អ្នកនៅក្នុងទ្រុងតំណាងស្ត្រីពីរនាក់កំពុងជាប់ឃុំនៅគុកព្រៃស
និងកូនប្រុសអ្នកស្រី បុប្ជា ស្រែកយំ
ភ្នំពេញៈ «សូមដោះលែងខ្ញុំទៅ តើខ្ញុំមានកំហុសអី?» នេះជាសម្រែករបស់ស្ត្រីវ័យចំណាស់ពីររូប ដែលបានស្រែកចេញពីក្នុងទ្រុងឈើ នៅមុខក្រសួងយុត្តិធម៌ កាលពីម្សិលមិញ ជាទីដែលប្រជាពលរដ្ឋ ក្នុងសហគមន៍បឹងកក់ និងបុរីកីឡា ប្រមាណ ១០០ នាក់ បានធ្វើតវ៉ា។ ស្ត្រីទាំងពីរនាក់នៅក្នុងទ្រុងឈើចាក់សោពីខាងក្រៅស្រែកទាមទារឲ្យគេដោះលែងនេះ តំណាងឲ្យសកម្មជនដីធ្លីពីរនាក់ ដែលកំពុងជាប់ឃុំនៅគុកព្រៃស។
ក្នុងវ័យ ៥៩ ឆ្នាំ អ្នកស្រី សា បូសុទ្ធ ម្ដាយអ្នកស្រី យ៉ោម បុប្ផា ដែលកំពុងជាប់ឃុំក្នុងគុកព្រៃស បានយកផ្ទាំងរូបភាពកូនស្រីរបស់គាត់ មកគ្របលើផ្ទៃមុខរបស់ខ្លួន ខណៈអ្នកស្រី សោម នាង អាយុ ៥៤ ឆ្នាំ មកពីសហគមន៍បុរីកីឡា បានយកផ្ទាំងរូបភាព អ្នកស្រីទឹម សាក់មុន្នី មកគ្របមុខ ហើយអ្នកទាំងពីរ បាននាំគ្នាចូលទៅក្នុងទ្រុង ដែលមានចាក់សោដ៏ធំមួយនៅពីក្រៅ ទល់មុខផ្ទះថ្មគំរូមួយ ធ្វើពីក្រដាស។ នៅខាងក្រៅទ្រុងឈើ មានសរសេរអក្សថា «គុកសម្រាប់អ្នកទោស ការពារដីធ្លី ផ្ទះសំបែង»។ អ្នកស្រីបានស្រែកសួរថា «យើងខ្ញុំមានកំហុសអី?យើងខ្ញុំគ្រាន់តែតវ៉ាចង់បានផ្ទះសមរម្យ សម្រាប់កូនចៅរបស់យើងខ្ញុំ រស់នៅប៉ុណ្ណោះ»។
អ្នកស្រី សោម នាង ដែលបានតុបតែងខ្លួនធ្វើជាអ្នកស្រី ទឹម សាក់មុន្នី ដែលកំពុងជាប់នៅក្នុងគុកព្រៃស ដោយសារបណ្ដឹងចោទប្រកាន់របស់អ្នកស្រី ស៊ុយសុផានប្រធានក្រុមហ៊ុន ផានអ៊ីម៉ិច កាលពីដើមខែមុននេះ បាននិយាយ ខណៈសមត្ថកិច្ចម្នាក់ បានដើរទៅក្បែរទ្រុងពិនិត្យមើលមុខរបស់គាត់។
អ្នកស្រីទឹម សាក់មុន្នី ត្រូវបានតុលាការរាជធានីភ្នំពេញ បញ្ជាឲ្យឃុំខ្លួនជាបណ្ដោះអាសន្ននៅគុកព្រៃស ក្រោមការចោទប្រកាន់ពីបទ«ប្រកាសក្លែងបន្លំការពិត» កាលពីថ្ងៃ ៥ ខែកញ្ញា មួយថ្ងៃក្រោយពីអ្នកស្រី យ៉ោម បុប្ផា ត្រូវបានតុលាការនេះ សម្រេចឃុំខ្លួនជាបណ្ដោះអាសន្ននៅក្នុងពន្ធនាគារព្រៃសពីបទ«ហិង្សាដោយចេតនា»។
នៅក្នុងខណៈនោះកុមារាវ័យ ៧ ឆ្នាំ ដែលត្រូវជាកូនប្រុសរបស់អ្នកស្រីយ៉ោម បុប្ផា បានស្រែកខ្លាំងៗតាមឧបករណ៍បំពងសំឡេងថា៖«ដោះលែងម៉ាក់ខ្ញុំវិញមក»។
ការ ដាក់ទ្រុងខ្លួនឯង គឺជារបៀបដែលត្រូវបានក្រុមអ្នកការពារសិទ្ធិសត្វយកមកអនុវត្ត ក្នុងការតវ៉ាពីការធ្វើទារុណកម្មសត្វមាន់នៅមុខភោជនីយដ្ឋាន មាន់បំពង KFC កាលពីពេលកន្លងមក។
អ្នកស្រី បូវ សោភា តំណាងក្រុមអ្នកតវ៉ាមកពីសហគមន៍បឹងកក់ បាននិយាយថា៖ «ពួកយើងធ្វើបែបនេះ គឺដើម្បីទាមទារឲ្យមានការដោះលែងសកម្មជនរបស់យើង និងដើម្បីការពារសិទ្ធិដីធ្លី និងសិទ្ធិលំនៅដ្ឋាន» ។
អ្នកស្រី ហេង មុំ តំណាងក្រុមអ្នកតវ៉ាម្នាក់ទៀតបាននិយាយថា មន្ត្រីក្រសួងយុត្តិធម៌ បានស្នើឲ្យពួកគាត់មានភាពស្ងាត់ស្ងៀម និងបានអះអាងថាក្រសួងកំពុងពិនិត្យទៅលើសំណើសុំអន្តរាគមន៍ របស់ពួកគេ។ អ្នកស្រីបាននិយាយថា៖«មន្ត្រីឧទ្ទការល័យក្រសួង យុត្តិធម៌ម្នាក់បានប្រាប់ថា ក្រសួងកំពុងពិចារណាលើសំណើរបស់យើង ហើយថា ក្នុងរយៈពេល១សប្ដាហ៍ទៀតយ៉ាងយូរគាត់នឹងផ្ដល់ដំណឹងមកយើង ខ្ញុំវិញ»៕
No comments:
Post a Comment
yes