សំណុំរឿងបាញ់សម្លាប់សកម្មជនព្រៃឈើដ៏ល្បីល្បាញលោក ឈុត វុទ្ធី នឹងត្រូវតុលាការខេត្តកោះកុងលើកយកមកបើកសវនាការនៅថ្ងៃទី០៤ តុលា ខាងមុខ។
លោក ឈុត វុទ្ធី ប្រធានអង្គការការពារធនធានធម្មជាតិកាលនៅរស់
តាមដីកាកោះរបស់ព្រះរាជអាជ្ញារង និងជាតំណាងអយ្យការសាលាដំបូងខេត្តកោះកុង ក្នុងសំណុំរឿងបាញ់សម្លាប់លោក ឈុត វុទ្ធី ជនសង្ស័យក្នុងសំណុំរឿងនេះ ត្រូវគេរកឃើញថា មានត្រឹមតែសន្តិសុខក្រុមហ៊ុនធីមប៊័រគ្រីនឈ្មោះ រ៉ាន់ បូរ័ត្ន ដែលកំពុងជាប់ពន្ធនាគារខេត្តកោះកុងប៉ុណ្ណោះ។
សវនាការករណីបាញ់សម្លាប់លោក ឈុត វុទ្ធី នេះ ក៏មានការកោះហៅសាក្សីមួយចំនួនទៀតផងដែរ ដូចជាមន្រ្តីរដ្ឋបាលព្រៃឈើ អតីតមេបញ្ជាការរងកងរាជអាវុធហត្ថខេត្តកោះកុង និងលោក ម៉ក់ ជីតូ ប្រធាននាយកដ្ឋានកណ្តាលនគរបាលយុត្តិធម៌ នៃក្រសួងមហាផ្ទៃដែលទទួលបន្ទុកស៊ើបអង្កេតករណីនេះ បន្ទាប់ពីមានបញ្ជាពីនាយករដ្ឋមន្រ្តី ហ៊ុន សែន ផងដែរ។
សូមរំលឹកថា លោក ឈុត វុទ្ធី ប្រធានអង្គការការពារធនធានធម្មជាតិ រួមជាមួយមន្រ្តីប៉េអឹមម្នាក់ទៀត ត្រូវបានគេបាញ់សម្លាប់នៅតំបន់វាលបី ក្នុងឃុំបាក់ខ្លង ស្រុកមណ្ឌលសីមា ខេត្តកោះកុង ខណៈដែលលោក ឈុត វុទ្ធី កំពុងឃ្លាំមើលការកាប់បំផ្លាញព្រៃឈើនៅក្នុងតំបន់នោះ។ តែតាមរបាយការណ៍ស៊ើបអង្កេតរបស់ប៉ូលិស លោក ឈុត វុទ្ធី ត្រូវបានមន្រ្តីប៉េអឹមឈ្មោះ អ៊ិន រតនា បាញ់សម្លាប់បន្ទាប់ពីមានជម្លោះពាក្យសម្តីជាមួយគ្នា ហើយបន្ទាប់មកមន្រ្តីប៉េអឹមរូបនោះ ក៏បាញ់សម្លាប់ខ្លួនឯង។
ទោះជាយ៉ាងណាក៏ដោយក្រុមអង្គការសង្គមស៊ីវិល និងអ្នកការពារសិទ្ធិមនុស្សមិនយល់ស្របចំពោះរបាយការណ៍នោះទេ ហើយថា ករណីនេះគឺជាការសម្លាប់បំបិទមាត់៕
No comments:
Post a Comment
yes