មន្ត្រីក្រុមប្រឹក្សាតាមឃុំ-សង្កាត់មួយចំនួន ក្នុងខេត្តស្វាយរៀង បានអះអាងថា មន្ត្រីរតនាគារខេត្តបានកិបកេងថវិកាអភិវឌ្ឍន៍មូលដ្ឋាន។
លោក ឯម វឿន ជំទប់ទី១ឃុំដូង ស្ថិតក្នុងចំណោមឃុំ-សង្កាត់ច្រើនទៀត ក្នុងស្រុករមាសហែក ខេត្តស្វាយរៀង លោកបានឲ្យដឹងនៅថ្ងៃសុក្រ ទី៣១ ខែសីហា ថា ថវិការបស់រដ្ឋាភិបាលផ្តល់ជូនសម្រាប់អភិវឌ្ឍន៍ឃុំដូង បានបាត់បង់រាប់សិបម៉ឺនរៀល ដោយមិនដឹងមូលហេតុ។
ជំទប់ឃុំរូបនេះ មានចម្ងល់ថា ការបាត់ថវិការាប់សិបម៉ឺនរៀលនោះ តើបាត់នៅរតនាគារខេត្តស្វាយរៀង ឬក៏ត្រូវមន្ត្រីទទួលបន្ទុកបេឡាឃុំដូង កិបកេង៖ «លុយឃុំដែលទៅបើកហ្នឹង ចំណាយខុសខ្ទង់ច្រើន។ ពេលសួរទៅ គ្រាន់តែចំណាយលើរតនាគារខេត្តស្វាយរៀង អស់ពី២សែន៤ម៉ឺន ទៅ២សែន៨ម៉ឺនជាង គ្រប់ខែខុសគ្នាទាំងអស់។ តើវាជាកំហុសរបស់បេឡាករឃុំ ឬជាកំហុសរបស់រតនាគារ ដើម្បីងាយស្រួលតវ៉ា»។
លោកបន្តថា ជារៀងរាល់ឆ្នាំ រដ្ឋាភិបាលបានផ្តល់ថវិកាជាង១០លានរៀលទៅឲ្យឃុំដូង សម្រាប់អភិវឌ្ឍមូលដ្ឋាននេះ។ ប៉ុន្តែ ថវិកាជាង១០លានរៀលនេះ មន្ត្រីទទួលខុសត្រូវចំណាយមិនមានលិខិតស្នាមត្រឹមត្រូវ ហើយឃុំដូង គ្មានការអភិវឌ្ឍអ្វីទេ។
ឆ្លើយតបបញ្ហានេះ លោក ញ៉ឹម សុវណ្ណតារា អនុប្រធានរតនាគារខេត្តស្វាយរៀង បានបដិសេធន៍ថា មិនបានកិបកេងថវិកាអភិវឌ្ឍន៍ឃុំ-សង្កាត់ ដូចការចោទប្រកាន់ទេ។
លោកបន្តថា ថវិកាសម្រាប់យកទៅអភិវឌ្ឍតាមឃុំ-សង្កាត់ នាខេត្តស្វាយរៀង ខាងរតនាគារផ្តល់ជូនគ្រប់ចំនួន និងត្រូវទៅបើកប្រាក់សុទ្ធនៅធនាគារ៖ «ខ្ញុំអត់ទទួលស្គាល់ទេ ព្រោះអីនៅខាងខ្ញុំនេះ ខ្ញុំចេញសែក (Check=មូលប្បទានប័ត្រ) ឲ្យគេ តែបើគេទៅរត់ការខាងណា ខ្ញុំអត់ដឹងទេ។ ខ្ញុំបើកឲ្យគេគ្រប់ៗ ព្រោះអីអ្នកបើកលុយហ្នឹង គេត្រូវទៅបើកនៅធនាគារ»។
ទោះជាបែបនេះក្តី លោក ទុយ វណ្ណា សមាជិកក្រុមប្រឹក្សា និងជាបេឡាករ ឬអ្នកកាន់ថវិកាសម្រាប់អភិវឌ្ឍន៍ឃុំដូង ស្រុករមាសហែក ខេត្តស្វាយរៀង លោកឲ្យដឹងថា ថវិកាសម្រាប់អភិវឌ្ឍន៍មូលដ្ឋានឃុំដូង លោកបានបើកក្នុងរយៈពេល៣ខែម្តង ប៉ុន្តែការបើកម្តងៗ ត្រូវចំណាយប្រាក់ជាង២០ម៉ឺនរៀល ទៅឲ្យមន្ត្រីរតនាគារខេត្ត ដើម្បីជួយសម្រួលឯកសារបើកឲ្យបានឆាប់៖«ទៅបើកលុយហ្នឹង យើងចង់រហ័ស យើងឲ្យគេ១កន្លែង២ម៉ឺន ១កន្លែង៣ម៉ឺន យើងឲ្យគេ យើងជូនគេ ព្រោះយើងចង់រហ័ស។ ទៅបើកម្តងៗ មិនមែនបើកបានភ្លាមៗទេ ជួនកាលឯកសារខុសត្រូវសម្រាក១យប់ ហើយដោយសារតែខ្លាចខាតពេលវេលា យើងឲ្យលុយគេសរុបអស់លុយចាប់ពី២០ម៉ឺន ដល់២២ម៉ឺន ក៏មាន»។
យ៉ាងនេះក្តី លោក ទុយ វណ្ណា បញ្ជាក់ថា ការចំណាយថវិកាជូនមន្ត្រីរតនាគារខេត្តស្វាយរៀង ធ្វើឡើងតាមការស្ម័គ្រចិត្ត មិនមែនមានអ្នកចាប់បង្ខំនោះទេ។
ទាក់ទងបញ្ហានេះ លោក ភួង សុវណ្ណ ប្រធានសមាគមមន្ត្រីរាជការឯករាជ្យកម្ពុជា បានថ្លែងថា បច្ចុប្បន្ន អំពើពុករលួយបានកើតមានច្រើនគ្រប់រូបភាព និងតាមគ្រប់ស្ថាប័ននៃរាជរដ្ឋាភិបាល។ លោកថា សកម្មភាពរត់ការជួយសម្រួលឯកសារ ដើម្បីការងារអ្វីមួយបានឆាប់រហ័ស ស្ទើរក្លាយជាទម្លាប់មួយនៅតាមក្រសួង ឬស្ថាប័ននានា ក្នុងប្រទេសកម្ពុជា។ លោកថា ភាពអសកម្មទាំងនេះ គួរណាស់តែថ្នាក់ដឹកនាំរដ្ឋាភិបាល ជួយកែលំអ និងមានវិធានការទប់ស្កាត់៖ «បើសិនជាយើងកាត់បន្ថយថវិកាផ្សេងៗ ដូច្នេះវាធ្វើឲ្យប៉ះពាល់ដល់គម្រោង និងមានបញ្ហាដល់គុណភាព ទៅលើកិច្ចការសាធារណៈ។ ឧទាហរណ៍ សាលារៀន ផ្លូវថ្នល់ ឬមួយក៏សម្ភារៈបរិក្ខារ ឬក៏គម្រោងផ្សេងៗដែលត្រូវធ្វើនៅថ្នាក់មូលដ្ឋាន គឺធ្វើមិនបានល្អប្រសើរទេ បើសិនជាយើងបណ្ដែតបណ្តោយឲ្យមានការកាត់កង»។
យ៉ាងនេះក្តី មន្ត្រីក្រុមប្រឹក្សាឃុំ-សង្កាត់ខេត្តស្វាយរៀង ក៏បានស្នើឲ្យមន្ត្រីស្ថាប័នពាក់ព័ន្ធ ជួយពិនិត្យចំពោះការចំណាយថវិកាអភិវឌ្ឍន៍មូលដ្ឋាន ឲ្យចំគោលដៅ និងមានការអភិវឌ្ឍពិតប្រាកដ៕
No comments:
Post a Comment
yes