កម្មករក្រុមហ៊ុនភាពីម៉ិច (Pheapimex) ក្នុងខេត្តពោធិ៍សាត់ រាប់ពាន់នាក់មិនបានបើកប្រាក់ការងាររបស់ពួកគាត់ ២ខែហើយ។ កម្មករទាំងនោះខ្លះដាច់បាយ ខ្លះធ្លាក់ខ្លួនឈឺគ្មានលុយទិញថ្នាំព្យាបាល ខ្លះត្រូវធនាគារគំរាមរឹបអូសដីធ្លី ផ្ទះសម្បែង ព្រោះគាត់គ្មានប្រាក់បង់ថ្លៃការប្រាក់ឲ្យគេតាមកាលកំណត់។
៣-មេសា-២០១២៖ ចម្ការដំឡូងមីរបស់ក្រុមហ៊ុនភាពីម៉ិច នៅឃុំក្បាលត្រាច ស្រុកក្រគរ ខេត្តពោធិ៍សាត់។
អាជ្ញាធរដែនដីភូមិឃុំ បានឲ្យដឹងថា ពួកគាត់ពុំអាចចូលទៅក្នុងការដ្ឋាន ដើម្បីជួយអន្តរាគមន៍ជូនប្រជាពលរដ្ឋទាំងនោះទេ ព្រោះក្រុមហ៊ុននេះមានអំណាចខ្លាំងណាស់។ បុគ្គលិកជនជាតិចិន ក្នុងការដ្ឋាន សុទ្ធតែមានកាំភ្លើងកាន់ទៀតផង។
កម្មករដាំដំឡូងឲ្យក្រុមហ៊ុនភាពីម៉ិច នៅការដ្ឋាននានាក្នុងស្រុកក្រគរ និងស្រុកភ្នំក្រវាញ រាប់ពាន់នាក់ ប្រតិកម្មតវ៉ាដោយចោទប្រកាន់ថា រយៈពេល ២ខែហើយ ក្រុមហ៊ុនមិនព្រមបើកប្រាក់ខែឲ្យពួកគាត់។
តំណាងឲ្យកម្មករដាំដំឡូងឲ្យក្រុមហ៊ុនភាពីម៉ិច នៅការដ្ឋានទី១៨ ត្រង់ចំណុចអូរអង្គុញ ឈ្មោះ ឯក សុភ័ណ្ឌ អាយុ ៤៨ឆ្នាំ គាត់បានឲ្យដឹងនៅព្រឹកថ្ងៃទី២៦ តុលា ថា កម្មករនៅការដ្ឋានទី១៨ ប្រមាណ ៤០០នាក់ ពុំបានបើកប្រាក់ខែតាំងពីខែកញ្ញា រហូតមកដល់ថ្ងៃទី២៦ ខែតុលា នេះ។
គាត់បន្តថា ពេលកម្មករសួរទៅមេការចិន តាមរយៈអ្នកបកប្រែ មេការនោះឆ្លើយថា ចាំថ្ងៃនេះថ្ងៃនោះរហូត តែការងារចេះតែបង្ខំឲ្យកម្មករធ្វើឥតឈប់ ថែមទាំងគំរាមថា បើនរណាឈប់ គឺគេមិនបើកប្រាក់ខែឲ្យទេ៖ «និយាយពីការងារ គឺសុទ្ធតែកំណត់ម៉ែត្រ ហើយបើធ្វើមិនស្អាតទេ គឺគេកាត់លុយ។ បាក់ដំឡូងមួយដើម ក៏គេកាត់លុយដែរ។ ពេលធ្វើស្មៅរួច ហៅមេការមកមើល យល់ព្រមទទួលថាបាន ១០០% ហើយ តែដល់ពេលទៅបើកលុយ គេកាត់ គេឲ្យតែ ១៧.៥០០ទេ។ ហើយអា ១៧.៥០០ ក៏អត់ឃើញទៀតបងគិតមើលតាំងពីខែកញ្ញា មកម្ល៉េះ»។
កម្មការិនីឈ្មោះ ឃិន សុផាត អាយុ ២៦ឆ្នាំ បានឲ្យដឹងបន្ថែមថា មេការចិន នៅការដ្ឋានទី១ ដែលគាត់កំពុងធ្វើការនេះ បានធ្វើបាបកម្មករយ៉ាងខ្លាំង ដោយតម្រូវឲ្យកម្មករជម្រះស្មៅក្នុងមួយថ្ងៃ ៦០០ម៉ែត្រ ដោយសន្យាថា ឲ្យកម្រៃ ២ម៉ឺនរៀល តែដល់ពេលបើកលុយ បើកឲ្យតែ ១៧.៥០០រៀលប៉ុណ្ណោះ ហើយឥឡូវ ២ខែហើយមិនព្រមបើកឲ្យកម្មករទៀត៖ «គ្នាហត់នឿយខ្លាំងណាស់ ម្ង៉ៃៗរហូតដល់ម៉ោងមួយម៉ោង២រសៀល មិនទាន់បានបាយទេ។ ហើយឥឡូវអត់បើកលុយឲ្យទៀត សូម្បីតែពេលភ្ជុំ ក៏អត់បានទៅផ្ទះដែរ ព្រោះអត់លុយ។ សូមឲ្យសម្ដេច ហ៊ុន សែន ជួយប្រជាពលរដ្ឋផង វេទនាខ្លាំងណាស់។ ឲ្យចិន មកនេះ ដើម្បីឲ្យប្រជាពលរដ្ឋមានការងារធ្វើ តែចិន អត់បើកលុយឲ្យកម្មករទេ។ រកទៅផ្ទះវិញ ក៏ទៅមិនបាន ព្រោះអត់មានលុយ អង្ករក៏អត់មានដាំបាយហូបទៀត ជួយកម្មករផង វេទនាខ្លាំងណាស់»។
វិទ្យុអាស៊ីសេរី មិនអាចទាក់ទងសុំការបំភ្លឺពីមេការចិន នៅតាមការដ្ឋានដែលមានបញ្ហាទាំងនោះបានទេ នៅល្ងាចថ្ងៃទី២៦ តុលា។
ជំទប់ទី១ ឃុំឈើតុំ គឺលោក រឿន វ៉ាន់ មានប្រសាសន៍ថា អាជ្ញាធរដែនដីបានដឹងរឿងនេះទាំងអស់ តែពុំមានលទ្ធភាពជួយប្រជាពលរដ្ឋបានទេ ព្រោះក្រុមហ៊ុននេះអាងអំណាចខ្លាំងណាស់ គេមិនសហការជាមួយអាជ្ញាធរទេ។
ដូចគ្នានេះដែរ អនុប្រធានមន្ទីរការងារ និងបណ្ដុះបណ្ដាលវិជ្ជាជីវៈខេត្តពោធិ៍សាត់ គឺលោក កុល ប៊ុនធឿន លោកមានប្រសាសន៍ថា មន្ទីរការងារខេត្តក៏មិនអាចទាក់ទង ដើម្បីគ្រប់គ្រងកម្មករដែលធ្វើការឲ្យក្រុមហ៊ុនបានដែរ ព្រោះក្រុមហ៊ុននេះមិនសហការជាមួយមន្ទីរនោះទេ។ យ៉ាងនេះក្ដី លោកសន្យាថា នឹងរាយការណ៍បញ្ហានេះទៅគណៈអភិបាលខេត្ត ដើម្បីស្វែងរកដំណោះស្រាយជូនកម្មករ៖ «ដល់អ៊ីចឹងទៅ យើងដាច់ទំនាក់ទំនងមួយប្រាំងហើយ ខ្ញុំអត់ដែលបានទៅទេ ព្រោះយើងមានបញ្ហាមួយចំនួនជាមួយក្រុមហ៊ុន។ ពីមុន យើងអាចចូលបាន ព្រោះមានលោក ទី គឹមតុក ជួយអន្តរាគមន៍។ ឥឡូវអត់មានអ្នកទទួលខុសត្រូវ យើងពិបាកចូល»។
ប្រភពពីកម្មករបានឲ្យដឹងថា ក្នុងការដ្ឋាននានារបស់ក្រុមហ៊ុនភាពីម៉ិច គេជួលកម្មករម៉ៅការក្នុងតម្លៃ ២ម៉ឺនរៀល និងអង្ករមួយគីឡូក្រាមក្នុងមួយថ្ងៃ តែមេការតែងគាបសង្កត់ និងកេងប្រវ័ញ្ចលើកម្មករ ដោយបើកប្រាក់ និងអង្ករមិនគ្រប់ចំនួនឲ្យកម្មករជាដើម តែគេមិនដឹងប្រាប់នរណាឲ្យជួយ ក៏ចេះតែនាំគ្នាទ្រាំៗទៅ ព្រោះអាជ្ញាធរដែនដីភូមិឃុំ និងស្រុក មិនអាចចូលក្នុងការដ្ឋានក្រុមហ៊ុនបានទេ៕
No comments:
Post a Comment
yes