បាត់ដំបងៈ មន្ត្រីស្ថានទូតថៃនៅភ្នំពេញកាលពីម្សិលមិញបាន ច្រានចោលព័ត៌មានដែលថា ទាហានថៃបានដាក់ពង្រាយគ្រាប់មីនកែច្នៃ ដើម្បីធ្វើជាមធ្យោបាយទប់ស្កាត់ពលករខ្មែរដែលឆ្លងដែនខុសច្បាប់នៅពេលយប់ នៅតាមគន្លងច្រករបៀងព្រំដែន ជាប់គ្នានឹងព្រំដែនកម្ពុជា ត្រង់ស្រុកសំពៅលូន ខេត្តបាត់ដំបង ជិតចំណុចបង្គោលព្រំដែន គីឡូម៉ែតលេខ១៣ ថា ថៃពុំមានហេតុផលត្រូវធ្វើដូច្នោះទេ។
លោកវរសេនីយ៍ឯក Birek Bongkarn អនុព័ន្ធយោធាប្រចាំស្ថានទូតថៃនៅភ្នំពេញ កាលពីម្សិលមិញ បានច្រានចោលការចោទប្រកាន់ដែលថា ទាហានថៃបានដាក់គ្រាប់មីនច្នៃធ្វើជាមធ្យោបាយទប់ស្កាត់ពលករ ខ្មែរឆ្លងដែនខុសច្បាប់នោះ។
លោក Birek Bongkarn មានប្រសាសន៍ប្រាប់ភ្នំពេញ ប៉ុស្តិ៍ថា៖ «កងទ័ពថៃគ្មានគោលការណ៍ឲ្យធ្វើបែបនោះទេ ព្រោះវាគ្មានប្រយោជន៍អ្វីនឹងត្រូវធ្វើបែបនេះឡើយ ហើយក្នុងតំបន់នោះក៏មិនអាចដាក់គ្រាប់មីនបានដែរ ព្រោះវាជាដីទទេ វាគ្មានឈើមានតម្លៃដើម្បីនឹងកាប់ឡើយ»។
លោក Bongkarn ជឿថា អ្នកទាំងឡាយដែលចោទប្រកាន់បែបនេះ ទំនងកំពុង«គិតអ្វីមួយ»។ «ពួកគេមិនអាចបញ្ជាក់ភស្តុតាងចំពោះព័ត៌មាននេះបានទេ»។
ប៉ុន្តែ មន្ត្រីយោធាកម្ពុជាកាលពីម្សិលមិញបានអះអាងថា ទាហានថៃបានពង្រាយគ្រាប់មីនច្នៃនៅតាមគន្លងតូចៗ នៃច្រករបៀងនៅក្នុងទឹកដីខ្លួន នៅក្នុងស្រុកខ្លងហាត ខេត្តស្រះកែវ ដែលជាប់ព្រំប្រទល់នឹងកម្ពុជា ក្នុងស្រុកសំពៅលូន ខេត្តបាត់ដំបង ត្រង់ចំណុចបង្គោលព្រំដែនគីឡូលេខ១៣ ដើម្បីទុកបំផ្ទុះធ្វើជាសញ្ញាទប់ស្កាត់ពលរដ្ឋខ្មែរ ដែលលួចឆ្លងដែនខុសច្បាប់នៅពេលយប់។
លោក ប៉ាន់ រ័ត្នមុន្នី ជាទាហានការពារព្រំដែនចំណុចគីឡូលេខ១៣ បានអះអាងថា ក្នុង២ខែចុងក្រោយទាហានថៃដាក់ពង្រាយគ្រាប់មីនច្នៃនៅតាម គន្លងតូចៗ នៃច្រករបៀង ដើម្បីទប់ស្កាត់ពលរដ្ឋខ្មែរ ដែលលួចឆ្លងដែនខុសច្បាប់នៅពេលយប់។ លោកបានឲ្យដឹងថា ៖ «ពីមុនខ្ញុំគ្រាន់តែឆ្ងល់នឹងសំឡេងផ្ទុះនោះ តែក្រោយពីមានសំឡេងផ្ទុះនៅទៀបភ្លឺ ថ្ងៃទី២៨ ខែកញ្ញា ខ្ញុំបានចុះទៅល្បាត ក៏ឃើញពលរដ្ឋខ្មែរនាំគ្នារត់គេចពីទាហានថៃ ទើបដឹងថា គេដាក់គ្រាប់មីនច្នៃទប់ស្កាត់ពួកគាត់»។
លោកបន្តថា ការបំផ្ទុះគ្រាប់មីនច្នៃនោះពុំបង្កគ្រោះថ្នាក់ដល់អ្នកជាន់ ទេ វាគ្រាន់ធ្វើឲ្យកន្ទួលស្បែកប៉ុណ្ណោះ។ លោកថា ទាហានថៃ ដាក់ពង្រាយនៅពេលយប់ចាប់ពីម៉ោង៦ល្ងាច ដើម្បីកុំឲ្យពលរដ្ឋខ្មែរដឹង នៅពេលឮសំឡេងផ្ទុះ គឺគេចុះចាប់តែម្តង។ លោកបញ្ជាក់ថា៖ «ទាហានថៃក៏ធ្លាប់ប្រាប់ថា គេធ្វើដូច្នេះ គឺកុំឲ្យពលរដ្ឋខ្មែរចូលទៅកាប់ឈើក្នុងដីគេ»។
លោកបន្ត ថា គ្រាប់មីនច្នៃនោះគេដាក់បីជាន់ គឺគេចង់ខ្សែដូចដាក់អន្ទាក់ដែរ កម្ពស់ជាន់ទី១ មួយចង្អាមពីដី ជាន់ទី២ ត្រឹមចង្កេះ និងជាន់ទី៣ ត្រឹមដើមទ្រូង នៅពេលមានមនុស្សដើរទៅទាក់ខ្សែនោះ វានឹងផ្ទុះតែម្តង។ លោកបន្តថា៖«ទាហានថៃ មិនគួរជ្រើសរើសវិធីនេះទេ វាមិនគ្រោះថ្នាក់មែន តែយើងនៅតែបារម្ភ ពីព្រោះវាជាគ្រឿងផ្ទុះ»។
លោក លឿត ចាប អាយុ ២៤ឆ្នាំ ធ្លាប់ឆ្លងដែនខុសច្បាប់ទៅធ្វើការនៅប្រទេសថៃ ហើយធ្លាប់ជាន់មីនច្នៃនោះប្រាប់ថា នៅពេលជាន់ចំខ្សែអន្ទាក់ មីននោះក៏ផ្ទុះមានផ្សែងខ្មៅងងឹត ហើយធ្វើឲ្យងងឹតមុខ តែទោះជាយ៉ាងណា គាត់ត្រូវតែរត់ឲ្យលឿនចេញមកទឹកដីខ្មែរវិញ បើមិនដូច្នោះទេនឹងត្រូវតម្រួតថៃចាប់បាន។ គាត់ថា៖«ផ្ទុះដំបូងខ្ញុំភ័យណាស់ ប្រឹងស្ទាបមើលដៃជើងដែរ តែអត់មានអី គ្រាន់តែកន្ទួលបន្តិចបន្តួច។ ខ្ញុំជាន់ខ្សែមីននោះ ស្មានតែជាវល្លិឈើ ស្រាប់តែផ្ទុះភីងតែម្តង»។
លោកប្រាប់ថា ពលរដ្ឋដែលឆ្លងដែនតាមច្រករបៀងនោះ ដោយសារតែអត់លុយធ្វើលិខិតឆ្លងដែន។ គេនាំគ្នាទៅធ្វើការនៅថៃ ដូចជា ធ្វើចម្ការ កាច់ពោត កម្មករសំណង់ និងកាប់ឈើ ជាដើម។ លោកថា ៖«ខ្ញុំនៅស្រុកខ្មែរមិនដឹងធ្វើអី តែនៅទីនោះអាចរកបាន២០០បាត ក្នុង១ថ្ងៃ ហើយខ្ញុំតែងវិលមកវិញរៀងរាល់ថ្ងៃ»។
ឧត្តមសេនីយ៍ឯក ឈុំ សុជាតិ អ្នកនាំពាក្យក្រសួងការពារជាតិ លោក កុយ គង់ អ្នកនាំពាក្យក្រសួងការបរទេសពុំអាចទាក់ទង ដើម្បីសុំការអត្ថាធិប្បាយបានទេ កាលពីថ្ងៃម្សិលមិញ។ មន្ត្រី ក្រសួងការបរទេសថៃក៏មិនអាចសុំការបញ្ជាក់បានដែរ។
លោកពេជ្រ វណ្ណា ប្រធានការិយាល័យទំនាក់ទំនងព្រំដែនកម្ពុជា- ថៃ បានឲ្យដឹងថា លោកនឹងត្រួតពិនិត្យ មើលបញ្ហានេះ បន្ទាប់ពីចប់កិច្ចប្រជុំនៅខេត្តព្រះវិហារ។ លោកបន្តថា៖ «មិនដែលមានច្បាប់ណាយកមីនមកពង្រាយតាមព្រំដែន ដើម្បីទប់ស្កាត់ពលករមិនឲ្យឆ្លងដែននោះទេ។ ទោះជាច្បាប់នៅប្រទេសណាក៏គ្មានដែរ»។
លោក ស៊ុន តឹក មន្ត្រីសម្របសម្រួលអង្គការសិទ្ធិមនុស្សលីកាដូប្រចាំខេត្តបាត់ដំបង បានឲ្យដឹងថា ភាពទាល់ច្រកនិងជីវភាពក្រីក្រ បានបង្ខំឲ្យពលរដ្ឋខ្មែរនាំគ្នាធ្វើចំណាកស្រុកទៅរកការងារធ្វើ នៅក្រៅប្រទេស បើទោះជាដឹងថា អាចប្រឈមនឹងបញ្ហាជាច្រើននិងមានគ្រោះថ្នាក់ដល់ជីវិតក៏ដោយ។ លោកបន្តថា៖ «ពលរដ្ឋខ្មែរយើងឆ្លងដែនទៅថៃច្រើនទៅតាមមេខ្យល់ ហើយគាត់បានជួបប្រទះបញ្ហា ខ្លះជាប់គុក ខ្លះត្រូវទាហានថៃបាញ់ស្លាប់ ហើយនៅពេលដែលដាក់គ្រាប់មីនច្នៃនោះគឺកាន់តែបង្កើនភាពគ្រោះ ថ្នាក់ដល់ពួកគាត់»។ លោកថា ចំណុចសំខាន់រដ្ឋាភិបាលត្រូវបង្កើតមុខរបរ ដើម្បីឲ្យពួកគាត់ធ្វើការនៅក្នុងស្រុករកប្រាក់ចំណូលដើម្បី ចិញ្ចឹមគ្រួសារគាត់»។
យោងតាមរបាយការណ៍របស់ការិយាល័យ ទំនាក់ទំនងព្រំដែនកម្ពុជា-ថៃក្នុងឆមាសទី១ ឆ្នាំនេះតាមព្រំដែនកម្ពុជា-ថៃ ពីខេត្តកោះកុង ដល់ខេត្តព្រះវិហារប្រវែងជាង៨០០គីឡូម៉ែត្រ មានពលរដ្ឋខ្មែរទាំងអស់២៤៣នាក់ រងគ្រោះដោយសារទាហាន ក្នុងនោះ មាន ៣៨នាក់ត្រូវថៃបាញ់ស្លាប់ ១០នាក់បាញ់របួស និងមាន១៩៤នាក់ចាប់ឃុំនៅពន្ធនាគារ ហើយម្នាក់បានបាត់ខ្លួន៕
No comments:
Post a Comment
yes