លោកនាយករដ្ឋមន្ត្រីហ៊ុន សែនថ្លែងក្នុងពិធីមួយកន្លងមក
ភ្នំពេញៈ ដីកាមួយដែលតុលាការចេញឲ្យអ្នកស្រី ទេព កុលាប សាកលវិទ្យាធិការ នៃសាកលវិទ្យាល័យភ្នំពេញអន្តរជាតិ ត្រូវបានលុបចោលហើយ បន្ទាប់ពីមានអន្តរាគមន៍ពីលោកនាយករដ្ឋមន្រ្តី ហ៊ុន សែន និងភរិយា។ នេះបើយោងតាមលោក ទូច ណារ៉ុថ ស្នងការរាជធានីភ្នំពេញ បានឲ្យដឹងកាលពីម្សិលមិញ។
លោក ទូច ណារ៉ុថ បានប្រាប់ភ្នំពេញ ប៉ុស្ត៍ តាមទូរស័ព្ទ ថា៖ «ឥឡូវនេះ រឿងក្តីអ្នកស្រី ទេព កុលាប បានចប់ហើយ។ ឥឡូវនេះ អ្នកស្រីរួចផុតពីការចោទប្រកាន់របស់តុលាការ ហើយដីកាតុលាការឲ្យនាំខ្លួនអ្នកស្រីទៅសាកសួរ ក៏បានលុបចោលផងដែរ»។ លោកបានបញ្ជាក់ថា៖ « សម្តេចនាយករដ្ឋមន្រ្តីបានសន្យាថា លោកនឹងរកយុតិ្តធម៌ឲ្យអ្នកស្រី។ នគរបាលក៏នឹងផ្តល់សុវត្ថិភាព និងសន្តិសុខដល់អ្នកស្រីផងដែរ»។
កាលពីព្រលប់ថ្ងៃចន្ទ អ្នកស្រីទេព កុលាប បានអះអាងថា មានខ្មាន់កាំភ្លើងមួយក្រុម បានតាមបាញ់រថយន្តរបស់អ្នក ស្រី បង្ខំឲ្យអ្នកស្រីរត់ចូលទៅគេហដ្ឋានរបស់លោកនាយករដ្ឋមន្រ្តី ។ បន្ទាប់ពីបានទៅដល់គេហដ្ឋានលោកនាយករដ្ឋមន្រ្តី និងជួបជាមួយនឹងអង្គរក្ស អ្នកស្រីត្រូវបាននាំចូលទៅក្នុងផ្ទះដើម្បីជួបលោកស្រី ប៊ុន រ៉ានី។ នេះបើយោងតាមអ្នកស្រី ទេព កុលាប និងមន្រ្តីម្នាក់បានឲ្យដឹងកាលពីម្សិលមិញ។
ដោយបដិសេធមិនអត្ថាធិប្បាយ លើទំហំនៃកិច្ចអន្តរាគមន៍ របស់លោកនាយករដ្ឋមន្រ្តី លោកឧត្តមសេនីយ៍ ចៅ តុល មេបញ្ជាការរង កងអង្គភាពអង្គរក្សរបស់ លោកនាយករដ្ឋមន្រ្តី បានបញ្ជាក់ថា លោក «បាននាំអ្នកស្រី ទេព កុលាប ទៅជួបលោកជំទាវ ប៊ុន រ៉ានី»។
ខណៈដែលអ្នកស្រី ទេព កុលាប បានអះអាងថា អ្នកទាំងឡាយ ដែលដេញតាមអ្នកស្រី ខណៈពេលអ្នកស្រី ចាកចេញពីមន្ទីរពេទ្យមិត្តភាពខ្មែរ-សូវៀត និងដែលបានបាញ់មកលើរថយន្តរបស់អ្នកស្រី អាចជាឃាតកនោះ លោក ទូច ណារ៉ុថ បានថ្លែងថា ការស៊ើបអង្កេតបានបង្ហាញថា បុរសទាំងនោះសុទ្ធតែជាមន្រ្តីនគរបាលបង្កប់ខ្លួន។
លោកបាន លើកឡើងថា៖ «ពុំមានមនុស្សចង់ធ្វើឃាតអ្នកស្រីទេព កុលាប នៅថ្ងៃនោះទេ។ អ្នកដែលជិះម៉ូតូ និងតាមរថយន្តអ្នកស្រីទេព កុលាប កាលពីល្ងាចថ្ងៃចន្ទ សុទ្ធតែជាភ្នាក់ងារនគរបាល។ គេតាមអ្នកស្រី ព្រោះគេទទួលបានដីកាឲ្យនាំខ្លួនពីតុលាការ»។ នៅពេលបុរសទាំងនោះ មិនអាចបញ្ឈប់រថយន្តបាន ដើម្បីប្រគល់ដីកាឲ្យអ្នកស្រី «ពួកគេក៏បាញ់ទៅលើមេឃ ដើម្បីបញ្ឈប់អ្នកស្រី និងរថយន្តកុំឲ្យបើកគេចខ្លួន»។
ការ រៀបរាប់បែបនេះ ត្រូវបានជំទាស់ដោយអ្នកស្រី ទេព កុលាប និងសាច់ញាតិបីនាក់ទៀត ដែលអមដំណើរអ្នកស្រី ក្នុងរថយន្ត នៅពេលបាញ់កាំភ្លើងនោះ។ អ្នកស្រីបានថ្លែងថា៖ «ប្រសិនបើគេចង់ឲ្យខ្ញុំចូលខ្លួនដើម្បីសាកសួរ គេគួរមកក្នុងអំឡុងម៉ោងការងារ ដោយពាក់ឯកសណ្ឋាន។ ហេតុអ្វីគេធ្វើបែបនេះ? តើអ្នកណាជាអ្នកបាញ់?»។
អ្នកស្រី ទេព កុឡាបបានបន្ថែមថា៖ « គេជាឃាតក។ គេចង់សម្លាប់ខ្ញុំ»។ អ្នកស្រីបាននិយាយថា បើទោះបីជាអ្នកស្រីគ្រោងទៅព្យាបាលនៅប្រទេសសិង្ហបុរី ក្នុងសប្តាហ៍នេះក៏ដោយ បន្ទាប់ពីត្រូវបានដោះលែងពីពន្ធនាគារ ឥឡូវនេះ អ្នកស្រីភ័យខ្លាចខ្លាំងណាស់ មិនហ៊ានចេញពីផ្ទះទេ។
កាលពីថ្ងៃសុក្រ តុលាការកំពូល បានលុបចោលបទចោទប្រកាន់ កេងប្រវ័ញ្ច ប្រឆាំងអ្នកស្រី ទេព កុលាប ដែលបានជាប់ពន្ធនាគារជាង ១ ឆ្នាំ ដោយសារបទចោទប្រកាន់ថា បានលួចប្រាក់ជាង ៥៨ លានដុល្លារអាមេរិក ពីលោក កុក អាន ព្រឹទ្ធសមាជិក ពីគណបក្សប្រជាជនកម្ពុជា។ ប៉ុន្មានថ្ងៃក្រោយមក មេធាវី របស់លោកព្រឹទ្ធសមាជិក កុក អាន និងនគរបាល បានបង្ហាញថា មានដីកាដទៃទៀត ទាក់ទងនឹងរឿងក្តីដែលបានប្តឹងដោយលោក កុក អាន ជាច្រើនឆ្នាំមកហើយ។
លោក ឡុង តារា មេធាវីម្នាក់ ក្នុងចំណោមមេធាវីជាច្រើននាក់ ដែលតំណាងលោកព្រឹទ្ធសមាជិក បានថ្លែងថា លោកបានដឹងក្រៅផ្លូវការថា រឿងក្តីនេះ ត្រូវបានលើកចោលហើយ ប៉ុន្តែលោកមិនទាន់បានទទួលសេចក្តីជូនដំណឹង ពីតុលាការនៅឡើយទេ។ លោកបានបន្ថែមថា៖ «កូនក្តីខ្ញុំ ជាជនរងគ្រោះក្នុងរឿងក្តីនេះ មិនសប្បាយចិត្តនឹងសេចក្តីសម្រេចរបស់តុលាការកំពូល និងការដោះលែងអ្នកស្រី ទេព កុលាបទេ ព្រោះវាអយុតិ្តធម៌ចំពោះរូបគាត់»។
លោក ជីវ កេង ប្រធានសាលាដំបូងរាជធានីភ្នំពេញ មិនអាចទាក់ទងសុំការអត្ថាធិប្បាយបានទេ ចំណែកឯលោក កោ វណ្ឌី ចៅក្រមស៊ើបអង្កេត លើរឿងក្តីនេះបានលើកទូរស័ព្ទ ហើយបានបដិសេធមិននិយាយអ្វីទេ នៅពេលអ្នកយកព័ត៌មានប្រាប់ថា ខ្លួនអ្នកយកព័ត៌មាន។
លោក ហូ សុទ្ធី នាយកខុទ្ទកាល័យនាយករដ្ឋមន្រ្តី មិនអាចទាក់ទងសុំការអត្ថាធិប្បាយបានទេ៕
No comments:
Post a Comment
yes