វិបត្តិ​ធនាគារ​នៅ​វៀតណាម កាន់​តែ​ធ្ងន់ធ្ងរ

សាខា​ធនាគារ Asia Commercial Bank នៅ​ទី​ក្រុង​ហាណូយ​​

ក្រុង​ហាណូយៈ ប្រធាន​ធនាគារ Asia Commercial Bank (ACB) និង​មន្ត្រី​ប្រតិបត្តិ​ពីរ​រូប​ផ្សេង​ទៀត បាន​លាលែង​ចេញ​ពី​តំណែង ខណៈ​ធនាគារ​របស់​វៀតណាម​មួយ​នេះ កំពុង​ប្រឈម​នឹង​ការ​ស៊ើប​អង្កេត​របស់​នរគបាល​ ដែល​ករណី​នេះ បាន​ទម្លាក់​ថ្លៃ​ភាគ​ហ៊ុន​របស់​វៀតណាម ដោយ​សារ​ក្តី​បារម្ភ​ថា ការ​ស៊ើប​អង្កេត​នេះ អាច​ប៉ះពាល់​យ៉ាង​ធ្ងន់ធ្ងរ​ដល់​ឧស្សាហកម្ម​ហិរញ្ញវត្ថុ​។

ធនាគារ ACB ដែល​ជា​ធនាគារ​ធំ​ជាង​គេ​របស់​វៀតណាម និង​មិន​មែន​ជា​កម្មសិទ្ធិ​របស់​រដ្ឋាភិបាល​ បាន​ឲ្យ​ដឹង​ថា លោក​ប្រធាន Tran Xuan Gia  និង​អនុប្រធាន​ពីរ​នាក់​ទៀត​របស់​លោក បាន​អនុម័ត​លើ​ការ​ដាក់​ប្រាក់​បញ្ញើ​ចំនួន ៧១៨​លាន​ដុង ​(៣៤​លាន​ដុល្លារ) ​នៃ​មូលនិធិ​របស់​ធនាគារ​នៅ​ក្នុង​ធនាគារ​ផ្សេង​ទៀត។ ធនាគារ​ ACB បាន​ឲ្យ​ដឹង​ក្នុង​សេចក្តី​ថ្លែង​ការណ៍ មួយ​កាល​ពី​ថ្ងៃ​ពុធ​ថា ក្រុម​ប្រឹក្សា​ភិបាល​ធនាគារ​ បាន​យល់​ស្រប​នឹង​ការ​លា​លែង​ចេញ​ពី​តំណែង​របស់​មន្ត្រី​ធនាគារ​ទាំង​នោះ​កាល​ ពី​ថ្ងៃ​ទី ១៨ ខែ​កញ្ញា។

ភាគ​ហ៊ុន​នៅ​លើ​សន្ទស្សន៍​ហ៊ុន​គោល​របស់​វៀតណាម បាន​ធ្លាក់​ចុះ ដោយ​ធ្វើ​ឲ្យ​ភាគ​ហ៊ុន​របស់​វៀតណាម​បន្ត​រហូត​ដល់​១១​ភាគ​រយ គិត​ចាប់​ពី​មន្ត្រី​នគរបាល​បាន​ឃាត់​ខ្លួន​លោក Nguyen Duc Kien សហស្ថាបនិក​ធនាគារ​ ACB ​ កាល​ពី​ថ្ងៃ​ទី​២០ ខែ​សីហា​មក។ ការ​ឃាត់​ខ្លួន​រូប​លោក និង​ការ​ចាប់​ខ្លួន​អតីត​នាយក​ប្រតិបត្តិ​ធនាគារ លោក​ Ly Xuan Hai ពី​បទ​ចោទ​ប្រកាន់​ថា​គ្រប់គ្រង​សេដ្ឋកិច្ច​មិន​បាន​ល្អ បាន​ជំរុញ​ឲ្យ​មាន​ការ​ដក​ប្រាក់​បញ្ញើ​ និង​បាន​បង្ហាញ​ពី​ក្តីបារម្ភ​របស់​ក្រុម​វិនិយោគិន​ចំពោះ​ប្រព័ន្ធ​ ធនាគារ​ ខណៈ​បំណុល​ខូច បាន​កើន​​ឡើង ហើយ​កំណើន​សេដ្ឋកិច្ច​របស់​វៀតណាម កំពុង​ធ្លាក់​ចុះ​។

លោក Fiachra MacCana អគ្គនាយក​គ្រប់គ្រង​ក្រុម​ហ៊ុន Ho Chi Minh City Securities Corp​ បាន​ឲ្យ​ដឹង​ថា​៖ «បើ​តាម​ទស្សន​វិស័យ​ទីផ្សារ ភាព​មិន​ប្រាកដ​ប្រជា​នា​ពេល​បច្ចុប្បន្ន ពុំ​បាន​បង្ហាញ​ថានឹង​ចប់​នៅ​ឡើយ​ទេ​។ ការ​ដាក់​ពាក្យ​លា​ឈប់​ពី​ក្រុម​ប្រឹក្សា​នៅ​តាម​ធនាគារ​ទាំង​នេះ ហាក់​ដូច​ជា​ចាក់​សាំង​លើ​ភ្លើង​ថែម​ទៀត​អ៊ីចឹង​នៅ​ក្នុង​រយៈ​ពេល​ប៉ុន្មាន​ សប្តាហ៍​ខាង​មុខ​នេះ»។​

តាម​ការ​ដក​ស្រង់​សម្តី​របស់​លោក Le Hung Dung ប្រធាន​ក្រុម​ហ៊ុន Eximbank សារ​ព័ត៌មាន​តាម​អ៊ីនធឺណិត​ CafeF បាន​រាយការណ៍​កាល​ពី​ថ្ងៃ​ពុធ​ថា លោក Pham Trung Cang អតីត​មន្ត្រី​ប្រតិបត្តិ​នៅ​ធនាគារ ACB ​បាន​លាឈប់​ពីការ​ងារ​ក្នុង​នាម​ជា​អនុប្រធាន​ធនាគារ Vietnam Export-Import Commercial Joint Stock Bank។

លោក Louis Taylor អគ្គនាយក​ធនាគារ​ Standard Chartered Plc ប្រចាំ​ប្រទេស​វៀត​ណាម បាន​ឲ្យ​ដឹង​ថា ធនាគារ​ Standard Chartered Plc កាន់​កាប់​ភាគហ៊ុន​នៅ​ក្នុង​ធនាគារ ACB ចំនួន ​១៥​ភាគរយ​។ លោក Taylor បាន​បដិសេធ​មិន​អធិប្បាយ​ពី​ការ​លា​ឈប់​ពី​ការ​ងារ​នេះ​ទេ។ ចំណែក​ឯ ធនាគារ​ Sumitomo Mitsui Banking Corp ដែល​ជា​ធនាគារ​ធំ​ជាង​គេ​ទីពីរ​របស់​ជប៉ុន​គិត​តាម​តម្លៃ​ទីផ្សារ កាន់​កាប់​ភាគ​ហ៊ុន​របស់​ក្រុម​ហ៊ុន Eximbank ចំនួន​១៥​ភាគ​រយ។​ នេះ​បើ​យោង​តាម​ទិន្នន័យ ដែល​ទីភ្នាក់​ងារ​ព័ត៌មាន Bloomberg ទទួល​បាន​។

សន្ទស្សន៍ ​ហ៊ុន​គោល​របស់​វៀតណាម បាន​ធ្លាក់​ចុះ ១,៨​ភាគ​រយ​នៅ​ម៉ោង ១១ និង​៣០​នាទី​ព្រឹក​ម្សិលមិញ ម៉ោង​សម្រាក ដែល​ជា​ការ​ធ្លាក់​ចុះ​ខ្លាំង​បំផុត​ក្នុង​ចំណោម​សន្ទស្សន៍​ហ៊ុន​ចំនួន​ ២៣ នៅ​អាស៊ី៕