ការបង្កើតឡើងនូវ ចលនាប្រជាធិបតេយ្យសង្គ្រោះជាតិ
របស់គណបក្ស
សម រង្ស៊ី និងគណបក្ស សិទ្ធិមនុស្ស គឺដោយសារតែថ្នាក់ដឹកនាំរបស់គណបក្សទាំងពីរ មានគោលបំណងដើម្បីសង្គ្រោះប្រជាពលរដ្ឋខ្មែរទាំងអស់គ្នា
ពីការដឹកនាំប្រទេសបច្ចុប្បន្ន
ដែលគេដឹងថាបានធ្វើឲ្យប្រជាពលរដ្ឋរងគ្រោះយ៉ាងធ្ងន់ធ្ងរ និងកំពុងដឹកនាំតាមរបៀបផ្តាច់ការ ។ ហើយគ្រាន់តែមានការប្រកាសបង្កើត ចលនាប្រជាធិបតេយ្យសង្គ្រោះជាតិភ្លាម ប្រជាពលរដ្ឋ
និងឥស្សរជននយោបាយជាច្រើនបានដាក់លិខិតចូលរួមជាមួយចលនានេះ ដើម្បីសង្គ្រោះប្រទេសជាតិរបស់យើងទាំងអស់គ្នា
។
ការចូលរួមដោយស្ម័គ្រចិត្តពីបណ្តាប្រជាពលរដ្ឋខ្មែរ
មន្ត្រីជាន់ខ្ពស់របស់រដ្ឋាភិបាល
និងឥស្សរៈជននយោបាយជាច្រើនរូប
បានធ្វើឲ្យចលនាប្រជាធិបតេយ្យសង្គ្រោះជាតិ ក្លាយទៅជាគណបក្ស សង្គ្រោះជាតិ និងជាកម្លាំងប្រមូលផ្តុំអ្នកប្រជាធិបតេយ្យ អ្នកស្រឡាញ់ជាតិដ៏ធំ
ដែលនឹងអាចយកឈ្នះលើគណបក្សកាន់អំណាចបច្ចុប្បន្ននៅក្នុងការបោះឆ្នោតឆ្នំា២០១៣ខាងមុខនេះជាក់ជាមិនខានឡើយ ។
សូមជំរាបថាឆ្នាំ២០១៣នេះ
ល្មមដល់ពេលវេលាបញ្ចប់វត្តមានអំណាចផ្តាច់ការនៅកម្ពុជា
និងក៏ជាពេលវេលា
ដើម្បីស្រោចស្រង់ជាតិពីរណ្តៅគ្រោះថ្នាក់ផងដែរ ។ ជាមួយគ្នានោះក៏មានជាសុំនួរសួរថាតើហេតុអ្វីចាំបាច់ត្រូវសង្គ្រោះជាតិ? ចំឡើយយ៉ាងខ្លីនិងងាយស្រួលឆ្លើយ ក៏ដូចជាស្រួលស្តាប់ផងដែរគឺ
សង្គ្រោះព្រោះប្រជាពលរដ្ឋរាប់លាន់នាក់បានរងគ្រោះ
ដោយសារតែការបណ្តេញ
ចេញ ហើយបើទោះបីមានការចុះវាស់វែងដីជូនប្រជាពលរដ្ឋ ពីសំណាក់រដ្ឋាភិបាលសព្វថ្ងៃនៅពេលនេះក៏ដោយ
ប៉ុន្តែក៏មិនរំពឹងថាបើអំណាចស្ថិតក្នុងដៃគេនៅអាណត្តិក្រោយទៀត តើសុវត្ថិភាពដីធ្លីទាំងអស់នោះត្រូវធានាឬយ៉ាងណា ? ព្រោះគេធ្លាប់បានធ្វើរួចមកហើយ
កាលពីឆ្នាំ២០០៨ ហើយកុំថាឡើយប្លង់កម្មសិទ្ធិ ទោះជាអ្វីក៏ដោយ
ក៏មិនអាចទប់ស្កាត់មហិច្ឆតាលោភលន់របស់ពួកគេបាននោះដែរ ។ នេះហើយជាអ្វី ដែលគណបក្ស សង្រ្គោះជាតិ ត្រូវសង្គ្រោះប្រជាពលរដ្ឋលើបញ្ហាដីធ្លី ។ សង្គ្រោះប្រជាពលរដ្ឋ ព្រោះប្រជាពលរដ្ឋជាច្រើន បានរងគ្រោះ ដោយសារតែអំពើអយុត្តិធម៌ក្នុងសង្គម និងនិទណ្ឌភាព ដែលកំពុងប្រព្រឹត្តិដោយមន្ត្រីកាន់អំណាច មកលើប្រជាពលរដ្ឋស្លូតត្រង់ ។ សង្រ្គោះព្រោះមានអំពើពុករលួយកិបកេងថវិការរបស់ជាតិ រាប់រយ រាប់ពាន់លានដុល្លាក្នុងមួយឆ្នាំៗ ដែលធ្វើឲ្យ ប្រជាពលរដ្ឋយ៉ាងហោចណាស់៤០ភាគរយបន្តរស់ក្រោមបន្ទាត់នៃភាពក្រីក្រ ។ សង្គ្រោះជាតិ ព្រោះធនធានធម្មជាតិទាំងលើដី ក្រោមដី និងក្នុងទឹក ត្រូវបានបំផ្លិចបំផ្លាញស្ទើរហិចហោចអស់ទៅហើយនៅពេលនេះ ក្រោមការដឹកនាំរបស់គណបក្សកាន់អំណាចបច្ចុប្បន្ននេះ ។ សង្គ្រោះជាតិ ព្រោះដែនកោះ របស់ខ្មែរយ៉ាងហោចណាស់២៨ រួមទាំងតំបន់ធម្មជាតិជាច្រើនទៀត
កំពុងតែបានធ្លាក់ចូលទៅក្នុងកណ្តាប់ដៃអ្នកមានអំណាច និងបក្សពួករបស់គេ ។
ជាមួយគ្នានោះការសង្គ្រោះរបស់គណបក្ស សង្គ្រោះជាតិ គឺសង្គ្រោះជាតិព្រំដែន ដែលត្រូវបានគេអះអាងថាប្រទេសជិតខាង បានខិតចូលធ្វើឲ្យខាតបង់បូរណភាពទឹកដី នៃប្រទេសជាតិយើង ដោយគ្មានការអើពើពីរដ្ឋាភិបាលឡើយ មិនតែប៉ុន្តែថែមទាំងបិទបាំង និងជ្រោមជ្រែងពីគណបក្ស កាន់អំណាចសព្វថ្ងៃនេះថែមទៀតផង ។ ការកំណត់ព្រំដែនខ្មែរតាមសន្ធិសញ្ញាឆ្នាំ១៩៨២ ឆ្នាំ ១៩៨៣ និងឆ្នាំ១៩៨៥ ត្រូវបានគេរិះគន់ថា បានធ្វើឲ្យបាត់បង់ទឹកដីរបស់ខ្មែរ ក្នុងនោះមានដែនទឹក និងកោះមួយចំនួនថែមទៀត ដូចនេះយើងត្រូវតែសង្គ្រោះជាតិ ដើម្បីទាមទារចំណែកដែលបាត់បង់ និងការពារបូរណភាពទឹកដីសព្វថ្ងៃរបស់យើងឲ្យបានគង់វង្ស ។ សង្គ្រោះជាតិ ព្រោះមានជនអន្តោប្រវេសន៏ខុសច្បាប់កាន់តែច្រើនឡើងៗ ចូលមករស់នៅក្នុងទឹកដីខ្មែររបស់យើង ។ ហើយការសង្គ្រោះជាតិនោះទៀតសោត ក៏ដោយសារតែទំនិញឡើងថ្លៃ ប្រជាពលរដ្ឋ មន្ត្រីរាជការ កម្មករមានប្រាក់ខែតិចតួច មិនអាចរស់នៅបានសមរម្យ ។ សង្គ្រោះព្រោះពេលទៅព្យាបាលនៅមន្ទីរពេទ្យរបស់រដ្ឋ
ត្រូវគេតំរូវឲ្យបង់ប្រាក់ខ្ពស់ ហើយបើគ្មានប្រាក់ គេទុកឲ្យប្រជាពលរដ្ឋ រូបនោះ ស្លាប់ជាមិនខាននោះឡើយដោយគេមិនខ្ចីរវីរវល់សូម្បីតែបន្តិច ។ សង្គ្រោះជាតិ ព្រោះប្រព័ន្ធអប់រំ មានការធ្លាក់ចុះយ៉ាងជំហុក គ្មានការយកចិត្តទុកដាក់ពីថ្នាក់លើ ហើយកូនខ្មែរមានចំណេះដឹងទាប មិនអាចរកការងារធ្វើឲ្យបានសមរម្យនិងគេ ។
អ្វីដែលបានរៀបរាប់មកខាងលើទាំងអស់នេះ គឺជាហេតុផលត្រួសៗ ដែលគណបក្ស សង្គ្រោះជាតិ
ត្រូវជួយសង្គ្រោះប្រជាពលរដ្ឋ និងប្រទេសជាតិរបស់យើងឲ្យបានទាន់ពេលវេលា ។ ហើយ
ពេលវេលាដឹកនាំប្រទេសជាង៣០ឆ្នាំមកនេះ បើខ្មែរមានមេដឹកនាំត្រឹមត្រូវ ស្អាតស្អំ
មិនស្ថិតក្រោមអំណាចបរទេស នោះប្រទេសជាតិ នឹងអាចវិវត្តន៏ទៅមុខយ៉ាងជឿនលឿន រហូតមកទល់បច្ចុប្បន្ននេះមិនខានឡើយ ប៉ុន្តែផ្ទុយទៅវិញ
ជាង៣០ឆ្នាំតើមានបទពិសោធន៏អាក្រក់ៗបែបណាខ្លះតាមបន្តលងបន្លាចប្រជាពលរដ្ឋខ្មែរ
បន្ទាប់ពីសម័យប៉ុលពតនោះ ។
បើទោះបីបទពិសោធ៏ទាំងនោះមិនសំលាប់បងប្អូនប្រជាពលរដ្ឋឆៅៗក៏ដោយ ប៉ុន្តែការបណ្តែតបណ្តោយឲ្យវិស័យអប់រំទាប ការបន្តឲ្យប្រជាពលរដ្ឋរស់ក្រោមបន្ទាត់នៃភាពក្រីក្រ ការបំផ្លាញធនធានធម្មជាតិ ការផ្តល់ដីសម្បទានឲ្យក្រុមហ៊ុនបរទេស ពិសេសប្រទេសយួន ដែលមានរយៈពេលយូរ និងការបន្តឲ្យជនអន្តោប្រវេសន៏ចូលមកដោយខុសច្បាប់កាន់តែច្រើនឡើងៗ មន្ត្រីរាជការមានប្រាក់ខែទាប
មានន័យថា ប្រជាពលរដ្ឋមានចំណូលតិច រៀនមិនបានច្រើន
គឺគេនឹងធ្វើឲ្យយើងរស់នៅលំបាក ហើយលើសពីនេះ
ជាតិខ្មែរទាំងមូលត្រូវលិចលង់ នៅពេលអនាគតជាមិនខានឡើយ ។ សូមលោកអ្នកគ្រលេកមើលអតីតកាលរបស់ខ្មែរ ប្រវត្តិសាស្ត្រ
នឹងប្រាប់យើង អំពីគ្រោះថ្នាក់របស់ប្រទេសជាតិនៅពេលខាងមុខ ។ គណបក្សសង្រ្គោះជាតិ
នឹងសង្គ្រោះបងប្អូនជនរួមជាតិ និងជាតិខ្មែរទាំងមូលពីគ្រោះថ្នាក់ទាំងនេះ។ ដូច្នេះសូមបងប្អូនគាំទ្រគណបក្ស សង្គ្រោះជាតិ ដើម្បីជាតិខ្មែររស់ និងប្រជាពលរដ្ឋមានជីវភាពធូរធារ ហើយគណបក្ស សង្គ្រោះជាតិ នឹងចូលរួមបោះឆ្នោត នៅក្នុងឆ្នាំ២០១៣ខាងមុខនេះ
ដើម្បីប្រគួតប្រជែងជាមួយគណបក្សប្រជាជន ។ គណបក្ស សង្គ្រោះជាតិ
គឺជាក្តីសង្ឃឹមតែមួយគត់របស់ប្រជាពលរដ្ឋខ្មែរ និងប្រទេសជាតិរបស់យើង ៕
No comments:
Post a Comment
yes