ស្វាយរៀងៈ កម្មកររោងចក្រធ្វើកង់ ជាង១ពាន់នាក់នៅក្នុងតំបន់សេដ្ឋកិច្ចពិសេសតាយសេង ក្រុងស្វាយរៀង ដែលផ្តុំគ្នាធ្វើបាតុកម្មកាលពីម្សិលមិញ បានគប់ដុំថ្មចូលក្នុងរោងចក្រ បន្ទាប់ពីប៉ះទង្គិចពាក្យសម្តីជាមួយក្រុមសន្តិសុខ ខណៈពួកគេស្រែកទាមទារឲ្យថៅកែគោរពលក្ខខណ្ឌការងារចំនួន៥ និងសុំដកមេការជាតិវៀតណាមម្នាក់ចេញផង។
តំណាងកម្មករម្នាក់បានប្រាប់តាមទូរស័ព្ទថា កម្មករបានទាមទារនូវលក្ខខណ្ឌការងារ៥ចំណុចមានសុំដំឡើងប្រាក់ព្រីមដល់១០ដុល្លារ មិនឲ្យកាត់ប្រាក់ខែកម្មករមកយឺត សុំឲ្យដំឡើងប្រាក់ថែមម៉ោងដល់៤ ពាន់រៀល សុំឈប់សម្រាកបុណ្យនិងថ្ងៃអាទិត្យ និងសុំឲ្យគោរពម៉ោងធ្វើការតាមច្បាប់កំណត់។
លោក ហាស់ ប៊ុនធី ប្រធាន មន្ទីរការងារខេត្តស្វាយរៀង បានប្រាប់ពីម្សិលមិញថា កូដកម្មកម្មករ រោងចក្រធ្វើកង់A&Jនៅភូមិតាបឹប សង្កាត់បាវិត ក្រុងស្វាយរៀងដែលបានទាមទារនូវលក្ខខណ្ឌការងារ៥ចំណុចពីថៅកែនោះ ភាគីរោងចក្រនិងមន្ទីរការងារខេត្តដោះស្រាយបាន២ចំណុចហើយ នៅ៣ចំណុចទៀតខាងរោងចក្រនឹងបន្តដោះស្រាយទៀត។
លោកបន្តថា ក្រុមកម្មករទាមទារនោះ មានតែ២ចំណុចសំខាន់ទី១ គឺសុំឲ្យក្រុមហ៊ុនអនុគ្រោះពេលមកយឺត ខាងក្រុមហ៊ុនយល់ព្រមអនុញ្ញាតឲ្យយឺត១០នាទីក្នុង១ថ្ងៃហើយ១ខែឲ្យយឺត៦ដង ឯចំណុចទី២ ការស្នើឲ្យក្រុមហ៊ុនដកអ្នកគ្រប់គ្រងជនជាតិវៀតណាមនោះខាងក្រុមហ៊ុនបានឯកភាព ហើយ តែថា លោកមិនបានឃើញលិខិតស្នាមជាផ្លូវការទេ។
លោកបន្ត ការស្នើសុំប្រាក់ព្រីមពី៧ដុល្លារទៅ១០ដុល្លារនោះខាងក្រុមហ៊ុនព្រម តែថា បើករាងយឺតយ៉ាវបន្តិច រីឯការទារដំឡើងប្រាក់ថែមម៉ោង៤ពាន់រៀល នោះនៅមិនទាន់ត្រូវគ្នាទេ។
លោកបន្តថា ការស្នើឲ្យមានថ្ងៃឈប់សម្រាកនោះវាមិនចាំបាច់ទេព្រោះថា បើខាងរោងចក្រមិនគោរពយើងត្រូវតែបង្ខំគាត់ឲ្យអនុវត្តព្រោះវាមានចែងនៅក្នុងច្បាប់។
លោកបន្តថា តាមច្បាប់ខាងមន្ទីរការងារខេត្តអនុញ្ញាតឲ្យថែមតែ២ម៉ោងទេក្នុង១ថ្ងៃគ្មានសិទ្ធិអ្វីបង្ខំឲ្យកម្មករថែមម៉ោង៩យប់ទេ។
ភ្នំពេញប៉ុស្តិ៍មិនអាចទាក់ទងសុំការបំភ្លឺពីភាគីរោងចក្រA&J បានទេកាលពីម្សិលមិញ៕
No comments:
Post a Comment
yes