ការសាងសង់ផ្លូវចាក់បេតុងពីរខ្សែ នៅក្នុងក្រុងសិរីសោភ័ណ ខេត្តបន្ទាយមានជ័យ កំពុងកើតមានបញ្ហាជាច្រើនជាមួយប្រជាពលរដ្ឋនៅក្នុងភូមិ។ ក្រុមអ្នកភូមិចោទថា អាជ្ញាធរបានសហការគ្នាជាមួយក្រុមហ៊ុនម៉ៅការសាងសង់ផ្លូវ បង្ខំឲ្យពួកគាត់បង់ប្រាក់បដិភាគ ថ្លៃការរៀបចំប្រព័ន្ធលូ ច្រើនហួសហេតុ ដែលមិនអាចទទួលយកបាន។
ប្រជាពលរដ្ឋជាច្រើនគ្រួសារ បានបដិសេធមិនព្រមបង់ប្រាក់ដែលអាជ្ញាធរបានចាប់បង្ខំឲ្យពួកគាត់ចេញសម្រាប់ថ្លៃលូ ដែលគេរៀបចំដាក់នៅអមសងខាងផ្លូវចាក់បេតុងពីរខ្សែ នៅឃុំព្រះពន្លា ក្រុងសិរីសោភ័ណ ខេត្តបន្ទាយមានជ័យ។ ពួកគាត់អះអាងថា គម្រោងការកសាងផ្លូវចាក់បេតុងនៅក្នុងមូលដ្ឋាននោះ គឺជាគម្រោងថវិការបស់រដ្ឋ ហើយពួកគាត់គ្រាន់តែមានកាតព្វកិច្ចក្នុងការចូលរួមថែទាំសមិទ្ធផលទាំងនោះ។
លោក សុខ កៅ អាយុ ៣៩ឆ្នាំ មានមុខរបរជាគ្រូបង្រៀន បច្ចុប្បន្នរស់នៅភូមិ៤ សង្កាត់ព្រះពន្លា ក្រុងសិរីសោភ័ណ ខេត្តបន្ទាយមានជ័យ លោកបានឲ្យដឹងកាលពីថ្ងៃទី២៦ ខែតុលា ថា មានប្រជាពលរដ្ឋជាច្រើនគ្រួសារជាអ្នកក្រីក្រ ប៉ុន្តែត្រូវអាជ្ញាធរបង្ខំឲ្យបង់លុយថ្លៃលូជាច្រើនរយដុល្លារ។ លូមួយកង់ ថ្លៃ ៣៥ដុល្លារ ទៅ ៤៥ដុល្លារ៖ «ដាច់ខាតខ្ញុំអត់មានលុយទេ ព្រោះអីខ្ញុំមន្ត្រីរាជការ ប្រាក់ខែតិចណាស់។ គ្រួសារខ្លះអត់ដូចខ្ញុំអ៊ីចឹង ហើយមានលុយអីទៅចេញឲ្យគេ។ អាជ្ញាធរគេលាក់ការ ព្រោះអីនៅផ្លូវរ៉ា គ្រួសារប៉ូលិសខ្លះគេថា គេអត់ឲ្យ គេយកច្រើនជាងខ្ញុំទៀត គេយក ៤៥ដុល្លារ អាហ្នឹងលូកងធំ ផ្លូវថ្នល់រដ្ឋអ្នកធ្វើ ហើយខ្ញុំរកស៊ីអីបានលុយទៅបង់»។
អាជ្ញាធរខេត្តបន្ទាយមានជ័យ បានចាប់ផ្ដើមការកសាងផ្លូវចាក់បេតុងពីរខ្សែ នៅក្នុងសង្កាត់ព្រះពន្លា ក្រុងសិរីសោភ័ណ ខេត្តបន្ទាយមានជ័យ។ ផ្លូវមួយខ្សែទៅកាន់ស្ពានព្រះពន្លា មានប្រវែង ៥០០ម៉ែត្រ និងមួយខ្សែទៀត ចូលទៅស្ថានីយរថភ្លើង មានប្រវែង ៣២០ម៉ែត្រ។ ផ្លូវទាំងពីរខ្សែនេះ ជាផ្លូវចាក់បេតុង ហើយរៀបចំដាក់ប្រព័ន្ធលូនៅអមសងខាងផ្លូវ។
មេឃុំព្រះពន្លា លោក ជា ហួន បានបញ្ជាក់ថា អាជ្ញាធរមូលដ្ឋានបានអនុវត្តផែនការនេះទៅតាមសេចក្ដីសម្រេចរបស់ខេត្ត។ ការចាប់ផ្ដើមកសាងផ្លូវចាក់បេតុងនេះ បានធ្វើឡើងនៅមុនរដូវភ្ជុំបិណ្ឌ។ លោកបន្តថា រដ្ឋជាអ្នកចំណាយលើការកសាងផ្លូវចាក់បេតុង ចំណែកប្រជាពលរដ្ឋត្រូវបង់លុយថ្លៃលូ ដែលអូសកាត់ខាងមុខផ្ទះរបស់គាត់។ លូមុខ ៦តឹក ក្នុងមួយកង់ ថ្លៃ ៣៥ដុល្លារ លូមុខ ៨តឹក ក្នុងមួយកង់ ថ្លៃ ៤៥ដុល្លារ៖ «អាហ្នឹងគោលការណ៍របស់ខេត្ត ផ្លូវចូលស្ពានឈើព្រះពន្លាមួយខ្សែ និងផ្លូវចូលស្ថានីយរថភ្លើង អាហ្នឹងគឺខេត្តបានធ្វើផ្លូវបេតុងហ្នឹងឲ្យ។ ដោយឡែកលូហ្នឹង ខេត្តឲ្យជួយចេញថ្លៃលូតាមទំហំដី ដូចថាមុខផ្ទះគាត់ ៦ម៉ែត្រ យើងគិត ៦កង់»។
អភិបាលក្រុងសិរីសោភ័ណ លោក អ៊ុំ រាត្រី បានថ្លែងថា កន្លងទៅនេះអាជ្ញាធរមូលដ្ឋានបានកោះអញ្ជើញប្រជាពលរដ្ឋប្រជុំ ដោយប្រាប់ថា អាជ្ញាធរខេត្តចេញលុយធ្វើផ្លូវចាក់បេតុង ចំណែកប្រជាពលរដ្ឋចេញលុយលើការរៀបចំប្រព័ន្ធលូទាំងអស់ដែលមាននៅតាមមុខផ្ទះរបស់ពួកគាត់៖ «ហើយការចេញលូ ក៏យើងគិតគូរដែរ មិនមែនឲ្យប្រជាពលរដ្ឋលុយថ្លៃលូភ្លាមនោះទេ។ យើងមានដំណាក់កាលឲ្យគាត់បង់សងរំលោះទៅតាមលទ្ធភាពជាក់ស្ដែង ហើយក្រុមហ៊ុនធ្វើកិច្ចសន្យាជាមួយប្រជាពលរដ្ឋក្នុងនាមអាជ្ញាធរសម្របសម្រួលជូនគាត់ អត់មានឲ្យដាក់លូទៅហើយ ក្រុមហ៊ុនយកលុយភ្លាមអត់ទេ។ យើងមានរយៈពេលរបស់យើងឲ្យគាត់បង់ទៅតាមលទ្ធភាពរបស់គាត់»។
ទាក់ទិនការតម្រូវឲ្យប្រជាពលរដ្ឋចេញថវិកានេះ សមាគមអាដហុក យល់ឃើញថា ប្រជាពលរដ្ឋមួយចំនួនពុំមានលទ្ធភាពចេញប្រាក់បដិភាគ។ រដ្ឋមិនត្រូវចាប់បង្ខំឲ្យប្រជាពលរដ្ឋបង់លុយបដិភាគ ដោយពុំមានការកំណត់ច្បាស់លាស់ដូច្នេះទេ។ ប្រជាពលរដ្ឋខ្លះក្រីក្រពុំមានមុខរបរ ហើយត្រូវចាប់បង្ខំឲ្យបង់លុយថ្លៃលូក្នុងមួយកង់ថ្លៃ ៣៥ដុល្លារ ទៅ ៤៥ដុល្លារ។
លោក ស៊ុំ ច័ន្ទគា ជាអ្នកសម្របសម្រួលសមាគមអាដហុក ប្រចាំខេត្តបន្ទាយមានជ័យ បានចោទសួរថា តើលូ១០កង់ ត្រូវបង់អស់ប៉ុន្មាន? ប្រជាពលរដ្ឋបានលុយពីណាយកទៅបង់ថ្លៃលូទាំងនោះ៖ «ចុះបើគាត់មិនមានលុយគ្រប់ តើគិតយ៉ាងម៉េចដែរ ឬមួយកាយដាក់នៅប្រឡោះផ្ទះគាត់ហ្នឹង ហើយប្រហោងពិបាកនៅក្នុងការចេញចូល»។
លោកបន្តថា ការកសាងផ្លូវ និងរៀបចំប្រព័ន្ធលូនេះ គឺជាកាតព្វកិច្ចរបស់រដ្ឋ។ ប្រជាពលរដ្ឋខ្លះក្រីក្រអត់លុយ អ្នកខ្លះទៀត ពុំត្រូវបានគេកោះប្រជុំប្រាប់ទេ។ រាល់ការអភិវឌ្ឍ គឺគេតម្រូវឲ្យប្រជាពលរដ្ឋចូលរួមក្នុងការថែទាំ ថែរក្សាឲ្យសមិទ្ធផលនោះមានការស្ថិតស្ថេរយូរអង្វែង។ ដូច្នេះអាជ្ញាធរត្រូវថ្លឹងថ្លែងពិនិត្យបញ្ហានេះឡើងវិញ៕
No comments:
Post a Comment
yes