ព្រះសីហនុ ៖ ផ្ទះតៀមធ្វើអំពីឈើដំបូលប្រក់ស័ង្កសីមួយខ្នងទំហំ8ម៉ែត្រគុណនិង10ម៉ែត្រត្រូវបានអគ្គិភ័យឆេះបំផ្លាញអស់ទាំងស្រុងក្នុងនោះទ្រព្យសម្បត្តិនិងរបស់ប្រើប្រាស់នៅក្នុងផ្ទះទាំងប៉ុន្មានក៏ត្រូវបានព្រះអគ្គីលេបត្របាក់អស់គ្មានសល់ខណៈពេលដែលស្ត្រីមេម៉ាយជាម្ចាស់ផ្ទះរវល់ជូនកូនទៅសាលារៀនហើយចាក់សោផ្ទះទុកចោល ដោយភ្លេចពន្លត់ភ្លើងចង្ក្រានដាំបាយ។
ហេតុការណ៍ខាងលើនេះបានកើតមានឡើងកាលពីវេលាម៉ោងប្រមាណ2រសៀលថ្ងៃទី02 ខែតុលា ឆ្នាំ2012នៅខាងជើងសាលារៀនសាឃូរ៉ាស្ថិតក្រុមទី16ភូមិ3ទំនប់រលកក្នុងសង្កាត់លេខ1ក្រុងព្រះសីហនុ ខេត្តព្រះសីហនុ។ អគ្គិភ័យខាងលើនេះមិនបានឆេះឆ្លងរាលដាលទៅផ្ទះអ្នកជិតខាងនោះទេដោយសារនៅពេលកើតហេតុភ្លាមៗប្រជាពលរដ្ឋដែលរស់នៅក្បែរនោះឃើញទាន់ហើយបានជួយបាញ់ទឹកពន្លត់ភ្លើងមុនពេលរថយន្តពន្លត់អគ្គិភ័យរបស់ស្នងការដ្ឋាននគរបាលខេត្តបានទៅដល់ប៉ុន្តែនៅក្នុងពេលនោះក៏មានប្រជាពលរដ្ឋម្នាក់បានរងគ្រោះថ្នាក់ដោយសារខ្សែភ្លើងឆក់ បណ្ដាលឲ្យសន្លប់បាត់ស្មារតីផងដែរនៅពេលដែលរូបគេនិងប្រជាពលរដ្ឋច្រើននាក់ផ្សេងទៀតជួយអន្តរាគមន៍ពន្លត់ភ្លើងហើយប៉ះនិងខ្សែភ្លើងដែលដាច់ធ្លាក់មកដី។
លោកង៉ែត ស៊ីម៉ី នាយប៉ុស្តិ៍ប៉ូលិសសង្កាត់លេខ1បានប្រាប់ថាជនរងគ្រោះជាម្ចាស់ផ្ទះមានឈ្មោះសាំង ចិន្តា ភេទស្រី អាយុ35ឆ្នាំមានមុខរបរលក់ដូរ។ ចំណែកជនរងគ្រោះដោយសារខ្សែភ្លើងឆក់រហូតដួលសន្លប់នោះមានឈ្មោះយន់ ពេជ្រ ភេទប្រុស អាយុ30ឆ្នាំ។ លោកង៉ែត ស៊ីម៉ី បានឲ្យដឹងទៀតថាគ្រោះអគ្គីភ័យខាងលើនេះអាចឆេះចេញពីភ្លើងចង្ក្រានធ្យូងនៅខណៈពេលដែលស្ត្រីម្ចាស់ផ្ទះបានដាំបាយហើយមិនបានពន្លត់ចង្រ្កាន។
សូមបញ្ជាក់ផងដែរថាការកើតមានអគ្គិភ័យខាងលើនេះ វាជាលើកទី2ហើយនៅតំបន់ទំនប់រលកក្នុងភូមិសាស្ត្រសង្កាត់លេខ1ដែលហេតុការណ៍លើកទី1បានកើតមានឡើងកាលពីយប់ថ្ងៃទី23ខែកញ្ញាដោយបំផ្លាញផ្ទះប្រជាពលរដ្ឋអស់ចំនួន36ខ្នង ហើយមកដល់ពេលនេះក្រុមប្រជាពលរដ្ឋដែលរងគ្រោះដោយសារអគ្គិភ័យកន្លងមកនោះនៅមិនទាន់ទទួលបានសំណងណាមួយពីអ្នកបង្កហេតុនោះទេ៕
No comments:
Post a Comment
yes