គ្រូបង្រៀននៅខេត្តចំនួនពីរ អំពាវនាវដល់ក្រសួងអប់រំ យុវជន និងកីឡា ឲ្យស៊ើបអង្កេតករណីមិនបើកប្រាក់ឧបត្ថម្ភបំប៉ននៅថ្ងៃព្រហស្បតិ៍ ប្រាក់បង្រៀនគួបថ្នាក់ និងបង្រៀនពីរពេល សម្រាប់គ្រូកម្រិតបឋមសិក្សា និងប្រាក់បង្រៀនម៉ោងបន្ថែមរបស់គ្រូកម្រិតមធ្យមសិក្សា។
គ្រូបង្រៀននៅសាលាបឋមសិក្សាក្នុងខេត្តរតនគិរី និងគ្រូវិទ្យាល័យ និងអនុវិទ្យាល័យ ខេត្តកំពង់ស្ពឺ នៅថ្ងៃពុធ ទី៥ ខែកញ្ញា ឆ្នាំ២០១២ ឲ្យដឹងថា គ្រូបង្រៀនមួយចំនួនធំ កំពុងថ្នាំងថ្នាក់ដោយសារមន្ត្រីមន្ទីរអប់រំខេត្ត ខកខានបើកប្រាក់បំពេញការងាររបស់គ្រូតាមគោលការណ៍ក្រសួងអប់រំ។
គ្រូបង្រៀននៅសាលាបឋមសិក្សាបុរីកម្មករ ក្រុងបានលុង ខេត្តរតនគិរី មួយរូបសុំមិនឲ្យបញ្ចេញឈ្មោះ មានប្រសាសន៍បញ្ជាក់ថា គ្រូបង្រៀននៅតាមសាលាបឋមសិក្សានានាក្នុងខេត្តនេះ មិនបានបើកប្រាក់បំប៉នសម្រាប់ថ្ងៃព្រហស្បតិ៍ ក្នុងខែវិច្ឆិកា ឆ្នាំ២០១១ និងប្រាក់បង្រៀនគួបថ្នាក់ ប្រាក់បង្រៀនពីរពេលក្នុងខែមិថុនា និងខែកក្កដា ឆ្នាំ២០១២ នៅឡើយ។ លោកចោទប្រកាន់ទៅលើមន្ត្រីមន្ទីរអប់រំខេត្តថា ជាអ្នកបង្កើតភាពមិនប្រក្រតី ដែលអាចពាក់ព័ន្ធទៅនឹងអំពើពុករលួយក្នុងបញ្ហានេះ៖ «ក្រសួងហ្នឹង មេត្តាត្រួតពិនិត្យទៅលើមន្ត្រីមន្ទីរអប់រំនៅខេត្តឲ្យបានច្បាស់លាស់ កុំឲ្យគាត់ធ្វើស្រែលើខ្នងគ្រូបង្រៀនហ្នឹងណា គាត់កំពុងធ្វើបាបគ្រូបង្រៀន ហើយកាលណាធ្វើបាបគ្រូបង្រៀន ធ្វើឲ្យគ្រូបង្រៀនបាក់ទឹកចិត្ត»។
ដូចគ្នានេះដែរ គ្រូបង្រៀននៅវិទ្យាល័យស្រុកឧត្តុង្គ ខេត្តកំពង់ស្ពឺ មួយរូបសុំមិនឲ្យបញ្ចេញឈ្មោះ បញ្ជាក់ឲ្យដឹងដែរថា ប្រាក់បង្រៀនម៉ោងបន្ថែមរបស់គ្រូវិទ្យាល័យ និងអនុវិទ្យាល័យ ក្នុងខេត្តនេះក៏មិនទាន់បានបើកពីត្រីមាសទីពីរ និងត្រីមាសទីបី ឆ្នាំ២០១២ នេះ។ លោកបន្តថា ការយឺតយូរនេះ បង្កបញ្ហាលំបាកដល់គ្រូបង្រៀនដែលពឹងផ្អែកទៅលើប្រាក់បំពេញការងារបម្រើជីវភាពប្រចាំថ្ងៃ៖ «បង្រៀននៅវិទ្យាល័យហ្នឹង មួយម៉ោងបាន៥.២០០ អនុវិទ្យាល័យគេឲ្យ២.៦០០។ ឥឡូវ ខ្ញុំបើកបានមួយត្រីមាស ហើយនៅសល់ពីរត្រីមាសទៀតអត់ទាន់បើកឲ្យម៉ោងលើសផ្សព្វផ្សាយផង អត់ទាន់បានបើកសោះ»។
ឆ្លើយតបបញ្ហានេះ ប្រធានមន្ទីរអប់រំខេត្តរតនគិរី លោកស្រី ចាន់ ខាំឃឿន មានប្រសាសន៍ដោយសុំមិនឲ្យចាក់ផ្សាយសំឡេងផ្ទាល់ថា អ្នកស្រីសុំមិនអត្ថាធិប្បាយពីបញ្ហានេះទេ ក៏ប៉ុន្តែ លោកស្រីសំណូមពរឲ្យគ្រូបង្រៀនណាដែលមានបញ្ហាទាក់ទិនប្រាក់បំពេញការងារនេះ ឲ្យអញ្ជើញមកមន្ទីរអប់រំ ដើម្បីទទួលការពន្យល់ពីបញ្ហានេះ។
ចំណែកប្រធានការិយាល័យគណនេយ្យ នៃមន្ទីរអប់រំខេត្តកំពង់ស្ពឺ លោក ឌុច ប៊ុនថុល មានប្រសាសន៍បដិសេធថា លោកក៏មិនបានដឹងពីមូលហេតុនៃការមិនទាន់បើកប្រាក់បន្ថែមម៉ោងរបស់គ្រូមធ្យមសិក្សាក្នុងខេត្តនេះទេ៖ «ខ្ញុំអត់ច្បាស់ ចាំសួរខាងជំនាញសិនណា»។
របាយការណ៍អង្កេតរបស់សមាគមគ្រូបង្រៀនកម្ពុជាឯករាជ្យ ឲ្យដឹងថា ភាពមិនប្រក្រតីទាក់ទិនការយឺតយ៉ាវបើកប្រាក់បំពេញការងារជូនគ្រូបង្រៀន កើតមានស្ទើរគ្រប់ខេត្ត-ក្រុង ក៏ប៉ុន្តែ រហូតបច្ចុប្បន្ន គ្រឹះស្ថានសិក្សានៅខេត្ត-ក្រុងធំៗមួយចំនួន បានកែលំអហើយ។ ផ្ទុយទៅវិញ ករណីនេះបានកើតមានច្រើនវិញនៅតាមគ្រឹះស្ថានសិក្សានៅតាមបណ្តាខេត្តតូចៗ ដូចជាខេត្តរតនគិរី ឧត្តរមានជ័យ ជាដើម។
ប្រធានសមាគមគ្រូបង្រៀនកម្ពុជាឯករាជ្យ លោក រ៉ុង ឈុន មានប្រសាសន៍បញ្ជាក់ថា ភាពមិនប្រក្រតីទាក់ទិនការយឺតយ៉ាវបើកប្រាក់ការងារជូនគ្រូបង្រៀន គឺមានជាប់ពាក់ព័ន្ធនឹងអំពើពុករលួយរបស់មន្ត្រីថ្នាក់អប់រំនៅមូលដ្ឋាន។ លោកបន្តថា បញ្ហានេះជះឥទ្ធិពលខ្លាំងដល់ជីវភាពរស់នៅរបស់គ្រូបង្រៀនផ្ទាល់ និងគុណភាពបង្រៀនរបស់គ្រូដល់សិស្ស៖ «គឺមកពីមន្ត្រីថ្នាក់ក្រោមក្រសួងហ្នឹងខិលខូច ដោយសារលុយទាំងអស់ហ្នឹងឋិតក្នុងគម្រោងចំណាយហើយ។ មួយចំនួនបានយកលុយហ្នឹង ទៅប្រើប្រាស់ដើម្បីផលចំណេញ ប៉ុន្តែ សំខាន់ក្រសួងអប់រំមានសេចក្តីក្លាហាននឹងធ្វើការអនុវត្តកុំអូសបន្លាយស្ថានភាពបែបហ្នឹងតទៅទៀត បើមិនធ្វើការកែលំអឲ្យបាន យើងអត់អាចទទួលបានការអប់រំល្អទេ»។
អគ្គនាយកនៃអគ្គនាយកដ្ឋានអប់រំ ក្រសួងអប់រំ លោក សម សេរីរដ្ឋ បដិសេធមិនធ្វើអត្ថាធិប្បាយជាមួយវិទ្យុអាស៊ីសេរី នៅថ្ងៃពុធ ទី៥ ខែកញ្ញា នេះ ដោយលោកបញ្ជាក់ថា រវល់ជាប់ប្រជុំ។
យ៉ាងនេះក្តី ប្រធានសមាគមគ្រូបង្រៀន លោក រ៉ុង ឈុន ផ្តល់យោបល់ថា ក្រសួងអប់រំត្រូវតែដាក់វិន័យ ឬចាត់វិធានការផ្លូវច្បាប់ចំពោះមន្ត្រី ឬបុគ្គលិកអប់រំណាដែលបានប្រព្រឹត្តខុសទៅនឹងគោលការណ៍បើកប្រាក់របស់ក្រសួងអប់រំ ឬបានប្រព្រឹត្តអំពើពុករលួយទាក់ទិនបើកប្រាក់ជូនគ្រូបង្រៀនជាដើម៕
No comments:
Post a Comment
yes