្ថានភាពគ្រោះថ្នាក់ចរាចរណ៍បច្ចុប្បន្ន ដែលបណ្តាលមកពីការមិនពាក់មួកសុវត្ថិភាពពេលធ្វើដំណើរតាមម៉ូតូ ការបើកបរល្បឿនហួសកំណត់ ការបើកបរដោយអាការស្រវឹង..។ ច្បាប់ចរាចរណ៍ថ្មីនេះបានត្រួតពិនិត្យជិតរួចហើយ នៅសល់តែ២-៣មាត្រា ប៉ុណ្ណោះ ដែលនៅចុងសប្តាហ៍ក្រោយនឹងបញ្ចប់រួចរាល់ទាំងស្រុង។
លោកថា ៖ «ការត្រួតពិនិត្យមាត្រានៃសេចក្តីព្រាងច្បាប់ថ្មីនេះ អាចនឹងចប់ជាស្ថាពរ និងដាក់ចូលទៅរដ្ឋសភា គឺអាចនៅឆ្នាំក្រោយនេះ ព្រោះការកសាងច្បាប់ថ្មី យើងមិនចេះតែធ្វើឲ្យតែបាននោះទេ ត្រូវធ្វើការត្រួតពិនិត្យច្រើនលើកណាស់ ដោយសារថា នេះជាច្បាប់ដ៏សំខាន់មួយពាក់ព័ន្ធនឹងបណ្តាប្រទេសអាស៊ាននិង នៅលើពិភពលោក»។
ក្នុងអង្គសិក្ខាសាលានេះ មន្ត្រីកាកបាទក្រហមកម្ពុជា ក្រុមហ៊ុនឯកជន អង្គការសង្គមស៊ីវិលនានា បានធ្វើការប្តេជ្ញាចិត្តរួបរួមគ្នា ដើម្បីជំរុញឲ្យរដ្ឋាភិបាលរៀបចំច្បាប់ចរាចរណ៍ផ្លូវគោកថ្មីនេះ ឲ្យបានឆាប់រហ័សសំដៅកាត់បន្ថយអត្រាស្លាប់ របួស និងពិការភាព ដោយសារគ្រោះថ្នាក់ចរាចរណ៍ក្នុងពេលបច្ចុប្បន្ន។
យោងតាម របាយការណ៍របស់អគ្គស្នងការដ្ឋាននគរបាលជាតិបានឲ្យដឹងថា នៅក្នុងរយៈពេល៦ខែដើមឆ្នាំ២០១២នេះ មានករណីគ្រោះថ្នាក់ចរាចរណ៍កើតឡើង មានចំនួន២៤៥៣លើក ក្នុងនោះ មានស្លាប់មនុស្សចំនួន ១០៦៧នាក់ និងរបួសធ្ងន់ចំនួន ២៥០៥នាក់។ ចំនួននេះមានការថយចុះ ៤៩២ លើក បើធៀបនឹងរយៈពេលដូចគ្នាពីឆ្នាំ២០១១ រីឯករណីស្លាប់ថយចុះ៣៣នាក់ របួសធ្ងន់ថយចុះ៤១៨នាក់៕
No comments:
Post a Comment
yes