ក្រសួងមហាផ្ទៃ បានផ្តល់សុពលភាព ជូនគណបក្សសង្គ្រោះជាតិ និងអនុញ្ញាតិឲ្យលោកសម រង្ស៊ី ធ្វើជាប្រធានគណបក្សប្រឆាំងថ្មីនេះ ដោយស្របច្បាប់។
អ្នកនាំពាក្យក្រសួងមហាផ្ទៃ លោក ខៀវ សុភ័គ ប្រាប់សំឡេងប្រជាធិបតេយ្យនៅថ្ងៃច័ន្ទនេះថា រដ្ឋមន្រ្តីក្រសួងមហាផ្ទៃ បានចុះហត្ថលេខា ផ្តល់សុពលភាពជូនគណបក្សសង្គ្រោះជាតិហើយ ព្រមទាំងអនុញ្ញាតិឲ្យលោកសម រង្ស៊ី ធ្វើជាប្រធានគណបក្សថ្មីនេះទៀតផង។ លោកបន្តថា លោកនឹងកោះហៅមន្រ្តីគណបក្សថ្មីនេះ មកទទួលសុពលភាពនៅថ្ងៃអង្គារស្អែកនេះ ដោយភ្ជាប់ជាមួយលិខិតលាលែងរបស់លោក សម រង្ស៊ី ពីគណបក្សចាស់។
អ្នកនាំពាក្យគណបក្សសមរង្ស៊ី លោក យឹម សុវណ្ណ មានប្រសាសន៍ថា គណបក្សសមរង្ស៊ីនឹងជ្រើសរើសប្រធានគណបក្សថ្មីនៅក្នុងសមាជគណបក្សនៅពេលខាងមុខនេះ បន្ទាប់ពីលោកសម រង្ស៊ី លាលែងពីតំណែង។
កាលពីថ្ងៃទី២០ ខែសីហា ឆ្នាំ២០១២ គណបក្សថ្មីដែលរួមគ្នាពីគណបក្សប្រឆាំងពីរនៅកម្ពុជា គឺគណបក្សសមរង្ស៊ី និងគណបក្សសិទ្ធិមនុស្សនេះ បានដាក់ពាក្យសុំចុះបញ្ជី ទៅក្រសួងមហាផ្ទៃ ហើយនៅថ្ងៃទី១៤ ខែកញ្ញា ក្រសួងមហាផ្ទៃទទួលយកពាក្យសុំចុះបញ្ជីរបស់គណបក្សប្រឆាំងមួយនេះ ក៏ប៉ុន្តែតម្រូវឲ្យគណបក្សថ្មីនេះរកសមាជិកឲ្យបាន ៤០០០នាក់ ទើបអាចចុះបញ្ជីគណបក្សបាន៕
No comments:
Post a Comment
yes