ខេត្ដបាត់ដំបង ៖ ប្រជាពលរដ្ឋរស់នៅក្នុងទីរួមខេត្ដបាត់ដំបងបានត្អូញត្អែរអំពីភាពមិនប្រក្រតីនៃកុងទ័រភ្លើងដែលគាត់ ប្រើប្រាស់តែងឡើងចុះជួនច្រើនហួសហេតុ និងការទារតម្លៃថ្លៃ នៅពេលពួកគាត់សុំតបណ្ដាញថ្មី ឬផ្លាស់ប្ដូរកុងទ័រភ្លើងម្ដងៗ ។
ស្ដ្រីម្នាក់អាយុ៤២ឆ្នាំ រស់នៅភូមិ ព្រែកមហាទេព សង្កាត់ស្វាយប៉ោ ក្រុង បាត់ដំបង បានរៀបរាប់ឱ្យកាសែតនគរវត្ដ ដឹងថា នៅក្នុងផ្ទះរបស់គាត់គឺប្រើប្រាស់ អំពូល៦តឹក១, ទូរទស្សន៍១គ្រឿង, ខ្នោសកោសដូង១ ដែលជាទូទៅប្រើប្រាស់ អស់ថវិកា៣៥.០០០ក្នុង១ខែ ប៉ុន្ដែនៅ ខែខ្លះ ផ្ទះរបស់គាត់បានប្រើប្រាស់អស់ ថវិកាជាង៥០.០០០រៀលក៏មាន ។
ស្ដ្រីរូបនោះបន្ដទៀតថា នៅខែសីហា គឺគាត់មិនសូវបាននៅផ្ទះនោះទេ ហើយ ក៏មិនសូវបានប្រើប្រាស់ភ្លើងដែរ ប៉ុន្ដែ បែរជាត្រូវបង់ថ្លៃភ្លើងអស់ជាង៥០.០០០ រៀលទៅវិញ ដែលប្រការនេះធ្វើឱ្យគាត់ មានភាពងឿងឆ្ងល់យ៉ាងខ្លាំង ។
ប្រជាពលរដ្ឋម្នាក់ទៀតរស់នៅភូមិអង្គរ សង្កាត់អូរចា ក្រុងបាត់ដំបង បានឱ្យដឹង ដែរថា គាត់ជាអតិថិជនថ្មីដែលទើបនឹង តបណ្ដាញអគ្គិសនីមកប្រើ ដោយត្រូវ ចំណាយប្រាក់២៥០ដុល្លារ ក្នុងនោះខាង អគ្គិសនីខេត្ដបាត់ដំបង បានឱ្យគាត់តែ កុងទ័រភ្លើង១តែប៉ុណ្ណោះ ថ្លៃខ្សែត្រូវទិញ ខ្លួនឯង ។ លុះក្រោយមកទៀតមានអតិថិ ជនថ្មីម្នាក់ទៀតបានសុំតបណ្ដាញភ្លើងប្រើ ដូចរូបគាត់ដែរ គឺខាងអគ្គិសនីបានតម្រូវ ឱ្យបង់ប្រាក់២០០ដុល្លារក្នុង១ឈ្មោះ ដោយ គ្រាន់តែចំណាយថ្លៃកុងទ័រភ្លើងដូចគ្នា ។
ប្រជាពលរដ្ឋម្នាក់ទៀតអាយុ៥៨ឆ្នាំ រស់នៅសង្កាត់ទួលតាឯក ក្រុងបាត់ដំបង បានឱ្យដឹងថា ក្នុងផ្ទះរបស់គាត់បាន តកុងទ័រប្រើប្រាស់អគ្គិសនីជាយូរឆ្នាំមក ហើយ ដោយសារតែតម្រូវការប្រើប្រាស់ ក្នុងផ្ទះចេះតែកើនឡើង ធ្វើឱ្យកុងទ័រចាស់ តែងតែរអាក់រអួល នៅពេលដែលស្នើសុំ ផ្លាស់ប្ដូរកុងទ័រថ្មី គឺខាងអគ្គិសនីតម្រូវឱ្យ បាត់បង់ប្រាក់៣៥០ដុល្លារ ពោលគឺលើស ពីអ្នកតបណ្ដាញថ្មីទៅទៀត ជាហេតុធ្វើឱ្យ រូបគាត់ទ្រាំប្រើប្រាស់កុងទ័រចាស់ ទោះបី កុងទ័រប្រើរអាក់រអួលធ្វើឱ្យឡើងគីឡូ ក៏ដោយ ។
ប្រជាពលរដ្ឋនៅក្នុងខេត្ដបាត់ដំបង បានឱ្យដឹងថា ការឡើងចុះចំនួនគីឡូវ៉ាត់ ភ្លើងរបស់ពួកគាត់ បើអ្នកណាមានពេល ទំនេរទៅតវ៉ា គឺខាងអគ្គិសនីនឹងបញ្ចុះ តម្លៃឱ្យខ្លះ ហើយចំពោះអ្នកណាគ្មានពេល វេលាតវ៉ា គឺត្រូវតែបង់ទៅតាមវិក្កយបត្រ ដែលគេចេញឱ្យ ។
លោក ទីវ រ៉ាវុទ្ធ ប្រធានអគ្គិសនី បាត់ដំបងបានឱ្យដឹងថា ប្រសិនបើបង ប្អូនប្រជាពលរដ្ឋមានបញ្ហាកុងទ័រអគ្គិសនី ឡើងចុះកុងទ័រ សូមឱ្យទៅទំនាក់ទំនងនៅការិយាល័យអគ្គិសនី ហើយសម្រាប់ អតិថិជនថ្មីក៏យ៉ាងដូច្នេះដែរ ពីព្រោះអ្វីៗ គឺយើងអាចនិយាយគ្នាបាន ។
ជាមួយនឹងហេតុការណ៍ខាងលើនេះ ពួកគាត់បានអំពាវនាវដល់អាជ្ញាធរ អគ្គិសនីខេត្ដ មេត្ដាកុំចេះតែជំរិតទារប្រាក់ តាមតែអំពើចិត្ដ ដោយមិនបានកំណត់ តម្លៃឱ្យបានច្បាស់លាស់ ដូចជាកុងទ័រ ភ្លើងឡើងចុះៗ ដោយពេលខ្លះមិនបាន ទាំងប្រើផង បែរជាអស់ច្រើនជាងខែណា ដែលប្រើទៅវិញ ។ ជាងនេះទៅទៀត ការតភ្ជាប់ចរន្ដអគ្គិសនីថ្មី អ្នកខ្លះតម្រូវឱ្យបង់២៥០ដុល្លារ និងអ្នកខ្លះទៀត៣០០ដុល្លារក៏មាននោះ ៕
No comments:
Post a Comment
yes