តារាសម្ដែង ជី ចាងវុក ដែលគេស្គាល់តាមរយៈតួអង្គ ដុងហេ
ភ្នំពេញ : តារាសម្តែង កូរ៉េខាងត្បូង ជី ចាងវុក (Ji Chang Wook) ដែលមិត្តអ្នកអានភាគច្រើនស្គាល់លោកថា ដុង ហេ តាមរយៈការសម្តែងរឿង «ស្នាម ញញឹមជាថ្មី» សព្វថ្ងៃកំពុងតែសម្ដែងក្នុងខ្សែភាពយន្តភាគ រឿង «ម្រាមដៃ៥» ក្នុងតំណែងជាតួរងជាកូនសេដ្ឋីចរិតឆ្មើងឆ្មៃ។
ទាក់ទិន នឹងភាពយន្តអំពីជីវិតតស៊ូ និងមនោសញ្ចេតនានេះ ជី ចាងវុក បានរំឭកពីប្រវត្តិស្នេហារបស់ខ្លួនថា៖ «ខ្ញុំធ្លាប់ស្រឡាញ់ស្រីម្នាក់នៅពេលដែលខ្ញុំរៀនថ្នាក់បញ្ចប់នៅ វិទ្យាល័យ។ មកទល់បច្ចុប្បន្ន ខ្ញុំធ្លាប់ទាក់ទងស្រីៗ៥នាក់ហើយ ប៉ុន្តែឥឡូវនេះខ្ញុំពិតជាឯកាណាស់ដែលគ្មានសង្សារ»។
នៅក្នុង ភាពយន្តភាគថ្មីនេះ ជី ចាងវុក ដើរតួជាកូនសេដ្ឋីដ៏ស្ដុកស្ដម្ភ ដែលមានចរិតទំនើងធ្វើអ្វីតាមតែចិត្តចង់។ លុះដល់ឪពុករបស់ខ្លួនរកឃើញកូនក្រៅខោម្នាក់ទៀតមករួមរស់ក្រោម ដំបូលតែមួយ ចរិតទំនើងនេះក៏កាន់តែសាបរលាបបន្តិចម្ដងៗ។
ទាក់ទិននឹងជីវប្រវត្តិរបស់ ជី ចាងវុក តារាភាពយន្តរូបនេះជាកូនទោល ដែលកើតនៅថ្ងៃទី ៥ ខែកក្កដា ឆ្នាំ១៩៨៧។
កាលពី យុវភាព ជី ចាងវុក មានបំណងប្រាថ្នាក្លាយជាវិស្វករនាថ្ងៃអនាគត ប៉ុន្តែក្ដីសុបិនរបស់ខ្លួនចេះតែរេរាដោយជួនកាលចង់ធ្វើជាប៉ូលិស គ្រូបង្រៀន ចៅក្រម មេធាវី ឬពេទ្យ ដោយឥតមានទិសដៅច្បាស់លាស់។
ប៉ុន្តែ ជី ចាងវុក ចាប់ផ្ដើមសាងក្ដីសុបិនក្នុងវិស័យសិល្បៈនៅពេលដែលខ្លួនជាប់ជា សិស្សនៃសាកលវិទ្យាល័យ ដេនគុក ផ្នែកសម្ដែង និងភាពយន្ត។
តាមការពិតទៅ លោកជីមានឫសគល់ចេញពីការសម្ដែងល្ខោនសម័យទំនើប មុននឹងប្រឡូកក្នុងវិស័យភាពយន្ត។
ថ្វី ដ្បិតតែលោកសម្ដែងច្រើនតែភាពយន្តភាគមនោសញ្ចេតនា ប៉ុន្តែតារារូបនេះបានឲ្យដឹងថា៖ «ខ្ញុំចូលចិត្តមើលភាពយន្តបែបរន្ធត់ញាប់ញ័រណាស់»។
ក្រោយពីប្រឡូកក្នុងវិស័យសិល្បៈបានយូរក្រែល ជី ជាងវុក ថតបាន ៧ រឿងភាគវែងៗ និង៣ខ្សែភាពយន្តខ្នាតខ្លីហើយ។
ប៉ុន្តែ មានតែរឿងភាគ «ស្នាមញញឹមជាថ្មី» ទេដែលធ្វើឲ្យតារាកម្ពស់១,៨២ម៉ែត្រនេះទទួលបានពានតារាប្រុស ឆ្នើម ដែលសម្តែងល្អឥតខ្ចោះឆ្នាំ ២០១១ ពីប៉ុស្តិ៍ទូរទស្សន៍ KBS។
រីឯ រឿងភាគបុរាណមួយទៀត ចំណងជើងថា អ្នកចម្បាំង ប៊េកដ ដុងស៊ូ ក៏ធ្វើឲ្យតារានេះទទួលបានពានខាងតារាសម្តែងឆ្នើមថ្មី ប្រចាំឆ្នាំ២០១១ ពីប៉ុស្តិ៍ទូរទស្សន៍ SBS របស់កូរ៉េផងដែរ។
បើនិយាយ ដល់តារាភាពយន្តសំណព្វក្នុងកែវភ្នែករបស់លោក ជី ចាងវុក វិញ គឺលោកតែងតែនិយមគាំទ្រតារាហូលីវូត ប្រេត ភីត ជាស្វាមីឥតរៀបការរបស់នាង អេនជឺលីណា ជោលី។
នៅក្នុងបទសម្ភាស កាលពីថ្មីៗនេះផងដែរ ជី ចាងវុក ក៏បានរៀបរាប់ពីចំណូលចិត្តនាពេលទំនេររបស់ខ្លួនថា៖ «ខ្ញុំចូលចិត្តហាត់ប្រាណណាស់។ កាលខ្ញុំនៅជាសិស្សសាលា ខ្ញុំចូលចិត្តរត់លេងជាមួយមិត្តភក្ដិនៅទីលានបាល់ទាត់ និងបាល់បោះណាស់។ ខ្ញុំក៏ចូលចិត្តកីឡាហែលទឹកខ្លាំងណាស់ដែរ»។
តារាភាពយន្តវ័យ២៥ឆ្នាំរូបនេះ ក៏បាននិយាយទៀតថា៖ «ខ្ញុំជាអ្នកស្រុកអានយ៉ាង ហើយឲ្យតែ មានពេលទំនេរខ្ញុំចូលចិត្តទៅស្រុកលេងមិត្តភក្តិចាស់ៗ ជាពិសេសដើម្បីនិយាយអំពីការលំបាក និងទុក្ខសោកប្រាប់គ្នាទៅវិញទៅមក»។
ទន្ទឹមនឹងនោះ តារាវ័យជាងម្ភៃរូបនេះក៏បានបង្ហើបពីចំណូលចិត្តមិនល្អរបស់ខ្លួន ខ្លះៗដែរថា៖ «ខ្ញុំចូលចិត្តលេងបៀរ ឬអង្គុយនៅហាងអ៊ីនធឺណិតលេងហ្គេមផងដែរ។ ទោះបីជាខ្ញុំអាយុច្រើនបន្តិចមែន ប៉ុន្តែខ្ញុំនៅតែចូលចិត្តលេងហ្គេម Starcraft ដូចកាលពីនៅក្មេងអ៊ីចឹង»។
ក្រៅពីចំណូលចិត្តទាំងនេះ ជី ចាងវុក បាននិយាយថា ខ្លួនចង់ចេះលេងឧបករណ៍ភ្លេងណាស់។
លោក និយាយថា៖ «ខ្ញុំចង់ចេះលេងហ្គីតា និងព្យ៉ាណូ។ កាលខ្ញុំនៅជាកូនក្មេង ខ្ញុំធ្លាប់រៀនលេងឧបករណ៍ភ្លេងទាំងនោះខ្លះៗដែរ ក៏ប៉ុន្តែកាលនោះ ខ្ញុំមិនចូលចិត្តសាលាភ្លេងទេ។ ប៉ុន្តែឥឡូវទើបខ្ញុំដឹងថា ការចេះលេងឧបករណ៍តន្ត្រីពិតជាឱសថដ៏ប្រសើរក្នុងការកែរោគ អផ្សុក»៕
No comments:
Post a Comment
yes