ក្រចេះ៖ ប្រជាពលរដ្ឋនៅស្រុកស្នួល បាននិយាយថា លោក គង់ ក្រឹង នៅតែជាឈ្មួញដុះស្លែនៅក្នុងស្រុកស្នួល ដោយគាត់ជាអ្នកប្រមូលទិញឈើប្រណិតគ្រប់ប្រភេទ ដែលក្រុមឈ្មួញបានដឹកយកទៅលក់ឱ្យនៅចំណុចភូមិត្រពាំងស្រែ ឃុំពីរធ្នូរ ស្រុកស្នួល។ បើតាមប្រភពព័ត៌មានពីប្រជាពលរដ្ឋ បានប្រាប់ឱ្យដឹងថា បច្ចុប្បន្ននេះ លោក គង់ ក្រឹង កំពុងតែពាក់ស្បែកជាទាហាន រួចរកស៊ីជួញឈើខុសច្បាប់ដោយសេរី មិនមានសមត្ថកិច្ចពាក់ព័ន្ធណាហ៊ានចេញមុខទៅបង្ក្រាបបទល្មើសនោះឡើយ ជាពិសេស សមត្ថកិច្ចមេព្រៃតែម្តង មានភាពធូររលុង មិនដែលមានវិធានការបង្ក្រាបបានមួយករណីណាឡើយ។
ចំណែក លោក ប្រាក់ សំបូរ ដែលជានាយផ្នែករដ្ឋបាលព្រៃឈើស្រុកស្នួលវិញ សំងំខ្លួនឈឹង មិនដែលចេញមកបង្ក្រាបក្បួនរថយន្តដឹកឈើ ដែលយកទៅលក់ឱ្យ លោក គង់ ក្រឹង ឡើយ។ ប្រភពបានបន្តទៀតថា បច្ចុប្បន្ននេះ លោក គង់ ក្រឹង កំពុងតែធ្វើចរាចរទិញឈើយ៉ាងពេញទំហឹង ដោយសារមន្ត្រីជំនាញមួយចំនួន បានឃុបឃិតបើកភ្លើងខៀវ មិនព្រមលៃលកចាត់វិធានការ ជាពិសេស លោក ប្រាក់ សំបូរ នេះតែម្តង ដែលខ្លួនជានាយផ្នែក តែបែរជាមិនព្រមយកភ្នែកមើលបទល្មើស ដែលកំពុងកើតមានយ៉ាងសស្រាក់សស្រាំជារៀងរាល់ថ្ងៃនេះ។
បើតាមសេចក្តីរាយការណ៍ច្បាស់ការចេញពីស្រុកស្នួល បាននិយាយថា ឈ្មួញពាក់ស្បែកទាហាន ឈ្មោះ គង់ ក្រឹង ម្នាក់នេះ ជាឈ្មួញដែលរកស៊ីជួញដូរឈើខុសច្បាប់ បានយ៉ាងកាក់កបនាពេលបច្ចុប្បន្ននេះ ទំនងជាត្រូវដងត្រូវផ្លែជាមួយ លោក ប្រាក់ សំបូរ ទើបឈ្មួញមា្នក់នេះ អាចរកស៊ីបទល្មើសដឹកឈើទិញឈើខុសច្បាប់បានយ៉ាងរលូន ដោយមិនមានអ្វីមករារាំងបានឡើយ។
សេចក្តីរាយការណ៍ បានបន្តទៀតថា ភាគច្រើនក្រុមឈ្មួញ ដែលដឹកឈើប្រណិត ដូចជា ឈើបេង នាងនួន ឈើធ្នង់ និងឈើគ្រញូង ចេញពីខេត្តស្ទឹងត្រែង និងខេត្តក្រចេះ បានយកទៅលក់ឱ្យឈ្មួញឈ្មោះ គង់ ក្រឹង ដោយគាត់ គឺជាអ្នកចាំទិញឈើប្រណិតខុសច្បាប់ដ៏ធំជាងគេនៅស្រុកស្នួល។ ទាក់ទិននឹងបញ្ហាខាងលើនេះ ភ្នាក់ងារសារព័ត៌មាន ក៏បានធ្វើការទំនាក់ទំនងសុំការបំភ្លឺពី លោក ប្រាក់ សំបូរ នាយផ្នែករដ្ឋបាលព្រៃឈើស្នួលដែរ តែមិនអាចទាក់ទងបានឡើយ៕
No comments:
Post a Comment
yes