ប្រតិកម្មនេះ បានធ្វើកើតឡើងបន្ទាប់ពីសាលាដំបូងរាជធានីភ្នំពេញ ប្រកាសសាលក្រមនៅថ្ងៃច័ន្ទ ទី១ ខែតុលានេះ ឲ្យលោក ម៉ម សូណង់ដូ ជាប់ពន្ធនាគារចំនួន២០ឆ្នាំ ទៅតាមការចោទប្រកាន់របស់រដ្ឋាភិបាល រឿងធ្វើអបគមន៍ ក្នុងជម្លោះដីធ្លីនៅខេត្តក្រចេះ ៖ “ខ្មែរដូចគ្នា លោក ម៉ម សូណង់ដូ គ្មានកំហុសទេ ត្រូវតែដោះលែងគាត់។ អញទាមទារស្រាតខោស្រាតអាវ យកគាត់ទៅដាក់ទោស អយុត្តិធម៌ម្ល៉េះ។ ធ្វើបាបតែខ្មែរគ្នាឯង បរទេសហូរហៀអត់មើលទេ”។
គណបក្សសមរង្ស៊ី និងគណបក្សសិទ្ធិមនុស្ស បានហៅការកាត់ទោសលោក ម៉ម សូណង់ដូ ថាមិនមានភស្តុតាងគ្រប់គ្រាន់ទេ។សេចក្តីថ្លែងការណ៏របស់គណបក្សប្រឆាំងនោះ បានអះអាងថា ប្រព័ន្ធតុលាការនៅកម្ពុជា មិនឯករាជ្យ ហើយការកាត់ទោសនេះ គឺជាគំរាមកំហែងដល់អ្នកនយោបាយ អ្នកការពារសិទ្ធិមនុស្ស និងការតស៊ូមតិរបស់ពលរដ្ឋ។
លោក ធុន សារិន អាយុ ៥២ឆ្នាំ មកពីខេត្តព្រៃវែង អះអាងថា ការចោទប្រកាន់មកលើ លោក ម៉ម សូណង់ដូ បែបនេះធ្វើឲ្យពួកគេអស់ជំនឿលើប្រព័ន្ធយុត្តិធម៌នៅកម្ពុជា ៖ “សូមឲ្យរដ្ឋាភិបាល ដោះលែងរកយុត្តិធម៌ឲ្យប្រជាពលរដ្ឋ ក៏ដូចជាលោក ម៉ម សូណង់ដូ ឲ្យខ្ញុំផង ខ្ញុំទុកវេទនា ដោយសាររដ្ឋាភិបាល តុលាការដែលមិនយុត្តិធម៌ដល់លោក ម៉ម សូណង់ដូ ឬក៏ប្រជាពលរដ្ឋទាំងអស់នេះណាស់ បើសិនជារដ្ឋាភិបាលនិងតុលាការ មិនរកយុត្តិធម៌ឲ្យខ្ញុំទេ ខ្ញុំប្រហែលជានឹងប្តូរផ្តាច់នៅថ្ងៃក្រោយ”។
ព្រះរាជអាជ្ញារងអមសាលាដំបូងរាជធានីភ្នំពេញ លោក មាស ច័ន្ទពិសិដ្ឋ ដែលចោទប្រកាន់លើសំនុំរឿងនេះ មិនធ្វើអត្ថាធិប្បាយ នឹងសំនួរអ្នកសារព័ត៌មានទេ បន្ទាប់ពីប្រកាសសាលក្រម លោក ម៉ម សូណង់ដូ រួច ។
ក្រុមអ្នកគាំទ្រលោក ម៉ម សូណង់ដូ បានប្រឈមមុខតានតឹងនឹងកម្លាំងសមត្ថកិច្ចចម្រុះ របស់រដ្ឋាភិបាលប្រហែល២០០នាក់ ដែលត្រូវបានគេដាក់ពង្រាយ ដើម្បីរារាំងក្រុមអ្នកតវ៉ា កុំឲ្យទៅជិតតុលាការ។ ប៉ុន្តែស្នងការនគរបាលរាជធានីភ្នំពេញ លោកទូច ណារ៉ុថ ដែលមានវត្តមាននៅទីនោះដែរ អះអាងថា វិធានការនេះ ដើម្បីរក្សាសណ្តាប់ធ្នាប់សាធារណៈ ៖ “ពីរនាក់នេះ មិនមែនជាគូរប្រឈមជាមួយគ្នាទេ កុំឲ្យថា ប្រជាពលរដ្ឋ ខ្ញុំនិយាយកុំឲ្យប្រជាពលរដ្ឋហ្នឹងធ្វើខុសច្បាប់ ហើយកម្លាំងខ្ញុំហ្នឹងមិនឲ្យប៉ះជាមួយប្រជាពលរដ្ឋ”។
សមាជិកក្រុមប្រឹក្សាឃ្លាំមើលកម្ពុជា លោក រ៉ុង ឈុន ដែលឃ្លាំមើលការប្រកាសសាលក្រមលើប្រធានសមាគមអ្នកប្រជាធិបតេយ្យ និងជានាយកវិទ្យុសំបុកឃ្មុំ មានប្រសាសន៍ថា ការដាក់ពង្រាយកម្លាំងសមត្ថកិច្ច ទប់ស្កាត់ អ្នកគាំទ្រជនជាប់ចោទ មិនឲ្យទៅជិតតុលាការបែបនេះ ជាសារបង្ហាញថា តុលាការកំពុងភ័យខ្លាច មហាជន ដឹងពីភាពមិនឯករាជ្យរបស់ខ្លួន៕
No comments:
Post a Comment
yes