ក្រុមជនសង្ស័យជួញដូរនិងប្រើប្រាស់ថ្នាំញៀនដែលឃាត់ខ្លួននៅខណ្ឌទួលគោក
ភ្នំពេញៈ សមត្ថកិច្ចនគរបាលប្រឆាំងគ្រឿងញៀនរាជធានីភ្នំពេញ បានចាប់ខ្លួនអ្នកជួញដូរនិងប្រើប្រាស់គ្រឿងញៀនបានចំនួន២២នាក់ កាលពីយប់ថ្ងៃ១៩ ខែកញ្ញានៅក្នុងទីតាំងចំនួន៤កន្លែងផ្សេងគ្នា ក្នុងខណ្ឌចំនួនបីនៅក្នុងរាជធានីភ្នំពេញ ក្រោយពីសមត្ថកិច្ចបានធ្វើការស៊ើបអង្កេតតាមដាន អស់រយៈពេលជាងពីរខែកន្លងមក។
លោក ទៀង ច័ន្ទខន្តិសារ ប្រធានការិយាល័យនគរបាលប្រឆាំងគ្រឿងញៀនរាជធានីភ្នំពេញបានថ្លែងថា កម្លាំងសមត្ថកិច្ចលោក និងលោក ខៀវ ផល្លា ព្រះរាជអាជ្ញារងអមសាលាដំបូងរាជធានីភ្នំពេញ សហការជាមួយសមត្ថកិច្ចមូលដ្ឋាន បានចុះឆែកឆេរ និងឃាត់ខ្លួនបានអ្នកចែកចាយនិងប្រើប្រាស់ថ្នាំញៀនខុសច្បាប់បានចំនួន២២នាក់ នៅក្នុងខណ្ឌទួលគោក ខណ្ឌឫស្សីកែវ និង ខណ្ឌសែនសុខ។ លោកថា ក្រុមជនសង្ស័យមានបណ្តាញទំនាក់ទំនងគ្នាស្អិតល្មួត នៅក្នុងការចែកចាយ និងប្រើប្រាស់គ្រឿងញៀនយ៉ាងសកម្មនៅក្នុងរាជធានីភ្នំពេញ។
លោកបន្តថា ក្រុមជនសង្ស័យត្រូវបានចាប់ខ្លួន ក្រោយពីមានការតាមដាន និងស៊ើបអង្កេតរបស់កម្លាំងជំនាញ និងមានកិច្ចសហការពីអាជ្ញាធរមូលដ្ឋាន អស់រយៈពេលជិត២ខែកន្លងមកហើយ ទើបឈានដល់ការចាប់ខ្លួនបាននៅពេលនេះ នៅទីកន្លែងខុសៗគ្នា ដែលនៅកន្លែងខ្លះពួកគេកំពុងសេពគ្រឿងញៀន និងកន្លែងខ្លះទៀតកំពុងតែធ្វើសកម្មភាពចែកចាយថ្នាំញៀននេះតែម្តង។
លោកបន្ថែមថា ក្នុងចំណោម២២នាក់ ដែលបានឃាត់ខ្លួន មានស្ត្រី៣នាក់ ដែលពួកគេមានអាយុចន្លោះ១៨ឆ្នាំទៅដល់ប្រហែល៤០ឆ្នាំ។
លោកបញ្ជាក់ថា៖ « ក្រោយការចាប់ខ្លួន ពួកគេត្រូវបានបញ្ជូនមកកាន់ការិយាល័យនគរបាលប្រឆាំងគ្រឿងញៀនរាជធានីភ្នំពេញ។ យើងកំពុងធ្វើការសាកសួរពួកគេ។ ជាបឋម យើងរកឃើញអ្នកចែកចាយ និងជួញដូរចំនួន៧នាក់ ពីក្នុងចំណោមពួកគេទាំងអស់ ហើយក៏មានអ្នកប្រើប្រាស់ និងអ្នកពាក់ព័ន្ធនឹងករណីនេះមួយចំនួនថែមទៀត»។
លោកច័ន្ទខន្តិសារ បាននិយាយថា ពួកគេនឹងត្រូវបញ្ជូនខ្លួនទៅកាន់តុលាការតាមនីតិវិធីនៅពេលឆាប់ៗខាងមុខនេះ ក្រោយការសាកសួរចប់ ប៉ុន្តែក្នុងចំណោមពួកគេនោះ មានអ្នកខ្លះមានដីកាពីតុលាការចាប់ខ្លួនផងដែរ។
លោកបញ្ជាក់ថា នៅក្នុងយុទ្ធនាការបង្រ្កាបនោះសមត្ថកិច្ចរកឃើញគ្រឿងញៀនបីប្រភេទ ម៉ាទឹកកកមួយចំនួន ម្សៅពណ៌សមួយចំនួន និងថ្នាំយ៉ាម៉ាគ្រាប់ ព្រមទាំងឧបករណ៍ជក់ ឧបករណ៍កែច្នៃ និងជញ្ជីងសម្រាប់ថ្លឹងផងដែរ៕
No comments:
Post a Comment
yes