លោក សម រង្ស៊ី ស្នើឲ្យរដ្ឋាភិបាល អូស្រ្តាលី ចូលរួមជាមួយអន្តរជាតិ ដើម្បីដាក់សម្ពាធលើរដ្ឋាភិបាលកម្ពុជា ដើម្បីកែទម្រង់ប្រព័ន្ធបោះឆ្នោត សម្រាប់ឆ្នាំ២០១៣។
ការបន្តស្វែងរកអន្តរាគមន៍ ដើម្បីកែទម្រង់ គ.ជ.ប នៅកម្ពុជា បានធ្វើឡើង ខណៈលោក សម រង្ស៊ី ប្រធានគណបក្សសង្គ្រោះជាតិ ផ្តល់បទសំភាសន៍ជាមួយវិទ្យុអូស្រ្តាលី ABC នៅថ្ងៃសុក្រនេះ នៅពេលលោក និងលោក កឹម សុខា ធ្វើដំណើរទៅកាន់ប្រទេសនេះ។
លោក សម រង្ស៊ី មានប្រសាសន៍ថា រដ្ឋាភិបាលអូស្រ្តាលីជាម្ចាស់ជំនួយដ៏ធំមួយរបស់កម្ពុជាដូចនេះលោកស្នើឲ្យរដ្ឋាភិបាលអូស្ត្រាលីដាក់សម្ពាធលើរដ្ឋាភិបាលនេះឲ្យគោរពអង្គការសហប្រជាជាតិ និង កែទម្រង់ប្រព័ន្ធបោះឆ្នោតនៅកម្ពុជា។
អនុប្រធានអង្គភាពព័ត៌មាន និងប្រតិកម្មរហ័ស នៃទីស្តីការគណៈរដ្ឋមន្រ្តីលោក កែវ រ៉េមី មានប្រសាសន៍កាលពីថ្ងៃទី០២ ខែតុលាថា គណបក្សប្រឆាំងមានទម្លាប់ ពឹងបរទេស ឲ្យអន្តរាគមន៍ពេលដែលមានរឿងរ៉ាវជាមួយរដ្ឋាភិបាល ដូចជា ករណីស្នើប្រធានាធិបតី សហរដ្ឋអាមេរិក លោក បារ៉ាក់ អូបាមា មិនឲ្យមកប្រទេសកម្ពុជា ដើម្បីដាក់គំនាបលើរដ្ឋាភិបាលកម្ពុជាជាដើម។ លោកចោទថា គណបក្សប្រឆាំង មានផ្នត់គំនិតរណបបរទេស ខណៈដែលបរទេសមួយ ចំនួនមិនចង់ឃើញកម្ពុជារីកចម្រើន ៖ “អត់មានបង្ហាញភាព មោទនភាពមួយ ថាជាតិខ្មែរអាចធ្វើអ្វីឯករាជ្យត្រឹមត្រួវ ច្បាស់លាស់ ហើយប្រទេសយើង និយាយឲ្យចំទៅក្នុងគ្រួសារ ចូលចិត្តតែហែក ឲ្យគេមើលហ្នឹង ក៏ប៉ុន្តែវាគ្មានអ្វីធ្ងន់ធ្ងរដូចបណ្តាប្រទេសផ្សេងៗ។”
នាយកប្រតិបត្តិអង្គការឃ្លាំមើលការបោះឆ្នោតមួយ ហៅកាត់ ខុមហ្វ្រែល លោក គល់ បញ្ញា មានប្រសាសន៍ថា ការស្នើរបស់គណបក្សប្រឆាំងនឹងមានការចាប់អារម្មណ៏ពីអន្តរជាតិ ៖ “យើងនៅច្រើន យើងមិនទាន់ទៅដល់វាស្តង់ដារអន្តរជាតិមួយ ការបោះឆ្នោតដោយសេរីយុត្តិធម៌ទេ ធ្វើឲ្យអ្នកប្រកួតប្រជែងហ្នឹង គេអស់ចិត្តគេធ្វើការបោះឆ្នោតមួយ ដែលមានលទ្ធផល មានអ្នកឈ្នះ អ្នកចាញ់វាអស់ចិត្តទៅ ដំណើរការធម្មតា វានៅអញ្ចឹងរហូត។”
កាលពីថ្ងៃទី៣០ ខែសីហា ឆ្នាំ២០១២ គណបក្សសមរង្ស៊ី និងគណបក្សសិទ្ធិមនុស្ស បានស្នើឲ្យមានការផ្លាស់ប្តូរសមាសភាព គ.ជ.ប សម្រាប់ការបោះឆ្នោតឆ្នាំ២០១៣ ខាងមុខ តែសំណើរនេះ ត្រូវបានរដ្ឋមន្រ្តីក្រសួងមហាផ្ទៃច្រានចោល ដោយអះអាងថា ការផ្លាស់ប្តូរនេះ អាចនាំឲ្យដំណើការបោះឆ្នោតជាប់គាំង និងមានស្ថិរភាពនយោបាយ៕
No comments:
Post a Comment
yes