ក្នុងកិច្ចប្រជុំពិភាក្សារវាងមន្រ្តីសាលាក្រុងភ្នំពេញ និងតំណាងសមាគមគ្រូបង្រៀនកម្ពុជាឯករាជ្យកាលពីរសៀលថ្ងៃទី០១ តុលា ម្សិលមិញ ទីបំផុតសាលាក្រុងភ្នំពេញបានសម្រេចហើយ ដោយអនុញ្ញាតឲ្យសមាគមគ្រូបង្រៀនកម្ពុជាឯករាជ្យដឹកនាំដោយលោក រ៉ុង ឈុន ប្រារព្ធទិវាគ្រូបង្រៀនពិភពលោកនៅថ្ងៃទី០៥ តុលា ឯទីលានប្រជាធិបតេយ្យ ដោយមានអ្នកចូលរួម២៥០នាក់ ប៉ុន្តែមិនអនុញ្ញាតឲ្យដង្ហែក្បួនឡើយ ដោយអនុញ្ញាតឲ្យចាត់តែតំណាង១៥រូបយកញត្តិទៅប្រគល់ឲ្យស្ថាប័នពាក់ព័ន្ធប៉ុណ្ណោះ។
តាមកំណត់ហេតុប្រជុំ សាលាក្រុងភ្នំពេញបានអនុញ្ញាតឲ្យលោក រ៉ុង ឈុន ធ្វើការជួបជុំ និងសម្តែងមតិនៅទីលានប្រជាធិបតេយ្យនាថ្ងៃទី០៥ ខែតុលា ឆ្នាំ២០១២ វេលាម៉ោង៨ព្រឹក តែពុំអនុញ្ញាតឲ្យមានការដង្ហែក្បួនឡើយ ដើម្បីចៀសវាងប៉ះពាល់ដល់សន្តិសុខ សុវត្ថិភាព និងសណ្តាប់ធ្នាប់សាធារណៈកំឡុងពេលពិធីបុណ្យកាន់បិណ្ឌ។
ប៉ុន្តែទោះជាយ៉ាងណាក៏ដោយសាលាក្រុងភ្នំពេញបានឯកភាពឲ្យសមាគមគ្រូបង្រៀនកម្ពុជាឯករាជ្យចាត់តាំងតំណាងចំនួន១៥រូបធ្វើដំណើរចេញពីទីលានប្រជាធិបតេយ្យ តាមផ្លូវលេខ១០៨ ដល់ផ្លូវលេខ១៩ រហូតដល់ផ្លូវលេខ២១៤ បត់ស្តាំសំដៅទៅប្រគល់ញត្តិនៅក្រសួងអប់រំយុវជន និងកីឡា នៅវេលាម៉ោង១០ព្រឹក រួចត្រឡប់ក្រោយតាមផ្លូវ២១៤ ដើរសំដៅទៅផ្លូវលេខ១៩បត់ស្តាំរហូតដល់ផ្លូវលេខ២៤០ បត់ឆ្វេងតាមផ្លូវស្រ៊ូស៊ុន រួចបត់ស្តាំមកប្រគល់ញត្តិជូនខុទ្ទកាល័យនាយករដ្ឋមន្រ្តីនៅដើមពោធិ៍សួនវត្តបុទមវត្តី និងចុងក្រោយបន្តតាមការ៉ូឡាសួនឆ្ពោះទៅផ្លូវសុធារសតម្រង់ទៅរង្វង់មូលសម្តេចសង្ឃជួនណាត ដើម្បីប្រគល់ញត្តិជូនអ្នកតំណាងរាស្រ្តនៅវិមានរដ្ឋសភាជាតិ រួចរំសាយ៕
No comments:
Post a Comment
yes