មន្ត្រីគណបក្សប្រឆាំង រួមមាន គណបក្ស សម រង្ស៊ី និងគណបក្ស សិទ្ធិមនុស្ស ប្រតិកម្ម ចំពោះការបំប៉ោងព័ត៌មាន ដែលថា សកម្មជនរបស់ខ្លួនចំនួនជាង ៣ ពាន់នាក់ ក្នុងខេត្តបន្ទាយមានជ័យ ទៅចូលរួមជាមួយគណបក្ស ហ៊្វុនស៊ិនប៉ិច។
មន្ត្រីគណបក្សប្រឆាំង ចោទថា គណបក្ស ហ្វុនស៊ីនប៉ិន បានបំប៉ោងចំនួនសកម្មជន ដែលទៅចុះចូលនោះ ខុសពីការពិត ដើម្បីកេងចំណេញខាងផ្នែកនយោបាយ។
មន្ត្រីគណបក្សប្រឆាំងថ្លែងថា អតីតសកម្មជនគណបក្ស សម រង្ស៊ី មួយចំនួន ដែលទៅចុះចូលជាមួយគណបក្ស ហ្វុនស៊ិនប៉ិច នោះ គឺដោយសារពួកគេមើលឃើញលាភសក្ការៈ ដូចជាលុយ ដីស្រែ និងតួនាទី ដែលគណបក្ស ហ្វុនស៊ិនប៉ិច ផ្ដល់ឲ្យ។
លោក មាន សារិទ្ធ ប្រធានក្រុមការងារក្រុងប៉ោយប៉ែត គណបក្ស សម រង្ស៊ី ថ្លែងថា សកម្មជនដែលចាកចេញនោះ ពុំមែនដោយសារមូលហេតុមេដឹកនាំរបស់គណបក្ស សម រង្ស៊ី នោះទេ។ សកម្មជនមួយចំនួន បានទៅចុះចូលតាំងពីមុនការបោះឆ្នោតជ្រើសរើសក្រុមប្រឹក្សាឃុំសង្កាត់អាណត្តិទី៣ មកម្ល៉េះ។
លោក មាន សារិទ្ធ៖ «ហើយការ ដែលគាត់ចេញទៅនេះ មិនមែនមានច្រើនដូចគាត់ថា មានដល់ជាង ៣.៦០០ នាក់ទេ។ ចំនួន ៣.៦០០ នាក់នេះ បើយើងពិនិត្យមើលបញ្ជីបោះឆ្នោត ឃុំសង្កាត់ក្នុងអាណត្តិទី ៣ នេះ គឺជាចំនួនរួមទូទាំងខេត្តតែម្ដង មិនមែនមួយកន្លែងទៅចូលរួមបានចំនួនប៉ុណ្ណឹងមិនមែនទេ។ កាលពីម្សិលមិញ មានបងប្អូនមួយចំនួន ដែលគាត់ដើរតាមជនដែលល្មោភអំណាច បានលាភសក្ការៈ បានតួនាទីនេះ គាត់បានទូរស័ព្ទមកប្រាប់ខ្ញុំវិញថា គាត់នឹងវិលត្រឡប់មករួមរស់ជាមួយគណបក្សសង្គ្រោះជាតិ ដោយមានលោក សម រង្ស៊ី ធ្វើជាប្រធាន»។
លោកសង្កត់ធ្ងន់ថា អ្វីដែលគណបក្ស ហ្វុនស៊ិនប៉ិច បានធ្វើឲ្យកើតមានឡើងនៅក្នុងខេត្តបន្ទាយមានជ័យ កាលពីថ្ងៃទី១ ខែកញ្ញានោះ គ្រាន់តែជាការបោកប្រាស់ តាមរយៈការបំប៉ោងចំនួនច្រើនលើសលុប រហូតទៅដល់ ៣.៦០៧ នាក់។ ម្យ៉ាងវិញទៀត ក្នុងចំនួននោះ មានសកម្មជនមួយចំនួន បានទៅចុះចូលជាមួយគណបក្ស ហ្វុនស៊ិនប៉ិច យូរហើយ តាំងពីឆ្នាំ ២០០៧។
គណបក្ស ហ្វុនស៊ិនប៉ិច បានធ្វើពិធីប្រកាសទទួលថ្នាក់ដឹកនាំគណបក្ស សម រង្ស៊ី និងគណបក្ស សិទ្ធិមនុស្ស កាលពីព្រឹកថ្ងៃទី ១ កញ្ញា ២០១២ នៅទីស្នាក់ការគណបក្ស ហ៊្វុនស៊ិនប៉ិច ខេត្តបន្ទាយមានជ័យ។ គណបក្ស ហ្វុនស៊ិនប៉ិច បានបញ្ជាក់ថា មានសកម្មជនគណបក្ស សម រង្ស៊ី និងគណបក្សសិទ្ធិមនុស្សចំនួនជាង ៣.៦០៧ នាក់ ក្នុងខេត្តបន្ទាយមានជ័យ បានចូលរួមជាមួយគណបក្ស ហ៊្វុនស៊ិនប៉ិច។
នៅក្នុងពិធីប្រកាសទទួលសកម្មជនថ្មីរបស់គណបក្ស ហ្វុនស៊ិនប៉ិន នៅខេត្តបន្ទាយមានជ័យនោះ លោក ម៉ក់ ដារិទ្ធ អតីតជាប្រធានគណបក្ស សម រង្ស៊ី ក្រុងប៉ោយប៉ែតថ្លែងថា ការរួមរស់ជាមួយគណបក្ស សម រង្ស៊ី នារយៈកាលកន្លងមក លោកបានខិតខំបម្រើការជូនបក្ស។ ប៉ុន្តែ ពុំបានលទ្ធផលទេ។ គណបក្ស សម រង្ស៊ី បានសន្យាធ្វើឲ្យរូបលោកអស់ចិត្ត។ ដូច្នេះ ហើយធ្វើឲ្យលោក ងាកទៅរួមរកគណបក្ស ហ៊្វុនស៊ិនប៉ិច។ លោកអះអាងថា បាននាំសមាជិកសមាជិការបស់គណបក្ស សម រង្ស៊ី ១៣៥៧ នាក់ ចុះចូល ហ្វុនស៊ិនប៉ិច និងសន្យាអូសទាញសមាជិកគណបក្ស សម រង្ស៊ី បន្ថែមទៀត ឲ្យទៅចូលជាមួយ ហ្វុនស៊ិនប៉ិច សម្រាប់ការបោះឆ្នោតនៅឆ្នាំក្រោយនេះ។
ប៉ុន្តែ មន្ត្រីគណបក្ស សម រង្ស៊ី លោក មាន សារិទ្ធិ បានប្រតិកម្មថា លោក ម៉ក់ ដារិទ្ធ មានដីធ្វើស្រែមួយចំនួន នៅក្នុងសង្កាត់និមិត្ត ក្រុងប៉ោយប៉ែត។ ដីនោះជាដីរបស់លោក ជា ជន មន្ត្រី ហ៊្វុនស៊ិនប៉ិច និងជាដីរបស់លោក ញឹក ប៊ុនឆៃ ប្រធានប្រតិបត្តិគណបក្ស ហ្វុនស៊ិនប៉ិច ដែលបានប្រគល់ឲ្យលោក ម៉ក់ ដារិទ្ធ ធ្វើស្រែ។ ចំណុចនេះ ជាសម្ពាធមួយ ដែលធ្វើឲ្យលោក ម៉ក់ ដារិទ្ធ ទៅចុះចូលជាមួយ ហ្វុនស៊ិនប៉ិច។
លោក មាន សារិទ្ធិ៖ «ការពិតពុំមានទេ ជាការបោកប្រាស់មួយខាងផ្នែកនយោបាយ ដែលលោក ញឹក ប៊ុនឆៃ បានប្រណិតឡើង ដើម្បីផ្គាប់ចិត្តចៅហ្វាយនាយតែប៉ុណ្ណោះ។ ក្នុងពេលថ្មីៗ នេះ មិនមានសកម្មជនគណបក្ស សម រង្ស៊ី ឬក៏គណបក្ស សិទ្ធិមនុស្ស ទៅចុះចូលជាមួយគណបក្ស ហ្វុនស៊ិនប៉ិច ទេ។ នេះជារឿងប្រឌិត ជារឿងបោកប្រាស់មួយ ដែលធ្វើឲ្យអ្នកនយោបាយដូចគ្នា ធ្វើឲ្យសកម្មជនមួយចំនួន នៅថ្នាក់ក្រោមភូមិឃុំ មានការភាន់ច្រឡំ»។
លោក ប៉េង សុខសេង អតីតជាលេខាគណបក្សបក្ស សិទ្ធិមនុស្ស ខេត្តបន្ទាយមានជ័យថ្លែងថា លោកបានដឹកនាំសមាជិកសមាជិកាគណបក្ស សិទ្ធិមនុស្ស ចំនួនជាង ៣០០ នាក់ ចូលរួមរស់ជាមួយគណបក្ស ហ៊្វុនស៊ិនប៉ិច។ បច្ចុប្បន្ន លោកមានតួនាទីជាអនុប្រធានគណបក្ស ហ្វុនស៊ិនប៉ិន នៅខេត្តបន្ទាយមានជ័យ។ គណបក្ស ហ៊្វុនស៊ិនប៉ិច ដែលធ្លាប់បែកបាក់គ្នាកន្លងមក ឥឡូវបានរួមរស់ជាមួយគ្នាវិញ។
លោក ប៉េង សុខសេង៖ «មានការចូលរួម របស់គណបក្ស សិទ្ធិមនុស្ស មួយចំនួនធំ ចូលទៅគណបក្ស ហ្វុនស៊ិនប៉ិច ការចូលរួមជាក់ស្ដែងម្សិលមិញ មាន ៣៥០ នាក់។ សម រង្ស៊ី ប្រហែល ជាង៣០០ នាក់ដែរ គឺមានហេតុផលតែម្យ៉ាងទេ គ្រាន់ថា ខ្ញុំមើលឃើញ ការកែទម្រង់ របស់គណបក្ស ហ្វុនស៊ិនប៉ិន មានភាពល្អប្រសើរ ហើយទី ២ ទាក់ទងទៅនិងការបង្រួបបង្រួមគណបក្សរាជានិយមអាស្រ័យរដ្ឋធម្មនុញ្ញ គោលនយោបាយរបស់គណបក្ស ហ៊្វុនស៊ិនប៉ិច ល្អ ក្រោមការដឹកនាំរបស់ឯកឧត្ដម ញឹក ប៊ុនឆៃ»។
លោក ញឹក គឹម ឈុន ប្រធានគណៈកម្មការប្រតិបត្តិគណបក្ស ហ៊្វុនស៊ិនប៉ិច ខេត្តបន្ទាយមានជ័យ មានប្រសាសន៍ថា មូលហេតុសំខាន់ ដែលនាំឲ្យអតីតសកម្មជនគណបក្ស សម រង្ស៊ី និងគណបក្ស សិទ្ធិមនុស្ស មករួមរស់ជាមួយគណបក្ស ហ្វុនស៊ិនប៉ិច ដោយសារឥឡូវនេះ គណបក្សរាជានិយមហ៊្វុនស៊ិនប៉ិច រួបរួមគ្នាឡើងវិញ។ លោក ញឹក ប៊ុនឆៃ ជាប្រធានប្រតិបត្តិ និងជាអ្នកមានស្រុកកំណើត នៅខេត្តបន្ទាយមានជ័យ។ ចំណុចទី៣ គណបក្ស ហ៊្វុនស៊ិនប៉ិន មានមេដឹកនាំត្រឹមត្រូវយុត្តិធម៌ សច្ចធម៌ មិនយកលុយកាក់ពីសមាជិកសមាជិកាតែបានចុះជួយប្រជាជន។ សកម្មជនរបស់ គណបក្សទាំងពីរ ដែលទៅរួមរស់ជាមួយគណបក្ស ហ៊្វុនស៊ិនប៉ិន នាពេលនេះ ធ្វើឡើងដោយឆន្ទៈ របស់ពួកគេ ពុំមានការទិញទឹកចិត្ត និងមានលក្ខខណ្ឌអ្វីនោះទេ។
លោក ញឹក គឹម ឈុន៖ «ជួយគ្រប់ទីកន្លែង តាំងពីទំនាស់ដីធ្លីអីជួយសម្រួល ជួយទាក់ទង ដើម្បីដោះស្រាយ តាមសមត្ថភាព។ អ៊ីចឹងវាល្អប្រសើរ។ ដល់អ៊ីចឹងវាមិនដែលមានមេមកជួយណា ហ្វុនស៊ិនប៉ិច មានមេជួយយ៉ាងចំណាប់ ហើយផុតពីនោះ គាត់ទាំងអស់ហ្នឹង ជាអតីត ហ៊្វុនស៊ិនប៉ិច ដល់ ហ្វុនស៊ិនប៉ិន មានបញ្ហាទៅបានបែកបាក់ខ្លះទៅនេះ ខ្លះទៅនុះអាហ្នឹង សុទ្ធកូនចៅចាស់ត្រឡប់មកវិញធ្វើការល្អប្រសើរ»។
លោកបន្តថា នេះជាលើកដំបូង ដែលគណបក្ស ហ៊្វុនស៊ិនប៉ិច បានប្រកាសទទួលស្គាល់សមាជិកពីគណបក្ស សិទ្ធិមនុស្ស និងគណបក្ស សម រង្ស៊ី ក្រោយពីគណបក្ស ហ៊្វុនស៊ិនប៉ិច និងគណបក្សជាតិនិយម បានរួមគ្នាជាគណបក្សតែមួយ។ គណបក្ស ហ្វុនស៊ិនប៉ិច នឹងធ្វើពិធីនេះនឹងធ្វើទៅលើខេត្តចំនួន ៥ ទៀត បន្ទាប់ពីខេត្តបន្ទាយមានជ័យ។
ទាក់ទិនរឿងនេះ លោក បណ្ឌិត សុខ ទូច ជាអ្នកវិភាគឯករាជ្យយល់ថា នៅពេលណាមានការបង្កើតសម្ពន្ធភាពថ្មី គេត្រូវធ្វើឲ្យសារព័ត៌មានចាប់អារម្មណ៍ និងប្រើប្រាស់សារព័ត៌មាន ដោយមិនចាំបាច់អញ្ជើញមិនចាំបាច់បង់ថវិកានោះ គេត្រូវបង្កើតរលកនយោបាយមួយ ដើម្បីឲ្យសារព័ត៌មានហ្នឹងចុះផ្សាយពីលំហូរអ្នកចុះចូលរបស់សកម្មជនគណបក្សនយោបាយមួយទៅគណបក្សនយោបាយមួយផ្សេងទៀត។ ធ្វើដូច្នេះ គឺដើម្បីទាក់ទាញអារម្មណ៍របស់អ្នកបោះឆ្នោត។
លោក បណ្ឌិត សុខ ទូច៖ «ទី២ ប្រជាជនខ្ញុំយល់ឃើញថា គ្មានពីរបីពាន់នាក់ទេ វាអត់អាចទៅបានទេ មូលហេតុអីរឿងនេះ មិនមែនជារឿងថ្មី សម្រាប់ បរិបទកម្ពុជា ប្រជាជនកម្ពុជាមិនរត់ចុះឡើងទៅរកគណបក្សមួយខ្សោយទេ គេស្វែងរកគណបក្ស ដែលខ្លាំងហើយ បើយើងប្រៀបធៀបគណបក្ស គណបក្ស សម រង្ស៊ី គណបក្ស សិទ្ធិមនុស្ស ទៅនិងគណបក្ស ហ៊ុនស៊ិនប៉ិច ដែលស្ទើរតែមិនមានកៅអីផង ហើយគេរត់ទៅរកអាខ្សោយវាអត់អាចទេ»។
លោកបណ្ឌិត សុខ ទូច បន្តថា ចំណុចសំខាន់មួយទៀត គឺគណបក្ស ហ្វុនស៊ិនប៉ិច ធ្លាប់មានភាពរឹងមាំ នៅលើទីតាំងខេត្តបន្ទាយមានជ័យ។ ដូច្នេះ ហើយគណបក្ស ហ្វុនស៊ិនប៉ិច បានខិតខំ ដើម្បីធ្វើយ៉ាងណាកុំឲ្យមានការបាត់បង់ ហ្វុនស៊ិនប៉ិច ទៀត ត្រូវខំរកមធ្យោបាយកសាងមូលដ្ឋានគ្រឹះនៅក្នុងខេត្តបន្ទាយមានជ័យ។
នៅពេលបោះឆ្នោតជិតចូលមកដល់ម្ដងៗ គណបក្សនយោបាយនីមួយៗ បានប្រើប្រាស់យុទ្ធសាស្ត្រ គ្រប់បែបយ៉ាង ដើម្បីអូសទាញឲ្យប្រជាពលរដ្ឋឲ្យគាំទ្រខ្លួន។ គណបក្សនយោបាយខ្លះក៏បានយុទ្ធសាស្ត្រ បំបែកបំបាក់តាមរយៈការផ្ដល់លុយការសម្ភារៈ ទិញទឹកចិត្ត។ការសន្យាផ្ដល់តួនាទី មុខតំណែង ដើម្បីយកបុគ្គលសំខាន់ៗ មួយចំនួន ទៅធ្វើសកម្មភាពអូសទាញសកម្មជនគណបក្សនយោបាយផ្សេងឲ្យមកគាំទ្រគណបក្សរបស់ខ្លួន។ ក្រុមអ្នកវិភាគស្ថានការនយោបាយ នៅស្រុកខ្មែរមើលឃើញថា រូបភាពសកម្មភាព។ ដូច្នេះ បានកើតមានច្រើនឆ្នាំ ហើយប្រជាពលរដ្ឋជាម្ចាស់ឆ្នោត ភាគច្រើនក៏បានយល់ដឹងដូចគ្នាដែរ៕
No comments:
Post a Comment
yes