ខេត្ដស្ទឹងត្រែង ៖ លោកសិទ្ធិ សំណាង ប្រធានផ្នែករដ្ឋបាលព្រៃឈើស្ទឹងត្រែង គួរតែមានវិធានការចុះ ទប់ស្កាត់ ឬបង្ក្រាបនូវការដឹកជញ្ជូនឈើខុសច្បាប់តាមទូក កាណូត នៅពេលយប់របស់មេៗ ឈ្មួញជើងខ្លាំងផង នៅគ្រាដែលអាជ្ញាធរ សមត្ថកិច្ចពាក់ព័ន្ធ ជាពិសេសមន្ត្រីជំនាញរដ្ឋបាលព្រៃឈើរបស់លោកដែលជានាយផ្នែករដ្ឋបាលព្រៃឈើស្ទឹងត្រែងនោះ កំពុងតែងប់ងល់ នឹងទទួលផលប្រយោជន៍ពីក្រុមឈ្មួញទាំងនោះ ។
បើតាមប្រភពរាយការណ៏ថា សព្វថ្ងៃនេះគេបានឃើញជាប្រចាំប្រភេទឈើធ្នង់ និងបេង ត្រូវបានឈ្មួញដឹកចេញពី ចំណុចស្រុកភូមិសាស្ត្រស្រុកសៀមប៉ាង និងស្រុកសេសាន ដឹកតាមទូកនិងកាណូត ព្យាងឆ្លងកាត់ផ្នែក និងខណ្ឌរដ្ឋបាលព្រៃឈើខេត្តស្ទឹងត្រែងនៅពេលយប់ស្ងាត់ ។
ឈើប្រណីតទាំងនោះមួយចំនួន ត្រូវបានឈ្មួញដឹកតាមរថយន្តឆ្លងកាត់ដែនសមត្ថកិច្ចឆ្ពោះទៅខេត្ដរតនគិរី ឯមួយ ចំនួនទៀតដែលដឹកតាមទូក និងកាណូតឆ្ពោះទៅកាន់ខេត្ដក្រចេះ ។ ដូច្នេះបើទោះជាឈើប្រណិតទាំងអស់នោះ មានស្លាបហើរយ៉ាងណាក៏ដោយក៏គេចមិនផុតពីការឆ្លងកាត់ទឹកដី ក្រុងស្ទឹងត្រែង ដែលពោរពេញដោយភ្នែកម្នាស់របស់សមត្ថកិច្ចចម្រុះ ជាពិសេសផ្នែក និងខណ្ឌរដ្ឋបាលព្រៃ ឈើខេត្តស្ទឹងត្រែងនោះឡើយ ។
នៅក្នុងសកម្មភាពដឹកឈើប្រណិតតាមទូកព្យាងនៅពេលយប់នោះ ត្រូវបានមន្ត្រីសមត្ថកិច្ចដែល គ្មានតួនាទីបង្ក្រាបមួយរូបប្រាប់ឲ្យដឹងថា កាលពីយប់ថ្ងៃអាទិត្យចុងសប្តាហ៏ទើបកន្លងទៅនេះ មានមេ ឈ្មួញម្នាក់ឈ្មោះឡែននិងមេឈ្មួញម្នាក់ទៀតឈ្មោះផល ដែលមានមូលដ្ឋាននៅខេត្តក្រចេះ ហើយក៏ ជាមេឈ្មួញរកស៊ីឈើដុះស្នឹមរាប់ឆ្នាំមកហើយនោះ បានធ្វើសកម្មភាពដឹកឈើប្រណិតតាមទូកព្យាង ពីរគ្រឿងចេញពីទន្លេសេកុង ក្នុងទឹកដីស្រុកសេសាន ជាប់ព្រំប្រទល់ស្រុកសៀមប៉ាង ឆ្លងកាត់ ផ្នែកនិងខណ្ឌរដ្ឋបាលព្រៃឈើខេត្តស្ទឹងត្រែងឆ្ពោះទៅកាន់ទឹកដីខេត្តក្រចេះបានយ៉ាងរលូន ។
ប្រភពដដែលបានបន្តឲ្យដឹងទៀតថា ទូកដឹកឈើរបស់មេឈ្មួញឡែន និងផល មានមន្ត្រីរដ្ឋបា លព្រៃឈើមួយរូប មន្ត្រីប្រដាប់អាវុធមួយរូប និងអ្នកលក់ទូរស័ព្ទដៃម្នាក់ ដាក់លុយរកស៊ីចូលហ៊ុនជាមួ យគ្នា ។ នៅពេលមេឈ្មួញឡែនចុះឈើតាមទូកម្តងៗ មានមន្ត្រីរដ្ឋបាលព្រៃឈើ និង មន្ត្រីប្រដា ប់អាវុធដែលមានភាគហ៊ុននោះជាអ្នកកាងធ្វើជាខ្នងបង្អែក ។ ដូច្នេះនៅពេលមេឈ្មួញឡែនចុះឈើគឺ មានមន្ត្រីជើងខ្លាំងទាំងពីរនាក់ខាងលើ ចេញមុខរត់ការបង់លុយទៅឲ្យសមត្ថកិច្ចជើងខ្លាំងៗ ដែលមាន ទូកស៊ីខេសំរាប់ចាំប្រដេញ និងចាប់ បើមេឈ្មួញណាមិនចូលបង់លុយឲ្យមានដូចជា៖ នគរបាលផ្លូវទឹក ស្ថាប័នប្រដាប់អាវុធពាក់ព័ន្ធ ជាពិសេសមន្ត្រីជំនាញរដ្ឋបាលព្រៃឈើតែម្តង ។ហើយប្រភពបានបង្ហើប ឲ្យដឹងថា មេឈ្មួញឈ្មោះឡែន មិនសូវញញើតលោកនាយផ្នែក និងនាយខណ្ឌខេត្តទេ ព្រោះគេអាង មានមន្ត្រីជើងខ្លាំងទាំងពីរនាក់ខាងលើកាងឲ្យ ។
មន្ត្រីរាជការមួយចំនួនបានរិះគន់ថា ដោយសារភាពធូររលុងរបស់លោកទសិទ្ធិ សំណាង ក៏ដូចជា លោកនាយខណ្ឌខេត្ត ទើបមេឈ្មួញឡែនមានឱកាសដឹកជញ្ជូនឈើប្រណិតតាមទូកបាន ហើយក៏ជា ការផ្តល់ឧិកាសឱ្យមន្ដ្រីរដ្ឋបាលព្រៃឈើក្រោមឧិវាទគ្រប់ជាន់ថ្នាក់ ប្រមូលប្រាក់ ពីឡាននិងទូកដឹកឈើខុសច្បាប់ទាំងនោះ ទើបបទល្មើសកាន់តែកើនឡើង ហើយមន្ដ្រីនីមួយៗមានតួនាទីដ៏សំខាន់ចាំរាប់ក្បាលឡាន និងកាណូតយកប្រាក់ពីមេឈ្មួញ។
ជុំវិញការដឹកជញ្ជូនឈើតាមទូកព្យាងរបស់មេឈ្មួញឡែន ហើយគ្មានអ្នកបង្ក្រាបនោះ អ្នកយកព័ត៌មាននគរវត្ត បានទូរស័ព្ទសុំការបំភ្លឺពីលោក ចាន់ នាយសង្កាត់រដ្ឋបាលព្រៃឈើសេសាន ហើយលោក ចាន់ បានឆ្លើយថា ករណីដឹកជញ្ជូនឈើតាមទូកព្យាងខាងលើនោះ មិនពិតទេ គឺគ្មានបទល្មើសព្រៃឈើកើតឡើងឡើយ ។
បន្ទាប់មកទូរស័ព្ទក៏បានភ្ជាប់ទៅកាន់លោក សិទ្ទិ សំណាង ទៀតតែទូរស័ព្ទមិនអាចទំនាក់ទំនង បានទេ ហើយក៏បន្តតភ្ជាប់ទៅកាន់លោកសួន ម៉េងលី មន្ត្រីផ្នែករដ្ឋបាលព្រៃឈើស្ទឹងត្រែង លោកបានឆ្លើយបដិសេធថា គ្នានការដឹកជញ្ជូនឈើតាមផ្លូវទឹកកើតឡើងទេ ។ ប្រសិនបើមានមែន មិនអាច គេចផុតពីក្រសែភ្នែកសមត្ថកិច្ចចម្រុះរាប់សិបនាក់ ដែលប្រចាំការតាមផ្លូវទឹកនោះបានឡើយ ហើយ ក្រុមមន្ត្រីទាំងនោះ ប្រាកដជាធ្វើការបង្ក្រាប ។ ចំណែកមេឈ្មួញឈ្មោះឡែន លោកធ្លាប់ឭឈ្មោះតែ មិនដែលឃើញមុខឡើយ ហើយបើជួបលោកនឹងចាប់ ទោះជាលោកឡែនមានខ្នងបង្អែកនៅពីក្រោយខ្នងក៏ដោយ ៕
No comments:
Post a Comment
yes