តាមសេចក្តីជូនដំណឹងរបស់ក្រសួងធនធានទឹក និងឧតុនិយមចេញផ្សាយនៅថ្ងៃអង្គារនេះឲ្យដឹងថា នៅវេលាម៉ោង១៣រសៀលថ្ងៃទី០១ ខែតុលា ឆ្នាំ២០១២ វិសម្ពាធមួយដែលបានកើតឡើងនៅក្នុងសមុទ្រចិនខាងត្បូង បានវិវត្តខ្លួនទៅជាកូនព្យុះមានឈ្មោះថា GAEMI។ ហើយមកដល់ព្រឹកថ្ងៃទី០២ ខែតុលា ឆ្នាំ២០១២នេះ កូនព្យុះ GAEMI កំពុងស្ថិតនៅសមុទ្រចិនខាងត្បូង ត្រង់ចំណុចខ្សែស្របទី១៧អង្សា នៃរយៈទទឹងខាងជើង និងខ្សែវ័ណ្ឌទី១១៤អង្សា៨ នៃរយៈបណ្តោយខាងកើត និងមានចម្ងាយប្រមាណ៧០០គីឡូម៉ែត្រភាគខាងកើតទីក្រុងដាណាង ប្រទេសវៀតណាម។
បើយោងតាមការព្យាករណ៍ កូនព្យុះនេះនឹងវិវត្តទៅជាព្យុះ ហើយនឹងធ្វើដំណើរទៅដល់ឆ្មេរប្រទេសវៀតណាមភាគកណ្តាលនៅថ្ងៃទី០៦ ឬទី០៧ ខែតុលាខាងមុខ។ ព្យុះនេះក៏នឹងមានឥទ្ធិពលមកលើប្រទេសកម្ពុជាចាប់ពីថ្ងៃទី០៤ ដល់ថ្ងៃទី០៨ ខែតុលា ឆ្នាំ២០១២ ដោយធ្វើឲ្យផ្ទៃមេឃមានសភាពអាប់អ៊ួរ មានពពកច្រើនមីរដេរដាស មានភ្លៀងធ្លាក់រាយប៉ាយស្ទើរគ្រប់ទីកន្លែង ព្រមទាំងមានខ្យល់បក់បោកខ្លាំង និងអាចមានជំនន់ទឹកភ្លៀងនៅតាមបណ្តាខេត្តមួយចំនួនដូចជា ១-តំបន់ខ្ពង់រាប មានខេត្តខេត្តកំពង់ចាម មណ្ឌលគិរី រតនគិរី ក្រចេះ ស្ទឹងត្រែង ឧត្តរមានជ័យ និងខេត្តព្រះវិហារ, ២-តំបន់ទំនាបកណ្តាល មានខេត្តសៀមរាប និងកំពង់ធំ, ៣-តំបន់មាត់សមុទ្រ មានខេត្តកោះកុង កែប កំពត និងខេត្តព្រះសីហនុ ដែលរលកសមុទ្រអាចមានកំពស់ពី ១,៥ម៉ែត្រ ទៅ ២,៥ម៉ែត្រ។
ជាមួយគ្នាបើតាមក្រសួងធនធានទឹក ឥទ្ធិពលរបស់ព្យុះនេះ ក៏នឹងធ្វើឲ្យទឹកជំនន់ទន្លេមេគង្គហក់ឡើងផងដែរ៕
No comments:
Post a Comment
yes