ខេត្តកណ្តាល ៖ ទារិកាដែលទើបនឹងកើត ត្រូវបានក្មេងរើសអេតចាយប្រទះឃើញនៅក្នុងធុងសំរាម នៅចំណុចខាងមុខចំណតរថយន្តតាខ្មៅ-កោះធំ ស្ថិតក្នុងភូមិតាខ្មៅ សង្កាត់/ក្រុងតាខ្មៅ ខេត្តកណ្តាល កាលពីវេលាម៉ោង១២នឹង៤០នាទី ថ្ងៃទី៧ ខែកញ្ញា ឆ្នាំ២០១២ បានធ្វើឲ្យភ្ញាក់ផ្អើលដល់ប្រជាពលរដ្ឋជាច្រើននាំគ្នាចោមរោលមើល។ ទារិកាដែលក្មេងរើសអេតចាយប្រទះឃើញនៅក្នុងធុងសំរាមនោះបានស្លាប់បាត់ទៅហើយ ដោយគេពុំបានដឹងថា អ្នកណាយកមកទម្លាក់ចោលតាំងពីពេលណានោះទេ។
លោក ស៊ឹម ប៊ុតបណ្ឌឹត អធិការនគរបាលក្រុងតាខ្មៅបានឲ្យដឹងថា ទារិកានេះត្រូវបានក្មេងរើសអេតចាយប្រទះឃើញនៅក្នុងធុងសំរាម ខណៈដែលក្មេងរើសអេតចាយកកាយរើសសំបកកំប៉ុងនៅក្នុងធុងសំរាម ទារិកាត្រូវបានគេដាក់ច្រកក្នុងស្បោងផ្លាស់ស្ទិចពណ៌ខ្មៅ ពីរជាន់ ដោយពុំដឹងថាអ្នកណាជាអ្នកមកបោះចោលនោះទេ។
ប្រជាពលរដ្ឋដែលមកចោមរោមមើលនិយាយថា ទារិកានេះទំនងជាកើតមកស្លាប់ ហើយបានជាគេច្រកស្បោងយកមកទម្លាក់ចោលនៅក្នុងធុងសំរាម ព្រោះបើគេយកមកពេលនៅរស់នោះច្បាស់ជាមានប្រជាពលរដ្ឋរស់នៅក្បែរ និងអ្នកលក់ដូរនៅក្បែរនោះ ឬក៍អ្នកធ្វើដំណើរឆ្លងកាត់បានឮសម្លេងជាក់ជាពុំខាន។ តែនេះគ្មានអ្នកណាម្នាក់បានដឹងទេ ប្រសិនបើក្មេងរើសអេតចាយកកាយរកសំបកដបទេនោះ ទារិកានេះច្បាស់ជាត្រូវរថយន្តដឹកសំរាមកិនខ្ទេចអស់ហើយ។
ក្រោយពីមានការភ្ញាក់ផ្អើលរួចមក សពទារិកាត្រូវបានសមត្ថកិច្ចនគរបាលក្រុងតាខ្មៅចាត់ចែងយកទៅកប់នៅក្នុងវត្តរួចរាល់អស់ហើយ៕
No comments:
Post a Comment
yes