បណ្ដាញសហគមន៍ព្រៃឡង់ជាង៣០០នាក់ នៅជុំវិញព្រៃឡង់ ដែលធ្វើដំណើរដោយថ្មើរជើង និងខ្លះដោយម៉ូតូរយៈពេល៥ថ្ងៃ ដើម្បីដើរល្បាតទប់ស្កាត់បទល្មើសព្រៃឈើ ដាក់ជូនរដ្ឋាភិបាលជាលើកទី៦ បានបញ្ចប់ហើយ កាលពីថ្ងៃទី១៧ ខែកញ្ញា។
ក្រុមអ្នកភូមិដែលមកតវ៉ាដើម្បីទប់ស្កាត់ការកាប់បំផ្លាញព្រៃឈើនៅតំបន់ព្រៃឡង់ ស្ថិតក្នុងខេត្តកំពង់ធំ កាលពីថ្ងៃទី២៤ ខែកុម្ភៈ ឆ្នាំ២០១១។
អ្នកសម្របសម្រួលវេទិកាសាធារណៈ នៃមជ្ឈមណ្ឌលសិទ្ធិមនុស្សកម្ពុជា លោក ឈឹម សាវុធ ឲ្យដឹងថា ពលរដ្ឋមកពីខេត្តចំនួន៤ បានដើរល្បាត និងជិះម៉ូតូ ប្រឆាំងបទល្មើសព្រៃឈើ ចាប់ពីថ្ងៃទី១៣ ដល់ថ្ងៃទី១៧ ខែកញ្ញា។ លោកបន្តថា ការដើរល្បាតរយៈពេល៥ថ្ងៃ អ្នកភូមិមកពីខេត្តព្រះវិហារ បានដុតបំផ្លាញគំនរឈើជាង១០ម៉ែត្រគូប ប្រភេទឈើធ្នង់ និងចាប់បានម៉ាស៊ីនអារឈើមួយ។
អ្នកភូមិមកពីខេត្តកំពង់ធំ ចាប់បានម៉ាស៊ីនអារឈើចំនួន៤គ្រឿង និងប្រទះឃើញគំនរឈ្មោះប្រភេទឈើកកោះ ឈើដួងចែម ដើមច្បោះ និងឈើទាល ចំនួនជាង២០០ម៉ែត្រគូប។ រីឯអ្នកភូមិមកពីខេត្តក្រចេះ ចាប់បានម៉ាស៊ីនអារឈើចំនួន៤គ្រឿងដែរ និងរកឃើញគំនរឈើប្រណិតជាច្រើនម៉ែត្រគូបទៀត។
ដោយឡែក អ្នកភូមិនៅឯខេត្តស្ទឹងត្រែង វិញ មិនទាន់ដឹងថា ចាប់បានឈើប៉ុន្មាននៅឡើយទេ ដោយសារតែនៅឆ្ងាយ មិនអាចទាក់ទងបាន។ លោកបន្តថា ប្រសិនបើបានលទ្ធផលពីប្រជាសហគមន៍ទាំង៤ខេត្តហើយនោះ លោកនឹងធ្វើរបាយការណ៍ជាលើកទី៦ ដាក់ជូនរដ្ឋាភិបាល ស្ដីពីការកាប់បំផ្លាញព្រៃឈើយ៉ាងអនាធិបតេយ្យក្នុងតំបន់ព្រៃឡង់។
លោក ឈឹម សាវុធ៖ «បើចង់ទប់ស្កាត់ឲ្យមានប្រសិទ្ធភាពដូចបទបញ្ជារបស់នាយករដ្ឋមន្ត្រីមែន អាជ្ញាធរដាក់វិធានការតឹងរ៉ឹងទប់ស្កាត់បានចំពោះសហគមន៍ទប់ស្កាត់បានមួយពេលៗទេ ហើយទប់ហើយជនល្មើសហ្នឹង បង្កើតសកម្មភាពឡើងវិញដដែល។ ក្រោយពីរបាយការណ៍ផ្ញើទៅខេត្ត ទៅក្រសួងអស់ ស្រាប់តែរបាយការណ៍ហ្នឹងមានដល់ជនល្មើសដែលកំពុងកាប់បំផ្លាញក្នុងព្រៃឡង់ ធ្វើឲ្យជនល្មើសគំរាមដល់សហគមន៍ ដែលបានបង្ហាញឯកសារហ្នឹងទៀត។ នេះជាវិធីមួយ ធ្វើឲ្យសហគមន៍អស់ទឹកចិត្ត ហើយក៏មិនអាចបង្ក្រាបបញ្ហាហ្នឹងបានដែរ ក្រុមល្មើសហ្នឹង រឹតតែបានចិត្តថែមទៀត និងធ្វើឲ្យសហគមន៍ភ័យខ្លាច ពេលដែលមានការគំរាមអ៊ីចឹង»។
លោក ឈឹម សាវុធ បញ្ជាក់ថា ការចុះល្បាតក្នុងព្រៃឡង់របស់អ្នកភូមិ អាចទប់ស្កាត់បទល្មើសព្រៃឈើបានមួយរយៈតូចប៉ុណ្ណោះ។ តែក្រោយមក ជនល្មើសបានបង្កើតបទល្មើសព្រៃឈើក្នុងតំបន់នោះដូចដើម ហើយតំបន់ខ្លះ ការកាប់បំផ្លាញឈើមានការកើនឡើងលើសមុនថែមទៀត។ លោកថា ការចុះល្បាតរបស់សហគមន៍ព្រៃឈើ គ្រាន់តែជាការជួយរកភស្តុតាង និងជាការព្រមានខ្លះៗដល់មន្ត្រីខិលខូច និងជនប្រព្រឹត្តបទល្មើសប៉ុណ្ណោះ ហើយវាមិនអាចទប់ស្កាត់បានទាំងស្រុងនោះឡើយ ប្រសិនបើមិនមានការសហការជាមួយមន្ត្រីអាជ្ញាធរ៕
No comments:
Post a Comment
yes