ប្រធានគណបក្សប្រឆាំង លោក សម រង្ស៊ី និងជាប្រធានចលនាប្រជាធិបតេយ្យសង្គ្រោះជាតិ បានប្រកាសថា លោកមិនទៅបំភ្លឺនៅគណៈមេធាវីកម្ពុជា នៅថ្ងៃទី៩ ខែតុលា ទៅតាមការកោះហៅរបស់ប្រធានគណៈមេធាវីនោះទេ។
លោក សម រង្ស៊ី នៅក្នុងបន្ទប់ផ្សាយនៃវិទ្យុអាស៊ីសេរីនៅសហរដ្ឋអាមេរិក។
លោក សម រង្ស៊ី មានប្រសាសន៍តាមទូរស័ព្ទពីបរទេស នៅថ្ងៃទី២៤ កញ្ញា ថា ករណីគណៈមេធាវីកោះហៅរូបលោកនេះ លោកគ្មានការព្រួយបារម្ភអ្វីទេ ដូច្នេះ លោកក៏មិនបញ្ជូនតំណាងរបស់លោកទៅបំភ្លឺនៅគណៈមេធាវីកម្ពុជា ដែរ ពីព្រោះ លោកប្រកាសថា ទាំងតុលាការ ទាំងគណៈមេធាវីនៅក្រោមសម្ពាធនយោបាយរបស់រដ្ឋាភិបាល គឺស្ថាប័នទាំងពីរនេះមិនឯករាជ្យនោះទេ៖«សូម្បីតែរដ្ឋសភា ក៏ឡប់ឡែ តុលាការ ក៏ឡប់ឡែ វាអត់ប៉ះពាល់ដល់រូបខ្ញុំទេ។ ការតស៊ូរបស់ខ្ញុំ មិនមែនតែដើម្បីបុគ្គលនេះ បុគ្គលនោះទេ គឺចង់ឲ្យប្ដូរប្រព័ន្ធយុត្តិធម៌ទាំងមូល ដូចបំណងប្រជារាស្ត្រខ្មែរ ដែលស្អប់ខ្ពើមតុលាការស្រុកខ្មែរ»។
ការប្រកាសជំហររបស់លោក សម រង្ស៊ី មិនចូលទៅបំភ្លឺនៅគណៈមេធាវីកម្ពុជា នេះ នៅបន្ទាប់ពីលោក សម រង្ស៊ី ត្រូវបានប្រធានគណៈមេធាវីកម្ពុជា លោក ជីវ សុងហាក់ បានអញ្ជើញលោកដែលជាសមាជិកនៃគណៈមេធាវីមានអត្តលេខ១០៨ ឲ្យចូលបំភ្លឺនៅចំពោះមុខគណៈមេធាវី នៅថ្ងៃទី៩ តុលា អំពីសាលដីកាសាលាឧទ្ធរណ៍ផ្ដន្ទាទោសលោក។
អ្នកនាំពាក្យគណៈមេធាវីកម្ពុជា លោក យឹម សារី បានឲ្យដឹងកាលពីថ្ងៃទី២៣ កញ្ញា ថា តាមច្បាប់ និងលក្ខន្តិកៈរបស់មេធាវី ប្រសិនបើមេធាវីណាម្នាក់ត្រូវបានតុលាការផ្ដន្ទាទោសពីបទណាមួយហើយ គឺមេធាវីនោះ អាចត្រូវលុបឈ្មោះចេញពីគណៈមេធាវី។ ប៉ុន្តែ ករណីលោក សម រង្ស៊ី នេះ លោក យឹម សារី បានបញ្ជាក់ថា លោកមិនទាន់ដឹងនៅឡើយទេ ថាតើគណៈមេធាវីនឹងត្រូវសម្រេចយ៉ាងណាទេ បញ្ហានេះ អាស្រ័យលើការចូលបំភ្លឺរបស់លោក សម រង្ស៊ី នៅថ្ងៃទី៩ តុលា៖ «យើងអត់ទាន់បានដឹងថា ក្រុមប្រឹក្សា គាត់សម្រេចយកទោសបែបណាមួយនោះទេ ពីព្រោះ ទោសវាមានច្រើន ទោសវាមានការស្ដីបន្ទោស ការព្រមាន ការលុបឈ្មោះចេញពីបញ្ជី ការផ្អាកមិនឲ្យប្រកបវិជ្ជាជីវៈជាបណ្ដោះអាសន្ន ឬក៏ទោសហាមមិនឲ្យមានសិទ្ធិបោះឆ្នោត នៅក្នុងមហាសន្និបាត ឬឈរជាប្រធានគណៈមេធាវី ឬក៏លុបឈ្មោះចោលតែម្ដង។ អ៊ីចឹង ក្នុងទោសទាំងអស់នោះ យើងមិនទាន់ដឹងថា ចំណុចណាមួយនៅឡើយទេ។ អ៊ីចឹង រង់ចាំតែគាត់មក ហើយក្រុមប្រឹក្សាសម្រេចទៅតាមឆន្ទានុសិទ្ធិរបស់គាត់»។
លោក សម រង្ស៊ី ត្រូវបានតុលាការកាត់ទោសឲ្យជាប់ពន្ធនាគារចំនួន ១២ឆ្នាំ ពីបទបំផ្លាញតម្រុយបង្គោលព្រំដែនកម្ពុជា-វៀតណាម និងបទក្លែងបន្លំឯកសារពាក់ព័ន្ធនឹងផែនទីព្រំដែនកម្ពុជា-វៀតណាម។ ប៉ុន្តែ ការកាត់ទោសនេះ ត្រូវបានគណបក្សប្រឆាំងបានច្រានចោល និងអះអាងថា តុលាការមិនឯករាជ្យ តុលាការស្ថិតនៅក្រោមឥទ្ធិពលអ្នកនយោបាយ។ រីឯក្រុមមន្ត្រីសិទ្ធិមនុស្សជាតិ និងអន្តរជាតិ បានចាត់ទុកថា ការកាត់ទោសលោក សម រង្ស៊ី ជារឿងនយោបាយ។
ទោះបីជាយ៉ាងណាក៏ដោយ ករណីគណៈមេធាវីកម្ពុជា បានចេញលិខិតកោះហៅលោក សម រង្ស៊ី នេះ ជារលកនយោបាយមួយថ្មីទៀតដែលលោក សម រង្ស៊ី កំពុងតែប្រឈម ទោះបីជាលោក សម រង្ស៊ី បានប្រកាសថា លោកមិនចាប់អារម្មណ៍ចំពោះករណីនេះក៏ដោយ។
ទាក់ទងនឹងករណីនេះ ក្រុមអ្នកវិភាគបានបញ្ចេញទស្សនៈខុសៗគ្នា ខ្លះថាការកោះហៅលោក សម រង្ស៊ី របស់គណៈមេធាវីនេះ អាចថា ជាការតថ្លៃគ្នាផ្នែកនយោបាយ ពីព្រោះថា បច្ចុប្បន្ននេះ គណបក្សប្រឆាំងកំពុងទាមទារឲ្យរដ្ឋាភិបាល ធ្វើកំណែទម្រង់គណៈកម្មាធិការជាតិរៀបចំការបោះឆ្នោត (គ.ជ.ប)។
ប៉ុន្តែទស្សនៈខ្លះថា ការកោះហៅលោក សម រង្ស៊ី នៅពេលនេះ ជារឿងដាក់បន្ទុក ឬសម្ពាធនយោបាយមកលើរូបលោក សម រង្ស៊ី កាន់តែខ្លាំងថែមទៀតទៅវិញ។
អ្នកជំនាញផ្នែកវិទ្យាសាស្ត្រនយោបាយ និងជាអ្នកវិភាគឯករាជ្យ លោកបណ្ឌិត សុខ ទូច បានលើកឡើងថា ទោះបីជាលោក សម រង្ស៊ី មិនអាចចូលស្រុកវិញបានដោយសារតែប្រឈមនឹងការទទួលទោសនោះក្ដី តែលោកពន្យល់ថា លោក សម រង្ស៊ី ត្រូវតែបញ្ជូនមេធាវីរបស់ខ្លួនចូលទៅបំភ្លឺជំនួសលោក នៅការិយាល័យគណៈមេធាវី ទៅតាមកាលកំណត់របស់គណៈមេធាវី។
លោក សុខ ទូច បានលើកជាឧទាហរណ៍មេបក្សប្រឆាំងនៅប្រទេសភូមា ដែលប្រកាន់គោលជំហរទន់ភ្លន់ ដើម្បីដោះស្រាយបញ្ហា៖ «លោកស្រី អ៊ុងសាន ស៊ូជី ថា អ្នកនយោបាយមិនត្រូវប្រកាន់អស្មិមានះ អ្នកនយោបាយត្រៀមខ្លួនទន់ភ្លន់ ដើម្បីដោះស្រាយបញ្ហា នេះជាសម្ដីល្អណាស់សម្រាប់ឲ្យអ្នកនយោបាយត្រូវពិចារណា និងគិត។ គាត់និយាយមួយឃ្លាទៀតថា បើសិនជាអ្នកនយោបាយប្រកាន់គោលការណ៍ច្បាស់លាស់ អ៊ីចឹងមិនបាច់ធ្វើនយោបាយទេ។ យ៉ាងណាក៏ដោយ លោក សម រង្ស៊ី ត្រូវបញ្ជូនតំណាងរបស់គាត់ ឬមេធាវីរបស់គាត់ ទៅគណៈមេធាវី ដើម្បីឲ្យដឹងរឿងហ្នឹង»។
លោក សម រង្ស៊ី បានសិក្សាបញ្ចប់ថ្នាក់អនុបណ្ឌិតផ្នែកពាណិជ្ជសាស្ត្រ សេដ្ឋកិច្ច និងជំនាញផ្នែកវិទ្យាសាស្ត្រនយោបាយ នៅប្រទេសបារាំង។ លោកបានចូលជាសមាជិកនៃគណៈមេធាវីកម្ពុជា ក្នុងរយៈពេលប្រមាណជា ១៥ឆ្នាំមកហើយ។
ដោយឡែកអ្នកវិភាគឯករាជ្យ អ្នកស្រី ជា វណ្ណាត បានរៀបរាប់ថា អ្នកនយោបាយកម្ពុជា បានក្លាយទៅជារឿងប្រវត្តិសាស្ត្រទៅហើយ ដែលគណបក្សប្រឆាំង និងគណបក្សកាន់អំណាចមិនចុះសម្រុងនឹងគ្នា។ អ្នកស្រីសង្កត់ធ្ងន់ថា នេះមិនមែនជាលើកទី១ ទេ ដែលលោក សម រង្ស៊ី ត្រូវនិរទេសខ្លួនដោយសារតែរឿងនយោបាយ។
នៅត្រង់ចំណុចនេះ អ្នកស្រី ជា វណ្ណាត បានបន្ថែមថា ករណីគណៈមេធាវីកោះហៅលោក សម រង្ស៊ី នេះ ជារឿងដាក់សម្ពាធផ្នែកនយោបាយមួយកម្រិតទៀត មកលើរូបលោក សម រង្ស៊ី។ តែយ៉ាងនេះក្ដី អ្នកស្រីមានសុទិដ្ឋិនិយមថា នៅទីបំផុត នឹងមានដំណោះស្រាយផ្នែកនយោបាយវិញ ចំពោះករណីលោក សម រង្ស៊ី នេះ៖ «តាំងពីឆ្នាំ១៩៩៨ មក ជំនាន់ហ្នឹងក៏មានបញ្ហាសម្ដេចក្រុមព្រះនរោត្តម រណឫទ្ធិ និងលោក សម រង្ស៊ី ដែរ។ ប៉ុន្តែ នៅតែមានការចរចាគ្នាអ៊ីចឹង ដើម្បីមករួមការបោះឆ្នោតហ្នឹង»។
លើសពីនេះទៀត បញ្ហាលោក សម រង្ស៊ី កំពុងនិរទេសខ្លួននៅក្រៅប្រទេសនេះ ទាំងអ្នកជំនាញផ្នែកវិទ្យាសាស្ត្រនយោបាយ លោកបណ្ឌិត សុខ ទូច ទាំងអ្នកសិក្សាផ្នែកអភិវឌ្ឍន៍សង្គម លោក កែម ឡី បានលើកហេតុផលដូចគ្នាថា លោក សម រង្ស៊ី ត្រូវតែចូលខ្លួនមកប្រទេសកម្ពុជា មកតតាំងនឹងតុលាការ និងគណៈមេធាវីវិញប្រសើរជាង ទោះបីជាសាធារណជនជាតិ និងអន្តរជាតិដឹងច្បាស់ថា តុលាការកម្ពុជា មិនឯករាជ្យ និងស្ថិតនៅក្រោមសម្ពាធអ្នកនយោបាយក្ដី។
លោក កែម ឡី បានអះអាងថា បើសិនជាលោក សម រង្ស៊ី ចូលខ្លួនមកតាមការកោះហៅរបស់គណៈមេវី ឬតាមការកោះហៅរបស់តុលាការកន្លងមកនោះ ជាការឆ្លុះបញ្ចាំងអំពីសេចក្ដីក្លាហាននៃការតតាំងចំពោះមុខច្បាប់ ឬអំពើអយុត្តិធម៌។ លោកបញ្ជាក់ថា ការធ្វើដូច្នេះ សម្រាប់ជាគំរូល្អដល់ប្រជាពលរដ្ឋខ្មែរ ឲ្យលែងមានការភ័យខ្លាចអំពីការគំរាមកំហែង និងធ្វើឲ្យប្រជាពលរដ្ឋទូទៅមានភាពក្លាហាន ហ៊ានប្រឈមចំពោះមុខច្បាប់៖ «បើគាត់ហ៊ានមកប្រឈម គាត់ហ៊ានមកបកស្រាយជានយោបាយល្អបំផុតហើយ តែបើគាត់កំសាករបៀបនេះ ខ្ញុំគិតថា ខាងរដ្ឋាភិបាលគាត់ចង់ប្រើប្រាស់ប្រព័ន្ធអីក៏បានដែរ ពីព្រោះថា គាត់មិនបានចូលមកតតាំង មិនបានមកធ្វើជាសាក្សី នៅក្នុងតុលាការដែលតុលាការចោទប្រកាន់ប្រឆាំងនឹងលោក»។
ឆ្លើយតបទៅនឹងការលើកឡើងនេះ លោក សម រង្ស៊ី បានប្រកាសថា លោកនឹងចូលមកប្រទេសកម្ពុជា នៅក្នុងពេលឆាប់ៗ នៅមុនពេលការបោះឆ្នោតជាតិឆ្នាំ២០១៣ ខាងមុខ។
ភ្ជាប់ទៅនឹងបញ្ហានេះ ក្រុមអ្នកវិភាគបានលើកឡើងថា លោក សម រង្ស៊ី មិនមែនជាអ្នកទោសបំផ្លាញជាតិ ដូចជាកាប់បំផ្លាញព្រៃឈើ និងលុបបឹងបួធម្មជាតិនោះទេ ទោសរបស់លោក សម រង្ស៊ី ទាក់ទងទៅនឹងបញ្ហាបូរណភាពទឹកដី បញ្ហាប្រទេសជាតិ។ ដូច្នេះ អ្នកវិភាគបានជំរុញឲ្យលោក សម រង្ស៊ី វិលត្រលប់ចូលស្រុកវិញ ទោះបីជាលោកប្រឈមនឹងការចាប់ខ្លួន ឬយ៉ាងណាក៏ដោយ៕
No comments:
Post a Comment
yes