អ្នកស្រីទេព កុលាប នៅតុលាការកំពូលកាលពីសប្ដាហ៍មុន។
អ្នកស្រី ត្រូវបានគេដោះលែងវិញកាលពីថ្ងៃម្សិលមិញ។
ភ្នំពេញៈ អ្នកស្រី ទេព កុលាប សាកលវិទ្យាធិការនៃសាកលវិទ្យាល័យភ្នំពេញអន្តរជាតិ ដែលទើបបានដោះលែងដោយតុលាការកំពូល កាលពីល្ងាចមិញបានរងការបាញ់ប្រហារពីក្រុមជនមិនស្គាល់ អត្តសញ្ញាណ មកលើរថយន្តអ្នកស្រី ក្នុងរាជធានីភ្នំពេញ ធ្វើឲ្យលោកស្រីរត់រកទីជ្រកកោននៅគេហដ្ឋានលោកនាយក រដ្ឋមន្រ្តី ហ៊ុន សែន ក្នុងខណ្ឌដូនពេញ។
លោក ទូច ណារ៉ុថ ស្នងការនគរបាលរាជធានីភ្នំពេញ បានថ្លែងពីផ្ទះអ្នកស្រី ទេព កុលាប កាលពីម្សិលមិញថា ៖ «នគរបាលត្រូវបានបញ្ជាឲ្យស៊ើបអង្កេតករណីបាញ់ប្រហារនេះ»។ លោកបានបញ្ជាក់ថា នគរបាលនឹងអមដំណើរអ្នកស្រីទេព កុលាប ទៅកាន់តុលាការដើម្បី ផ្ដល់ចម្លើយនៅថ្ងៃនេះតាមដីកានាំខ្លួនរបស់សាលាដំបូងរាជធានីភ្នំពេញទាក់ទងនឹងបទចោទមួយប្រឆាំងទៅនឹងអ្នកស្រី។
ថ្លែងតាមទូរស័ព្ទ អ្នកស្រី កុលាប បានឲ្យដឹងថា មានបុរសមួយក្រុមបានចាប់ផ្តើមដេញតាមពីក្រោយអ្នកស្រី ភ្លាមៗ នៅពេលអ្នកស្រីចាកចេញពីមន្ទីរពេទ្យមិត្តភាពខ្មែរ-សូវៀត ជាកន្លែងដែលអ្នកស្រីបានទទួលការព្យាបាល និងធ្វើការដោះលែង។
អ្នកស្រី ទេព កុលាប បានថ្លែងថា ៖ «បុរសប្រហែល ៧ ឬ ៩ នាក់ បានដេញតាមខ្ញុំ ពេលខ្ញុំចាកចេញពីមន្ទីរពេទ្យ ហើយគេបាញ់សំដៅលើខ្ញុំបីលើក»។ «យើងបានព្យាយាមទៅស្ថានទូតមួយចំនួន ប៉ុន្តែស្ថានទូតមិនបានបើកទ្វារឲ្យទេ ហើយក្មួយប្រុសខ្ញុំម្នាក់បានបើករថយន្តទៅគេហដ្ឋានលោកនាយករដ្ឋ មន្រ្តី ...ពេលនោះ អង្គរក្សទាំងអស់បានចេញមក ហើយគេបាននាំខ្ញុំទៅការិយាល័យសន្តិសុខ»។
ខណៈនៅពុំទាន់មាន សេចក្តីលម្អិតច្បាស់លាស់នៅឡើយកាលពីយប់មិញ សាក្សីជាច្រើននាក់ នៅខាងក្រៅគេហដ្ឋានលោក ហ៊ុន សែន បានបញ្ជាក់ដូចពាក្យសម្តីភាគច្រើនរបស់អ្នកស្រី កុលាប ដោយពួកគេបាននិយាយថា មានម៉ូតូប្រាំមួយគ្រឿងជិះដោយអ្នកបើកបរស្លៀកពាក់ស៊ីវិល បានដេញតាមរថយន្តអ្នកស្រី។
សាក្សីម្នាក់ ដែលបដិសេធមិនឲ្យបញ្ចេញឈ្មោះនិយាយថា៖ « ពួកគេបានព្យាយាមបញ្ឈប់ឡានអ្នកស្រី ហើយបង្ខំគាត់ឲ្យចេញពីរថយន្ត។ បុរសម្នាក់ ដែលប្រដេញតាម បានទាញកាំភ្លើងបាញ់មកលើរថយន្តគាត់»។ ពេលសាក្សីកំពុងនិយាយ នគរបាលបានប្រញាប់ប្រញាល់សម្អាតកញ្ចក់បែកនៅច្រកទ្វារ ខណៈអង្គរក្ស និងកងរាជអាវុធហត្ថ បានព្យាយាមដេញអ្នកឈរមើលដែលកំពុងប្រមូលផ្តុំគ្នានៅ កន្លែងកើតហេតុ ។
កាលពីថ្ងៃសុក្រ តុលាការកំពូលបានលុបចោលបទចោទប្រកាន់ប្រឆាំងនឹងអ្នកស្រី ទេព កុលាប ដែលត្រូវបានផ្តន្ទាទោសកាលពីឆ្នាំមុន ជាមួយនឹងស្វាមី ពីបទកេងបន្លំប្រាក់ជាង ៥៨ លានដុល្លារអាមេរិកពីលោកឧកញ៉ា កុក អាន ព្រឹទ្ធសមាជិកមកពីគណបក្សកាន់អំណាច។
លោក សុខ រឿន ព្រះរាជអាជ្ញារងអមសាលាដំបូងរាជធានីភ្នំពេញ បានបដិសេធមិនផ្តល់ការអត្ថាធិប្បាយទេ។ ប៉ុន្តែ លោក ឡុង តារា មេធាវីការពារក្តីលោក កុក អាន បានថ្លែងពីយប់មិញថា រឿងក្តីកេងបន្លំជាបទចោទមួយក្នុងចំណោមបទចោទបី ដែលបានដាក់ប្តឹងលើប្តីប្រពន្ធទាំងពីរ ក្នុងឆ្នាំ ២០១០ និង ២០១១ ហើយថា លោកជឿថា ដីកាចាប់ខ្លួនលើបទចោទដទៃទៀត ត្រូវបានចេញដោយតុលាការរួចហើយ៕
No comments:
Post a Comment
yes