រូបថតរបស់លោកម៉ម សូណង់ដូ ត្រូវបានក្រុមអ្នកគាំទ្រ លើកនៅចំពោះមុខ
កងកម្លាំងនគរបាលកាលពីថ្ងៃចន្ទ ក្នុងពេលតវ៉ាសុំឲ្យតុលាការដោះលែងប្រធានវិទ្យុរូបនេះ
វិភាគនយោបាយ
សាល ក្រម របស់សាលាដំបូងរាជធានីភ្នំពេញ កាលពីថ្ងៃចន្ទ ដែលបានផ្តន្ទាទោសលោកម៉ម សូណង់ដូ ឲ្យជាប់ពន្ធនាគាររហូតដល់ ២០ ឆ្នាំ និងពិន័យជាប្រាក់ចំនួន១០ លានរៀល គឺជាការសម្រេចក្តីថ្មីចុងក្រោយបំផុតមួយទៀត ដែលក្រុមអ្នកវិភាគ លើកមកចង្អុលបង្ហាញ ពីភាពមិនឯករាជ្យ របស់ប្រព័ន្ធតុលាការប្រទេសកម្ពុជា ដែលកំពុងទទួលរងនូវការរិះគន់កាន់តែខ្លាំងឡើង តាំងពីមជ្ឈដ្ឋានជាតិ និងអន្តរជាតិ។
កាលពីចុងខែឧសភា សាលាដំបូងរាជធានី បានសម្រេចផ្តន្ទាទោស ទៅលើស្ត្រីបឹងកក់ ចំនួន ១៣ នាក់ ឲ្យជាប់ពន្ធនាគារក្នុងម្នាក់ៗ ២ ឆ្នាំកន្លះ ពីបទរំលោភកាន់កាប់ដោយខុសច្បាប់ លើអចលនវត្ថុ របស់នីតិបុគ្គល សាធារណៈ និងបទប្រឆាំងអាជ្ញាធរសាធារណៈ ដោយមានស្ថានទម្ងន់ទោស ជាការផ្តន្ទាទោស ដែលមជ្ឈដ្ឋានជាច្រើនហៅថា «ម្ចាស់ផ្ទះជាប់គុក ចោរប្លន់ផ្ទះរួចខ្លួន»។ កាលពីដើមខែកញ្ញា តុលាការដដែលនេះ បានសម្រេចឃុំខ្លួនជាបន្តបន្ទាប់ទៅលើស្ត្រីអ្នកភូមិបឹងកក់ ម្នាក់ និងស្ត្រីសហគមន៍បុរីកីឡាម្នាក់ ពីបទប្រើអំពើហិង្សាដោយចេតនា និងពីបទញុះញង់ឲ្យប្រព្រឹត្តបទល្មើស ជាបទចោទប្រកាន់ ដែលក្រុមអ្នកភូមិ និងអង្គការសង្គមស៊ីវិលរិះគន់ថា ធ្វើឡើងដើម្បីបំបាក់ស្មារតីរបស់ក្រុមអ្នកភូមិ ដែលហ៊ានងើបតវ៉ា ការពារផ្ទះសម្បែងដីធ្លីរបស់ខ្លួនដែលត្រូវបានរំលោភបំពាន។
លោកម៉ម សូណង់ដូ ត្រូវបានផ្តន្ទាទោស ពីបទផ្ដើមគំនិតប្រឆាំងអ្នករាជការសាធារណៈ ផ្តើមធ្វើកុបកម្មជ្រៀតជ្រែកខុសច្បាប់ នៅក្នុងការបំពេញមុខងារសាធារណៈ ញុះញង់ឲ្យប្រជាពលរដ្ឋ កាន់អាវុធខុសច្បាប់ និងប្រឆាំងនឹងអាជ្ញាធរស្របច្បាប់ ដែលមានចែងក្នុងមាត្រា មួយចំនួននៃក្រមព្រហ្មទណ្ឌ។ បទចោទប្រកាន់ទាំងនេះ ពាក់ព័ន្ធទៅនឹងរឿងជម្លោះដីធ្លីដ៏ចម្រូងចម្រាសមួយ នៅក្នុងភូមិប្រមា ឃុំកំពង់ដំរី ស្រុកឆ្លូង ខេត្តក្រចេះ ដែលត្រូវបានរដ្ឋាភិបាលចោទថា ក្រុមអ្នកភូមិ ដែលដឹកនាំដោយ លោក ប៊ុន រដ្ឋា បានបង្កើតតំបន់អបគមន៍ ប្រឆាំងរដ្ឋាភិបាល។ នៅក្នុងការបង្ក្រាបកាលពីថ្ងៃទី១៦ ខែឧសភា កងកម្លាំងប្រដាប់ អាវុធរបស់រដ្ឋាភិបាល បានធ្វើការបាញ់រះ ធ្វើឲ្យត្រូវក្មេងស្រីអាយុ ១៤ ឆ្នាំម្នាក់ស្លាប់ ប៉ុន្តែរហូតមកដល់ពេលនេះ ពុំមានកម្លាំងសមត្ថកិច្ចណាម្នាក់ ត្រូវបានគេនាំយកមកផ្តន្ទាទោសទេ។
លោកអ៊ូ វីរៈ ប្រធានមជ្ឈមណ្ឌលសិទ្ធិមនុស្សកម្ពុជា បានចង្អុលទៅរកការថ្លែងរបស់លោកនាយករដ្ឋមន្ត្រីហ៊ុន សែន ហើយប៉ុន្មានថ្ងៃក្រោយមក តុលាការខេត្តក្រចេះ បានចេញដីកាចាប់ខ្លួនលោកម៉ម សូណង់ដូ ជាអំណះអំណាងមួយ ក្នុងចំណោមអំណះអំណាងផ្សេងទៀត ដែលលោក អ៊ូ វីរៈ បានលើកយកមកសំអាង ចំពោះអ្វីដែលលោកបាននិយាយថា សាលក្រមផ្តន្ទាទោសលោកម៉ម សូណង់ដូ ជាការសរសេរដោយអ្នកនយោបាយ។ លោកអ៊ូ វីរៈ បានគូសបញ្ជាក់ថា៖ «ខ្ញុំគិតថា ចៅក្រម ដែលអានសាលក្រមនេះ គាត់ក៏មានការឈឺចាប់ដែរ ពីព្រោះវាមិនមែនជាការសម្រេចផ្អែកទៅតាមផ្លូវច្បាប់ ដែលស្របទៅតាមឧត្តមគតិរបស់គាត់ជាចៅក្រម»។ លោកអ៊ូ វីរៈ ក៏បានលើកពីករណី អតីតអភិបាលក្រុងបាវិត ដែលបានដកកាំភ្លើងបាញ់កម្មករ ឲ្យរងរបួសធ្ងន់រហូតទៅដល់ ៣ នាក់ ត្រូវបានតុលាការចោទប្រកាន់ត្រឹមតែពីបទបង្ករបួសស្នាមដោយអចេតនា ហើយរហូតមកដល់ពេលនេះ មិនដែលត្រូវបានចាប់ខ្លួនឡើយ និងករណីលោកឧត្តមសេនីយ៍ផ្កាយពីរ ប៊ុន សុខា អតីតនាយរងសេនាធិការ កងអង្គរក្ស របស់លោកនាយករដ្ឋមន្ត្រីហ៊ុន សែន ពាក់ព័ន្ធទៅនឹងការវាយដំច្រំធាក់យ៉ាងធ្ងន់ធ្ងរ ទៅលើបុរស ៣ នាក់ រហូតដល់សន្លប់ នៅក្នុងសណ្ឋាគារមួយនៅខេត្តកោះកុង ដែលរហូតមកដល់ពេលនេះ មិនត្រូវបានជាប់ទោសឡើយ។ ចំណែកករណីលោកម៉ម សូណង់ដូរ វិញ លោកអ៊ូ វីរៈ មើលមិនឃើញពីទោសកំហុសជាក់ស្តែងណាមួយ ដែលគាត់បានប្រព្រឹត្តផ្ទុយពីច្បាប់ឡើយ ប៉ុន្តែតុលាការ បែរជាផ្តន្ទាទោសគាត់ រហូតទៅដល់ ២០ ឆ្នាំ។ លោកអ៊ូ វីរៈ គូសបញ្ជាក់ទៀតថា «តុលាការកម្ពុជា មិនឯករាជ្យទេ»។ សំណុំរឿងលោកម៉ម សូណង់ដូ គឺជារឿងនយោបាយសុទ្ធសាធ សូម្បីតែកូនក្មេង ក៏អាចមើលដឹងដែរ។
លោកស្រីចាំង ស៊ីណាត ចៅក្រមសាលាដំបូងរាជធានីភ្នំពេញ ដែលកាន់សំណុំរឿង និងជាអ្នកប្រកាសសាលក្រម លោកម៉ម សូណង់ដូ មិនអាចទាក់ទងសុំការអធិប្បាយបានទេ កាលពីម្សិលមិញ ដោយទូរស័ព្ទរោទ៍តែពុំមានអ្នកទទួល។
ប៉ុន្តែ លោកផៃ ស៊ីផាន អ្នកនាំពាក្សទីស្តីការគណៈរដ្ឋមន្ត្រី បានច្រានចោលចំពោះការរិះគន់ដែលថា សាលក្រមផ្តន្ទាទោសលោកម៉ម សូណង់ដូ ត្រូវបានសរសេរដោយអ្នកនយោបាយ។
លោកផៃ ស៊ីផាន បានមានប្រសាសន៍ថា៖«វាជាការវាយប្រហារដែលមិនអាចទទួលយកបាន។ បើថាជាសារណានយោបាយ ឲ្យគាត់វិភាគទៅលើបញ្ហាហ្នឹងទៅ» ហើយបើថា ភាគីការពារផលប្រយោជន៍លោកម៉ម សូណង់ដូ និយាយថា ការកាត់ទោសនេះធ្វើឲ្យខាតប្រយោជន៍លោកម៉ម សូណង់ដូ សូមទៅតតាំងនៅឧទ្ធរណ៍ទៅ។ លោកគូសបញ្ជាក់ថា មតិរិះគន់នៅខាងក្រៅតុលាការ វាគ្រាន់តែជាមតិសាមញ្ញតែប៉ុណ្ណោះ មិនមែនជាមតិរបស់អ្នកច្បាប់ទេ។
យ៉ាងណាក្តី លោកបណ្ឌិតឡៅ ម៉ុងហៃ អ្នកវិភាគឯករាជ្យមិនមានការភ្ញាក់ផ្អើលទេ ចំពោះការផ្តន្ទាទោសលោកម៉ម សូណង់ដូឲ្យ ជាប់ពន្ធនាគាររហូតទៅដល់ ២០ ឆ្នាំនោះ ប៉ុន្តែលោកមានការក្រៀមក្រំ ជាអ្វីដែលលោកហៅថា «ធ្វើឲ្យមានអំពើអយុត្តិធម៌កើតឡើង»។ លោកឡៅ ម៉ុងហៃ បានមានប្រសាន៍ថា រូបលោក ក៏ដូចជាមតិសាធារណជនជាច្រើនទៀតដែរ គឺយល់ថា សំណុំរឿងលោកម៉ម សូណង់ដូ គឺមានទិដ្ឋភាពនយោបាយ។ ចាប់តាំងពីការចាប់ខ្លួនមក គ្រប់គ្នាសុទ្ធតែយល់ថា លោកម៉ម សូណង់ដូ នឹងមិនរួចខ្លួនទេ។
ដោយសំដៅទៅលើការកោះហៅរបស់ តុលាការ ចំពោះសកម្មជនសិទ្ធិមនុស្សជាបន្តបន្ទាប់នាពេលថ្មីៗនេះ លោកឡៅ ម៉ុងហៃ បានគូសបញ្ជាក់ថា៖ «មានការកោះហៅសកម្មជនសិទ្ធិមនុស្សជាច្រើននាពេលថ្មីៗនេះ។ ដូច្នេះអាចសន្និដ្ឋានថា ប្រព័ន្ធតុលាការ ត្រូវបានគេប្រើប្រាស់ជាឧបករណ៍ ដើម្បីបង្ក្រាប បំបិទសិទ្ធិអ្នកប្រឆាំង»។ អ្នកវិភាគផ្សេងទៀតក៏មានមតិស្រដៀងគ្នា និងលោកឡៅ ម៉ុងហៃដែរ។
លោកបណ្ឌិតសុខ ទូច ជាអ្នកវិភាគឯករាជ្យ និងជាសាកលវិទ្យាធិការ នៃសាកលវិទ្យាល័យខេមរៈ បានថ្លែងថា ពាក្យថា «អបគមន៍» វាជារឿងនយោបាយរួចជាស្រេចទៅហើយ។ លោកសុខ ទូច បានចោទសួរ ចំពោះបទចោទដែលយោងទៅដល់ការបង្កើតតំបន់អបគមន៍ នៅស្រុកឆ្លូងខេត្តក្រចេះ ថាតើមានមូលដ្ឋានគ្រប់គ្រាន់ ក្នុងការបង្កើតតំបន់អបគមន៍ឬអត់? មានកម្លាំងទ័ព មានសព្វាវុធឬអត់? និងថា តើមានប្រទេសណាមួយ ជួយគាំទ្រដល់ការបង្កើតតំបន់អបគមន៍នោះឬអត់? លោកសុខ ទូច បានមានប្រសាសន៍ថា៖«(ករណី នៅឆ្លូង) វាជាការព័ទ្ធវាយ (ប្រជាពលរដ្ឋ) ឥតដឹងខ្លួន។ ថាតើអ្នកណា ជាអ្នកទទួលខុសត្រូវ ចំពោះការស្លាប់របស់ក្មេងស្រីម្នាក់? តុលាការធ្វើការកាត់ទោសលឿនពេក»។
លោកសុខ ទូច បានចោទសួរទៀតថា តើការដាក់បន្ទុកចោទប្រកាន់ ទៅលើជនជាប់ចោទលោក ម៉ម សូណង់ដូ មានភស្តុតាង និងមានមូលដ្ឋានគ្រប់គ្រាន់តាមផ្លូវច្បាប់ហើយឬនៅ? ប៉ុន្តែយ៉ាងណាក៏ដោយ លោក សុខ ទូច ថ្លែងថា នៅពេលនេះ តុលាការបានកាត់ទោសរួចហើយ ថាតើព្រះមហាក្សត្រគួរលើកលែងទោសឬយ៉ាងណា?
កាសែតភ្នំពេញ ប៉ុស្តិ៍ បានព្យាយាមទំនាក់ទំនងជាច្រើនលើក កាលពីម្សិលមិញ ដើម្បីសុំការអធិប្បាយ ពីលោកបណ្ឌិតជាម យៀប តំណាងរាស្ត្រគណបក្សប្រជាជនកម្ពុជា ប៉ុន្តែមិនមានអ្នកទទួលទូរស័ព្ទឡើយ។
ដោយធ្លាប់ជាអតីតអ្នក នយោបាយ និងជានាយកវិទ្យុសំបុកឃ្មុំ ដែលជាវិទ្យុឯករាជ្យល្បីឈ្មោះនៅកម្ពុជា ហើយក៏ធ្លាប់ជាប់ពន្ធនាគារ ចំនួនពីរដង រួចមកហើយនោះ កេរ្តិ៍ឈ្មោះរបស់លោកម៉ម សូណង់ដូ ហាក់ដូចជាកាន់តែល្បីសុសសាយ និងកាន់តែមានការយកចិត្តទុកដាក់ខ្លាំងឡើង នៅពេលលោកជាប់ពន្ធនាគារលើកទី៣ នេះទៀត។ យ៉ាងណាក៏ដោយ ប្រសិនបើសាលក្រមលើកនេះមិនត្រូវបានកែប្រែនោះបុរសវ័យ៧២ ឆ្នាំកាន់សញ្ជាតិខ្មែរ-បារាំងរូបនេះ នឹងត្រូវជាប់ពន្ធនាគាររហូតដល់អាយុ ៩២ ឆ្នាំ៕
No comments:
Post a Comment
yes