កំណត់ឈើដែលសហគមន៍ព្រៃឈើរកឃើញពេលធ្វើយុទ្ធនាការលើកមុន
បណ្តាញសហគមន៍ព្រៃឡង់ដែលមានអ្នកចូលរួមប្រមាណ៥០០នាក់មកពីខេត្ត ព្រះវិហារ កំពង់ធំ ស្ទឹងត្រែង និងក្រចេះ នឹងបើកយុទ្ធនាការទប់ស្កាត់បទល្មើសព្រៃឈើ ទ្រង់ទ្រាយធំមួយទៀត ចាប់ពីថ្ងៃទី១៤ ដល់ថ្ងៃទី១៧ ខែកញ្ញា ឆ្នាំ២០១២។
គោលបំណងសំខាន់នៃការធ្វើយុទ្ធនាការនេះ គឺដើម្បីទប់ស្កាត់ និងបញ្ឈប់បទល្មើសកាប់បំផ្លាញព្រៃឈើ និងដើម្បីប្រមូលភស្តុតាងបទល្មើសព្រៃឈើដាក់ជូនរាជរដ្ឋាភិបាលកម្ពុជា នៅចុងខែកញ្ញាឆ្នាំ២០១២នេះ។
យោងតាមសេចក្តីប្រកាសព័ត៌មានបានឲ្យដឹង បច្ចុប្បន្ននេះ សកម្មភាពកាប់ព្រៃឈើ និងការរុករានកាប់ព្រៃយកដីខុសច្បាប់កំពុងកើតមានជាអនាធិបតេយ្យយ៉ាងខ្លាំងក្លានៅតំបន់ព្រៃឡង់ ទន្ទឹមគ្នានឹងក្រុមហ៊ុនព្រៃសម្បទានសេដ្ឋកិច្ចជាច្រើន ដែលកំពុងចូលលុកលុយក្នុងតំបន់ព្រៃឡង់ផងដែរ ទោះបីជាបណ្តាញសហគមន៍ព្រៃឡង់បានខិតខំធ្វើការតវ៉ា និងចុះទប់ស្កាត់ជាច្រើនលើកមកហើយក្តី។
សេចក្តីប្រកាសព័ត៌មានបានបញ្ជាក់ថា ប្រជាពលរដ្ឋសហគមន៍ព្រៃឡង់ នឹងធ្វើដំណើរតាមម៉ូតូជិត ៣០០គ្រឿង ទៅកន្លែងសំខាន់ៗដែលកំពុងមានការកាប់បំផ្លាញនិងឈូសឆាយព្រៃឈើដែលក្នុងនោះមានតំបន់ទូកមាសនិងតំបន់ប្រាំនៅជាប់ព្រំប្រទល់ខេត្តព្រះវិហារ និងស្ទឹងត្រែង តំបន់អូក្រាក់ក្នុងខេត្តក្រចេះ និងតំបន់ក្បាលទឹកថ្លាក្នុងខេត្តកំពង់ធំ។
ព្រៃឡង់ជាប្រភពនៃអនុផលព្រៃឈើយ៉ាងសំខាន់សម្រាប់ប្រជាពលរដ្ឋភាគច្រើនជាជនជាតិភាគតិចប្រមាណជាង៦០០០០គ្រួសារក្នុងភូមិជិត៤០០ភូមិដែលស្ថិតនៅក្នុងខេត្តព្រះវិហារ កំពង់ធំ ស្ទឹងត្រែង និងក្រចេះដែលអ្នកខ្លះប្រកបរបរបោចវល្លិ៍ រកជ័រ និងបេះផ្លែឈើលក់ចិញ្ចឹមជីវិត។ ទន្ទឹមនឹងនេះ ព្រៃឡង់ជាជម្រកជីវសាស្រ្តចម្រុះច្រើនប្រភេទក៏ដូចជាជួយទប់ស្កាត់គ្រោះធម្មជាតិ និងជួយស្រូបយកឧស្ម័នកាបូនិកដើម្បីកាត់បន្ថយការប្រែប្រួលអាកាសធាតុទៀតផង។
No comments:
Post a Comment
yes