ខេត្តកំពត: អ្នកភូមិគីឡូដប់ពីរ ឃុំបឹងទូក ស្រុកទឹកឈូ ប្រមាណពី ៣០នាក់ ទៅ ៤០នាក់ នាព្រឹកថ្ងៃទី៥ ខែតុលា ឆ្នាំ២០១២ នៅតែបន្តស្វែងរកបុរសម្នាក់ បន្ទាប់ពីបាត់ខ្លួន តាំងពីបីថ្ងៃមុន ខណៈពេលឡើងភ្នំបូកគោ ដើម្បីរើសផ្លែខោស យកមកលក់។
ក្រុមអ្នកភូមិមួយចំនួនតូច បានផ្តោតការសង្ស័យពីសត្វសាហាវ ចាប់ ខណៈដែលមន្ត្រីនៃមន្ទីរបរិស្ថាន អះអាងថា នៅចំណុចបាត់ខ្លួននោះ មិនមានសត្វសាហាវទេ។
លោក ប៉ូង កន នាយប៉ុស្តិ៍ប៉ូលិសរដ្ឋបាលឃុំបឹងទូក ឲ្យដឹងថា កាលពីថ្ងៃទី៣ ខែតុលា ឆ្នាំ២០១២ អ្នកភូមិជាច្រើននាក់ បាននាំគ្នាឡើងលើភ្នំបូកគោ ដើម្បីរើសផ្លែខោស យកមកលក់។ ពេលដល់ចំណុចមួយ ក្បែរទឹកធ្លាក់បីថ្នាក់ ដោយសារបុរសម្នាក់ មានសភាពមិនសូវស្រួលខ្លួន អ្នកភូមិក៏ឱ្យសម្រាក នៅល្អាងថ្មម្នាក់ឯង។ លុះពេលត្រឡប់មកជួបជុំគ្នាវិញ ស្រាប់តែបាត់បុរសនោះ ទើបអ្នកភូមិនាំគ្នា ស្វែងរកគ្រប់ច្រកល្ហក រហូតដល់យប់ នៅតែមិនឃើញ ក៏វិលត្រឡប់មកភូមិស្ថាន និងរាយការណ៍ប្រាប់ប៉ូលិសមូលដ្ឋាន ហើយបន្តតាមរកទៀតនៅថ្ងៃបន្ទាប់។
លោកមេប៉ុស្តិ៍ បន្តថា មកដល់ថ្ងៃនេះ (៥តុលា) ការរុករក ដែលមានការចូលរួមដោយសាច់ញាតិ និងអ្នកភូមិប្រមាណពី ៣០នាក់ ទៅ ៤០នាក់នោះ មិនទាន់ទទួលបាននូវលទ្ធផលយ៉ាងណាទេ។ នេះអាចបុរស ដែលមិនស្រួលខ្លួននោះ ចេញដើរម្នាក់ឯងពីកន្លែងសម្រាក ហើយវង្វេងក្នុងព្រៃ ក៏ថាបាន។
បុរសដែលបានបាត់ខ្លួននោះ ឈ្មោះ សុខ ដាំ អាយុ ៥១ឆ្នាំ មានទីលំនៅភូមិគីឡូដប់ពីរ ឃុំកោះតូច ស្រុកទឹកឈូ ខេត្តកំពត។
អ្នកភូមិមួយចំនួនសង្ស័យថា ជនរងគ្រោះ អាចត្រូវវសត្វចាប់ ពីព្រោះនៅក្បែរចំណុចទឹកធ្លាក់បីថ្នាក់នោះ សម្បូរដោយសត្វសាហាវ។
ទាក់ទិននឹងបញ្ហាសត្វព្រៃនេះ លោក ស៊ុយ ធា ប្រធានមន្ទីរបរិស្ថាន ខេត្តកំពត បញ្ជាក់ថា នៅត្រង់ចំណុចក្បែរទឹកធ្លាក់នោះ មិនមានសត្វសាហាវទេ។ ក្នុងបរិវេណភ្នំបូកគោ ពិតជាមានសត្វខ្លា ដំរី និងពួកសត្វដទៃទៀត តែស្ថិតនៅព្រៃជ្រៅៗ ដែលជំនាញ កំពុងសិក្សាស្រាវជ្រាវ៕
No comments:
Post a Comment
yes