កម្មករម្នាក់ឈរនៅលើច្រាំងចាំបោះបាវខ្សាច់ឲ្យកម្មករ៤នាក់ផ្សេងទៀត
នៅក្នុងទឹករៀបដើម្បីបូមទឹកជួសជុល
ភ្នំពេញៈ ភ្ញៀវទេសចរគ្រប់ជាតិសាសន៍ រួមទាំងជនជាតិកម្ពុជាផង ដែលបានឈានជើងដើរចូលប្រាសាទអង្គរវត្តបានលើកឡើងពីចម្ងល់នៅពេល ឃើញកម្មករកម្មការិនី រួមទាំងនិស្សិតជនជាតិជប៉ុននាំគ្នាលីសែងបាវដីខ្សាច់ និងដីខ្សាច់ទប់ទឹកនៅជាប់នឹងផ្លូវថ្មចូលប្រាសាទអង្គរវត្ត និងនៅជុំវិញគូទឹក។
នៅពេលសួរនាំអ្នកដឹកនាំកម្មករ និងក្រុមនិស្សិតជនជាតិជប៉ុនធ្វើការនៅទីនោះ ទើបដឹងថា ពួកគេកំពុងរៀបបាវខ្សាច់ទប់ទឹកដើម្បីស្ទួចរើផ្ទាំងថ្មនៅតាម ផ្លូវចូលប្រាសាទអង្គរវត្ត និងជុំវិញគូទឹកធ្វើការជួសជុលជាថ្មី និងស្វែងរករូបនាគដែលបាត់បាក់ធ្លាក់ចូលទឹក។
លោក ទ្រឿង នី ប្រធានក្រុមកម្មករនៅទីនោះបានឲ្យដឹងថា ការទប់ទឹកស្ទូចលើកផ្លូវថ្មចូលប្រាសាទនោះគឺធ្វើឡើងតែមួយចំហៀង ទេ ខណៈដែលផ្នែកផ្សេងបានជួសជុលរួចហើយនោះ។ ដំណើរការប្រើបាវខ្សាច់ទប់ទឹកនោះបានដំណើរការអស់រយៈពេលប្រហែល ៥ខែហើយ ដើម្បីបូមទឹកចេញស្វែងរកបង្កាន់ដៃនាគដែលបាក់ធ្លាក់ចូលទឹកកប់ ដីអស់រយៈពេលជាច្រើនឆ្នាំមកនោះ និងបង់លេខផ្ទាំងថ្មផ្លូវចូលប្រាសាទអង្គរនោះ ដើម្បីស្ទូចរើធ្វើការជួសជុលផ្លូវថ្មដែលបានបាក់ស្រុតនោះជា ថ្មី។
លោក ទ្រឿង នី បាននិយាយថា៖«យើងកំពុងដាក់បាវខ្សាច់ទប់ ដើម្បីបូមទឹកជួសជុលផ្លូវថ្មចូលប្រាសាទដែលបានបាក់ស្រុត ពិសេសគឺដើម្បីស្វែងរករូបនាគថ្មដែលបានបាក់ធ្លាក់ទៅកប់ដីចូល ទឹក ព្រោះកាលពីមុនមកផ្លូវចូលប្រាសាទនេះមានរូបនាគអមសងខាង»។
ដំណើរ ការជួសជុលនេះនឹងប្រើពេលយូរចន្លោះពី៦ទៅ៧ឆ្នាំឯណោះ ដោយការងារនោះមិនអាចបង្ខំបានឡើយ។ ម្យ៉ាងការលើកដាក់ផ្ទាំងថ្មនោះគឺត្រូវលើកស្ទូចដាក់តាមលំដាប់ ដោយធ្វើការបង់លេខដោយប្រុងប្រយ័ត្ន និងត្រូវស្តារកាយផ្ទាំងថ្មីទាំងអស់ដល់បាតនោះ។
ប្រធានកម្មកររូបនេះបានបន្តថា៖«ដំណើរការជួសជុលនេះប្រហែលជាប្រើពេលយូរណាស់ ៦ទៅ៧ឆ្នាំឯណោះទើបរួច ព្រោះយើងត្រូវស្ទូចលើកថ្មទៅដាក់ឆ្ងាយ។ រើមួយសើរត្រូវបង់លេខមួយសើ យើងរើដល់បាត ហើយធ្វើការដាក់ខ្សាច់នៅបាត និងរៀបថ្មមួយសើៗ ការងារនេះមិនអាចធ្វើបង្ខំបានទេ ហើយយើងនឹងរៀបនាគថ្មតាមបង្កាន់ដៃវិញ»។
ជុំវិញព័ត៌មាននៃការ រុះរើផ្លូវចូលប្រាសាទអង្គរវត្តដែលជាបេតិកភណ្ឌពិភពលោក ដើម្បីជួសជុលឡើងវិញនេះ លោកស្រី ម៉ៅ ល្អ ប្រធាននាយកដ្ឋានអភិរក្ស និងបង្ការរបស់អាជ្ញាធរអប្សរា សុំមិនផ្តល់ព័ត៌មានតាមទូរស័ព្ទឡើយ។ បើតាមកម្មករនៅកន្លែងធ្វើការដែលមានបែងចែកជាពីរផ្នែកបានឲ្យ ដឹងថា ការជួសជុលគូទឹកទទួលជំនួយពីប្រទេសអូស្ត្រាលី រីឯផ្លូវថ្មចូលប្រាសាទអង្គរវត្តទទួលជំនួយពីប្រទេសជប៉ុន។
កាល ពីថ្ងៃទី៦ ខែកញ្ញា ឆ្នាំ២០១២ ការចុះហត្ថលេខាមួយត្រូវបានធ្វើឡើងរវាងលោកឧបនាយករដ្ឋមន្ត្រី សុខ អាន រដ្ឋមន្ត្រីទទួលបន្ទុកទីស្តីការគណៈរដ្ឋមន្ត្រី និងជាប្រធានអាជ្ញាធរអប្សរា ជាមួយលោកស្រី Anne Lemaistre តំណាងអង្គការយូណេស្កូប្រចាំកម្ពុជា ស្តីពីការបន្តគាំពារប្រាសាទអង្គរវត្ត ក្នុងទំហំទឹកប្រាក់២៥ម៉ឺនដុល្លារអាមេរិក សម្រាប់ផ្តោតទៅលើការជួសជុលគូទឹក នៅព័ទ្ធជុំវិញប្រាសាទ។
យោង តាមអាជ្ញាធរអប្សរា បានឲ្យដឹងថា ប្រាសាទអង្គរវត្ត ត្រូវបានកសាងឡើងនៅក្នុងសតវត្សរ៍ទី១២ ក្នុងរាជព្រះបាទសូរ្យវរ្ម័នទី២ ហើយសន្មតនៅជំនាន់នោះថាជាលំនៅដ្ឋានព្រះនរាយណ៍។ គេប៉ាន់ស្មានថា ប្រហែលជាចំណាយពេលប្រមាណ ៣០ ឆ្នាំ ទើបកសាងអង្គរវត្តហើយជាស្ថាពរ។ នៅសម័យកណ្តាល ជាពិសេសនៅសតវត្សរ៍ទី១៦ ប្រាសាទអង្គរវត្ត កាលនោះមានឈ្មោះថា ព្រះពិស្ណុលោក ពោលគឺយកតាមមរណនាមនៃព្រះបាទសូរ្យវរ្ម័នទី២ ក្លាយទៅជាបូជនីយដ្ឋាន ដែលពុទ្ធសាសនិកជាតិ និងអន្តរជាតិមកសំពះ។ សព្វថ្ងៃនេះ ខ្មែរទាំងមូលសន្មតអង្គរវត្ត ឬអង្គរតូច ថាជានិមិត្តរូបនៃជាតិរបស់ខ្លួន។
អង្គរដែលជាបុរាណដ្ឋានធំមួយ នៅលើលោក ត្រូវបានទទួលចំណាត់ថ្នាក់ក្នុងបញ្ជីបេតិកភណ្ឌពិភពលោក នៃអង្គការយូណេស្កូនៅចុងឆ្នាំ១៩៩២ ក្រោយពីបានទទួលការអំពាវនាវពីសំណាក់ព្រះករុណាព្រះបាទសម្តេចព្រះ នរោត្តមសីហនុ ដែលកាលនោះព្រះអង្គធ្វើឡើងក្នុងឋានៈជាព្រះប្រធាននៃឧត្តមក្រុម ប្រឹក្សាជាតិជាន់ខ្ពស់ ។
តាំងពីពេលនោះមក គេបានបង្កើតគណៈកម្មាធិការអន្តរជាតិមួយ (គណៈកម្មាធិការអន្តរជាតិដើម្បីសម្របសម្រួលកិច្ចគាំពារ និងអភិវឌ្ឍន៍រមណីយដ្ឋានប្រវត្តិសាស្ត្រអង្គរ ហៅកាត់ថា ICC) ដើម្បីដើរតួនាទីសម្របសម្រួល រាល់ការងារសំខាន់ទាំងឡាយណាពាក់ព័ន្ធនឹង រមណីយដ្ឋាននេះ ។
តាម អាជ្ញាធរដដែលឲ្យដឹងថា អត្ថបទនីតិក្រមមុនគេបង្អស់ ដែលព្រះករុណាជាអម្ចាស់បានឡាយព្រះហស្តលេខា បន្ទាប់ពីឡើងគ្រងរាជជាថ្មីភ្លាម គឺព្រះរាជក្រឹត្យស្តីពីការកំណត់តំបន់សៀមរាប-អង្គរ។ នេះសឲ្យឃើញអំពីសារសំខាន់បំផុតនៃកិច្ចការពារ និងអភិវឌ្ឍតំបន់នោះ៕
No comments:
Post a Comment
yes