មេឃុំលំជ័រ លោក សេវ ថ្វាន និងក្រុមសហគមន៍ភូមិឡែ កំពុងផ្តល់បទសម្ភាសន៍
ជាមួយវិទ្យុអាស៊ីសេរី នៅភូមិឡែ កាលពីថ្ងៃទី២៧ ខែវិច្ឆិកា ឆ្នាំ២០១២
តំណាងប្រជាពលរដ្ឋសហគមន៍ជនជាតិដើមភាគតិចអភិរក្សព្រៃឈើ នៅខេត្តរតនគិរី បានប្ដឹងទាមទារឲ្យសងផលប៉ះពាល់ព្រៃឈើសហគមន៍ប្រមាណ ៣០ហិកតារ បន្ទាប់ពីក្រុមហ៊ុនសម្បទានសេដ្ឋកិច្ចមួយបានឈូសឆាយយកដី។
ក្រុមសហគមន៍ ទាមទារឲ្យក្រុមហ៊ុនដាំកូនឈើឡើងវិញ ហើយរក្សាតំបន់នោះជាព្រៃសហគមន៍ និងឲ្យក្រុមហ៊ុនទទួលខុសត្រូវចំពោះមុខច្បាប់។
តំណាងប្រជាពលរដ្ឋសហគមន៍ជនជាតិដើមភាគតិចអ្នកអភិរក្សព្រៃឈើនៅភូមិឡែ ឃុំលំជ័រ ស្រុកអូរយ៉ាដាវ ខេត្តរតនគិរី រួមនិងមន្ត្រីអាជ្ញាធរឃុំ បានផ្ដិតមេដៃលើលិខិតប្ដឹងជូនទៅសមាគមការពារសិទ្ធិមនុស្ស ឲ្យជួយអន្តរាគមន៍ទៅស្ថាប័នតុលាការ ដើម្បីស៊ើបអង្កេតជាបន្ទាន់ទៅលើសកម្មភាពឈូសឆាយរានយកដីព្រៃធនធានព្រៃឈើសហគមន៍កំពុងអភិរក្ស។
ប្រធានសហគមន៍ លោក សេវ យួន នៅថ្ងៃអង្គារ ទី២៧ ខែវិច្ឆិកា ឆ្នាំ២០១២ បានបញ្ជាក់ថា ដីព្រៃដែលក្រុមហ៊ុនបានឈូសឆាយនោះ គឺជាតំបន់ព្រៃការពាររបស់សហគមន៍ ហេតុនេះក្រុមហ៊ុនត្រូវទទួលខុសត្រូវលើការខូចខាតព្រៃឈើនេះ៖ «គេធ្វើហ្នឹងដូចជារំលោភលើយើងហើយ ពីព្រោះពីមុនគេចែកឲ្យយើង ដល់ឥឡូវ មុនគេឈូសឆាយគេអត់ប្រាប់ដល់សហគមន៍។ ខាងហ្នឹងយើងច្បាស់លើអូរហ្នឹង ហើយយើងមិនបាច់ដាំបង្គោលទេ ព្រោះយើងគ្មានលទ្ធភាពដាំបង្គោលរបងអ៊ីចឹងណា!»។
មេឃុំលំជ័រ លោក សេវ ថ្វាន មានប្រសាសន៍បញ្ជាក់ថា លោកចូលរួមជាមួយសហគមន៍ប្ដឹងពីករណីនេះ ពីព្រោះលោកគឺជាមន្ត្រីអាជ្ញាធរដែលបានចុះហត្ថលេខាលើឯកសារទទួលស្គាល់សហគមន៍ព្រៃឈើភូមិឡែ កាលពីឆ្នាំ២០១០ រួមជាមួយមន្ត្រីជំនាញព្រៃឈើ និងអាជ្ញាធរស្រុក៖ «ទាមទារឲ្យវាសង ឲ្យវាដាំកូនឈើឡើងវិញ។ ព្រៃហ្នឹង យើងតវ៉ាដាក់ជាព្រៃសហគមន៍ឡើងវិញទៀត ដាក់អ៊ីចឹង យើងអាចការពារព្រៃសហគមន៍បាន»។
របាយការណ៍អង្កេតរបស់មន្ត្រីសមាគមអាដហុក (ADHOC) ខេត្តរតនគិរី ឲ្យដឹងថា ក្រុមហ៊ុនដែលពាក់ព័ន្ធឈូសឆាយទៅលើដីព្រៃដែលសហគមន៍អះអាងថាជាព្រៃអភិរក្ស គឺក្រុមហ៊ុនសម្បទានសេដ្ឋកិច្ច ជា ច័ន្ទរិទ្ធ អភិវឌ្ឍន៍។
ក៏ប៉ុន្តែ នាយរងខណ្ឌរដ្ឋបាលព្រៃឈើខេត្តរតនគិរី លោក ផាន់ ភីន មានប្រសាសន៍បញ្ជាក់ថា មន្ត្រីជំនាញបានផ្ទៀងផ្ទាត់រួចហើយថាព្រៃដែលក្រុមហ៊ុនឈូសឆាយស្ថិតក្នុងបរិវេណដីសម្បទានដែលក្រសួងកសិកម្មប្រគល់ជូនក្រុមហ៊ុន។ លោកបន្តថា ក្រុមហ៊ុនមិនបានឈូសឆាយលើដីសហគមន៍ការពារទេ ដូច្នេះដីដែលបានឈូសឆាយរួច នឹងត្រូវប្រគល់ជូនក្រុមហ៊ុនដាំដុះតាមកិច្ចសន្យា៖ «ដីសម្បទានរបស់គាត់ដូចជាង ៥ពាន់ ៦ពាន់ហិកតារ ប៉ុន្តែដីព្រៃការពារហ្នឹងជាង ៨ពាន់ហិកតារ។ ព្រៃកន្លែងគេឈូសឆាយហ្នឹង វាមានបីសំខាន់ណា! ព្រៃសហគមន៍ ព្រៃការពារ ព្រៃដែលក្រុមហ៊ុនបានសម្បទានពីរដ្ឋហ្នឹង។ ឥឡូវហ្នឹង គាត់ឈូសអាហ្នឹង គាត់ចប់ហើយ»។
មន្ត្រីឃ្លាំមើលបញ្ហាព្រៃឈើដីធ្លី និងជាអ្នកសម្របសម្រួលនៃសមាគមអាដហុក លោក ឆាយ ធី មានប្រសាសន៍បញ្ជាក់ថា គោលការណ៍របស់រាជរដ្ឋាភិបាល និងក្រសួងកសិកម្ម បានណែនាំឲ្យមន្ត្រីជំនាញ និងក្រុមហ៊ុនសម្បទានកាត់ចេញព្រៃការពារ ព្រៃសហគមន៍ និងដីកាន់កាប់ដោយប្រជាពលរដ្ឋ។ លោកបន្តថា ក្រុមហ៊ុនពិតជាបានឈូសឆាយព្រៃឈើផ្ទុយពីគោលការណ៍ណែនាំរបស់រាជរដ្ឋាភិបាល៖ «យើងសូមឲ្យរាជរដ្ឋាភិបាលថ្នាក់ជាតិចុះធ្វើការស្រាវជ្រាវ ដោះស្រាយជូនប្រជាពលរដ្ឋក្នុងសហគមន៍ភូមិឡែ»។
អគ្គលេខាធិការក្រសួងកសិកម្ម កាលពីថ្ងៃទី២២ ខែតុលា ឆ្នាំ២០១២ បានធ្វើលិខិតជម្រាបមកក្រុមហ៊ុន ជា ច័ន្ទរិទ្ធ អភិវឌ្ឍន៍ ថា ក្រសួងកសិកម្មបានឯកភាពជាគោលការណ៍ឲ្យក្រុមហ៊ុនឈូសឆាយដីចំនួន ៦៥៩ហិកតារ នៅតំបន់បី ស្ថិតក្នុងទីតាំងដីសម្បទានសេដ្ឋកិច្ចរបស់ក្រុមហ៊ុន ក្នុងស្រុកបរកែវ និងស្រុកអូរយ៉ាដាវ ខេត្តរតនគិរី។
ទន្ទឹមនោះ ក្រុមហ៊ុនត្រូវសហការជាមួយរដ្ឋបាលព្រៃឈើ កំណត់ទីតាំងរក្សាទុកទាំងអស់ជាមួយគ្នាឲ្យបានច្បាស់លាស់ជាមុនសិន ទើបអនុញ្ញាតឲ្យដំណើរការ។ ម៉្យាងទៀត ក្រុមហ៊ុនត្រូវគោរពកិច្ចសន្យា និងលក្ខខណ្ឌ មិនត្រូវឈូសឆាយដាំដុះលើផ្ទៃដីកាន់កាប់របស់ប្រជាពលរដ្ឋ និងតំបន់រក្សាទុក៕
No comments:
Post a Comment
yes