ច្រាំងទន្លេមេគង្គ នៅភូមិកោះប្រាក់ ទើបតែបាក់ថ្មីៗ
ភ្នំពេញៈ រដ្ឋាភិបាល បានផ្តល់អាជ្ញាប័ណ្ណ ទៅឲ្យក្រុមហ៊ុនចំនួន ៣ ក្នុងចំណោមក្រុមហ៊ុនចំនួន ៩ ដែលបានដាក់ការដេញថ្លៃ ធ្វើការស្តារទន្លេមេគង្គដើម្បីសម្រួលដល់ការធ្វើនាវាចរណ៍ តាមដងទន្លេ។
លោក លឹម គានហោ រដ្ឋមន្រ្តីក្រសួងធនធានទឹក បានប្រាប់ភ្នំពេញ ប៉ុស្តិ៍ កាលពីថ្ងៃអង្គារ៍ថា ជាសរុប មានក្រុមហ៊ុនចំនួន ៩ បានដាក់ការដេញថ្លៃ លើគម្រោងទាំងនេះ ហើយក្រុមហ៊ុន ៣ ត្រូវបានជ្រើសរើសយក។
លោក បានថ្លែងថា ក្រសួងនឹងដើរតួនាទីសំខាន់ ក្នុងការគ្រប់គ្រងគម្រោងទាំងនេះ។ លោក បានគូសបញ្ជាក់ថា៖ «ខ្ញុំជឿថា នឹងមិនមានបញ្ហាអ្វីទេ ពីព្រោះថា ការធ្វើវានេះ ក្រសួងធនធានទឹក ជាអ្នកគ្រប់គ្រង ទៅលើបច្ចេកទេស»។ លោកបន្តថា៖ «ប្រសិនបើក្រុមហ៊ុនមិនស្តាប់យើង យើងនឹងយកប្រាក់កក់របស់ពួកគេ»។
លោក ប៊ុន ហ៊ាន រដ្ឋលេខាធិការក្រសួងធនធានទឹក និងឧតុនិយម បានមានប្រសាសន៍កាលពីម្សិលមិញថា ការស្តារទន្លេនេះ គឺធ្វើឡើង ទៅតាមសំណើរបស់កំពង់ផែស្វយ័ត្នភ្នំពេញ ដែលបានស្នើសុំឲ្យមានការស្តារទន្លេ ដើម្បីសម្រួលដល់ការធ្វើនាវាចរណ៍។ លោកបានមានប្រសាសន៍ថា នៅពេលស្តារទន្លេ ក្រុមហ៊ុន មិនមែនបូមយកតែខ្សាច់នោះទេ គឺគេត្រូវបូមយកទាំងអស់រួមទាំងដីល្បាប់ផងដែរ។ លោកបានគូសបញ្ជាក់ថា៖ «ក្រុមហ៊ុន ត្រូវបូមយកទាំងអស់ នៅលើផ្លូវទឹក ដែលយើងកំណត់ឲ្យធ្វើនៅក្នុងដំណើការស្តារទន្លេនេះ។ ជាធម្មតា ឲ្យតែធ្វើការស្តារ វាតែងតែមានទាំងភក់និងដីខ្សាច់ហើយ។ ប៉ុន្តែកាលពីគ្រាកន្លងមក ក្រុមហ៊ុនបូមយកតែដីខ្សាច់ប៉ុណ្ណោះ»។ លោកប៊ុន ហ៊ាន បានបន្ថែមទៀតថា ការស្តារទន្លេនេះ គឺដើម្បីធ្វើឲ្យទន្លេមានទឹកជ្រៅ ងាយស្រួលឲ្យកប៉ាល់ធ្វើការបើកបរ។
លោកបានឲ្យដឹងទៀតថា ការស្តារទន្លេនេះ គឺត្រូវធ្វើ ចាប់ពីទន្លេមេគង្គលើ រហូតដល់ទន្លេមេគង្គក្រោម។ ទន្លេមេគង្គក្រោម មានចំនួនពី៧ ទៅ ៨ កន្លែង។ ចំណែកនៅទន្លេមេគង្គលើមានចំនួន ៤ កន្លែង។
តំណាង ក្រុមបរិស្ថាន ដែលត្រូវបានទាក់ទងកាលពីថ្ងៃអង្គារ មិនបានដឹងអំពីការផ្តល់អាជ្ញាប័ណ្ណ លើការស្តារទន្លេនេះទេ ហើយបានបដិសេធ មិនព្រមធ្វើអត្ថាធិប្បាយឡើយ។
លោក សុន ឆ័យ តំណាងរាស្រ្តគណបក្ស សម រង្ស៊ី ដែលតែងតែតាមឃ្លាំមើលពីបញ្ហាបរិស្ថាន បានថ្លែងថា មុនពេលរដ្ឋាភិបាល អនុញ្ញាតឲ្យក្រុមហ៊ុនណាមួយ ធ្វើការស្តារទន្លេ រដ្ឋាភិបាល ត្រូវតែធ្វើការវាយតម្លៃ ពីផលប៉ះពាល់បរិស្ថានឲ្យបានស៊ីជម្រៅតាមរយៈគណៈកម្មាធិការឯករាជ្យមួយ។ លោកបានមានប្រសាសន៍ថា បើមិនដូច្នោះទេ ការស្តារទន្លេ ដោយមានទាំងការបូមខ្សាច់នោះ នឹងធ្វើបាក់ច្រាំងទន្លេ ប៉ះពាល់ដល់ដីធ្លីរបស់ប្រជាជន ដែលរស់នៅតាមបណ្តោយច្រាំងទន្លេ។
យ៉ាងណាក៏ដោយ លោក សុន ឆ័យ បានបន្តទៀតថា៖ «មានការអនុវត្តនីតិវិធីផ្តល់សិទ្ធិទាំងនេះ បានប្រសើរជាងមុន ប៉ុន្តែខ្ញុំមិនជឿថា វានឹងមិនប៉ះពាល់ដល់បរិស្ថាននោះទេ»៕
No comments:
Post a Comment
yes