ភ្នំពេញៈ សមាជិកសភាគណបក្សប្រឆាំង គ្រោងនឹងធ្វើពហិការកិច្ចប្រជុំរដ្ឋសភា នៅសប្តាហ៍ក្រោយ ដែលនឹងធ្វើការពិភាក្សា ទៅលើសេចក្តីព្រាង ស្តីពីសមាសភាពដឹកនាំគណៈកម្មាធិការជាតិរៀបចំការបោះឆ្នោត គ.ជ.ប ទៅតាមសំណើរបស់រដ្ឋាភិបាល ។
កិច្ចប្រជុំដែលគ្រោង ធ្វើនាថ្ងៃព្រហស្បតិ៍ទី១១ ខែតុលា នឹងពិចារណាថា តើត្រូវជំរុញឲ្យមានការផ្លាស់ប្តូរតិចតួចចំពោះសមាសភាព គ.ជ.ប ដែលបក្សប្រឆាំង និងសកម្មជនមួយចំនួន បានទាមទារឲ្យធ្វើការផ្លាស់ប្តូរឬយ៉ាងណា ជាអ្វីដែលត្រូវបានគេរិះគន់ថា ស្ថាប័នជាតិមួយនេះ ស្ថិតនៅក្រោមអំណាចរបស់គណបក្សប្រជាជនកម្ពុជា។
លោក ជាម យៀប សមាជិកសភា គណបក្សប្រជាជន បានប្រាប់ភ្នំពេញ ប៉ុស្តិ៍ កាលពីម្សិលមិញថា ឈ្មោះទាំង ៩ រូប នៅក្នុងបញ្ជី នៃថ្នាក់ដឹកនាំ គ.ជ.ប គឺក៏នៅមានឈ្មោះ លោក អ៊ឹម សួស្តី និងលោកស្រី ស៊ីន ជុំបូរ ដែល បច្ចុប្បន្ន គឺជាប្រធាន និងអនុប្រធាន គ.ជ.ប ។ សម្រាប់អ្នក ៧ រូបផ្សេងទៀត លោក ជាម យៀមបញ្ជាក់ថា លោក ស សុផារី អតីតប្រធានតុលាការក្រុងភ្នំពេញ គឺមានឈ្មោះថ្មី នៅក្នុងបញ្ជី។ លោកសោម ច័ន្ទឌីណា និងលោកម៉ៅ សុភារិទ្ធ ក៏នៅតែជាសមាជិករបស់ គ.ជ.ប មាននៅក្នុងបញ្ជីឈ្មោះដែលរដ្ឋាភិបាលដាក់ស្នើថ្មីនោះដែរ ប៉ុន្តែលោកជាម យៀប មិនបានប្រាប់ថា តើលោក ស សុផារី នឹងទៅជំនួសអ្នកណានោះទេ នៅពេលដែលសមាសភាពដឹកនាំ គ.ជ.ប នៅតែមានសមាជិក៩ រូបដដែលនោះ។
លោកជាម យៀប បញ្ជាក់ថា៖ «សមាសភាព គ.ជ.ប ដែលកើតឡើងនេះ ក្រសួងមហាផ្ទៃ បានដាក់ស្នើទៅគណៈរដ្ឋមន្ត្រី ហើយគណៈរដ្ឋមន្ត្រី ដាក់មកសភា ដើម្បីឲ្យស្របនឹងច្បាប់ ដែលបានចែង ស្តីពីការរៀបចំការបោះឆ្នោត»។
លោក ទេព នីថា អគ្គលេខាធិការ គ.ជ.ប បានបដិសេធមិនធ្វើអត្ថាធិប្បាយឡើយ ដោយបង្វែរឲ្យទៅសួរក្រសួងមហាផ្ទៃ។ លោក ខៀវ សុភ័គ អ្នកនាំពាក្យក្រសួងមហាផ្ទៃ មិនអាចទាក់ទងសុំការពន្យល់បានទេពីម្សិលមិញ។
លោក យឹម សុវណ្ណ អ្នកនាំពាក្យគណបក្សប្រឆាំង បាននិយាយថា៖«យើងនឹងមិនអាចចូលរួមកិច្ចប្រជុំនេះបានទេដរាបណា គណបក្សកាន់អំណាច មិនជជែកដេញដោលជាមួយគណបក្សប្រឆាំងពីបញ្ហាផ្ទៃក្នុងរបស់ គ.ជ.ប ទេនោះ»។
ដើម្បីប្រុងប្រៀបរៀបចំការបោះឆ្នោតសកលឆ្នាំ ២០១៣ លោកសម រង្ស៊ីដែលបាននិរទេសខ្លួន ទៅប្រទេសបារំាង បានលាលែងពីប្រធានគណបក្សសមរង្ស៊ី កាលពីថ្ងៃអង្គារ ដើម្បីទៅដឹកនាំគណបក្សសង្គ្រោះជាតិកម្ពុជា ដែលទើបបង្កើតឡើងថ្មី រវាងគណបក្សសម រង្ស៊ី និងគណបក្សសិទ្ធិមនុស្ស៕
No comments:
Post a Comment
yes