សមត្ថកិច្ចរារាំងក្បួនដង្ហែរបស់យុវជនគណបក្ស សម រង្ស៊ី នៅក្បែរវត្តភ្នំ
កាលពីថ្ងៃទី៨ វិច្ឆិកា ឆ្នាំ២០១២
ក្រុមយុវជនគណបក្ស សម រង្ស៊ី បានធ្វើបាតុកម្ម និងដង្ហែញត្តិយកទៅថ្វាយព្រះមហាក្សត្រដើម្បីឲ្យព្រះអង្គជួយធ្វើព្រះរាជកិច្ចអន្តរាគមន៍ទៅរដ្ឋាភិបាលឲ្យដោះលែងអ្នកទោសនយោបាយ សកម្មជនដីធ្លី និងមន្ត្រីសិទ្ធិមនុស្ស ដែលត្រូវតុលាការសម្រេចឃុំខ្លួន និងកាត់ទោសពួកគេ។
យុវជនគណបក្ស សម រង្ស៊ី ប្រមាណជាង ២០០នាក់ បានខកបំណងក្នុងការដង្ហែក្បួនយកញត្តិទៅថ្វាយព្រះមហាក្សត្រនោះទេ នៅថ្ងៃព្រហស្បតិ៍ ទី៨ វិច្ឆិកា។ ក្រុមយុវជនបានជួបជុំគ្នានៅទីលានប្រជាធិបតេយ្យ នៅក្បែរវត្តភ្នំ បន្ទាប់មកបានសម្រេចរៀបចំដើរដង្ហែជាក្បួនសំដៅទៅកាន់ព្រះបរមរាជវាំង តែត្រូវអាជ្ញាធរដាក់កងកម្លាំងជាច្រើនដើម្បីហាមឃាត់ក្រុមបាតុករទាំងនោះមិនឲ្យដង្ហែគ្នាជាក្បួននោះទេ។ ក្នុងហេតុការណ៍ហាមឃាត់នោះ អាជ្ញាធរប្រើកងកម្លាំងប្រមាណ ២០០នាក់ និងដាក់បារាសជាច្រើនកន្លែងដើម្បីហាមឃាត់។ ក្រុមបាតុករ និងកម្លាំងសមត្ថកិច្ចបានប្រឈមដាក់ពេញ១ព្រឹក។
ទាក់ទងនឹងការដង្ហែញត្តិនេះ តំណាងចលនាយុវជនគណបក្ស សម រង្ស៊ី លោក សួង សុភ័ណ ឲ្យដឹងនៅថ្ងៃទី៨ វិច្ឆិកា ថា បំណងនៃការដាក់ញត្តិនេះ គឺដើម្បីសុំឲ្យព្រះមហាក្សត្រជួយធ្វើព្រះរាជកិច្ចអន្តរាគមន៍ទៅរដ្ឋាភិបាលឲ្យបើកច្រកសម្របសម្រួលផ្នែកនយោបាយ ធ្វើយ៉ាងណាឲ្យលោក សម រង្ស៊ី បានវិលត្រឡប់ចូលប្រទេសវិញ និងសុំឲ្យរដ្ឋាភិបាលបញ្ឈប់ការប្រើប្រព័ន្ធតុលាការជាឧបករណ៍ដើម្បីចាប់សកម្មជនដីធ្លី និងមន្ត្រីសិទ្ធិមនុស្សយកដាក់គុកបន្តទៀត។
ជាមួយគ្នានេះ តំណាងរាស្ត្រគណបក្ស សម រង្ស៊ី អ្នកស្រី មូរ សុខហួរ បានហៅសកម្មភាពហាមឃាត់របស់អាជ្ញាធរទៅលើក្រុមយុវជនមិនឲ្យដង្ហែញត្តិនេះ គឺជាការបំបិទសិទ្ធិសេរីភាពក្នុងការបញ្ចេញមតិ និងធ្វើបាតុកម្ម ដែលចែងក្នុងរដ្ឋធម្មនុញ្ញ។ ម្យ៉ាងទៀតអ្នកស្រីបន្តថា បញ្ហានយោបាយរវាងមេដឹកនាំគណបក្សប្រឆាំង និងគណបក្សកាន់អំណាចគួររកឱកាសសមស្របណាមួយ ដើម្បីដោះស្រាយលើបញ្ហានេះ ពីព្រោះការបែកបាក់គ្នារវាងអ្នកនយោបាយ មិនមែនជាព្រះរាជតម្រិះប្រាថ្នាចង់បាននៃអតីតព្រះមហាក្សត្រនោះទេ។ ដូច្នេះបើអ្នកនយោបាយពិតជាគោរពអតីតព្រះមហាក្សត្រ ពួកគេគួរតែសម្របសម្រួលគ្នាដើម្បីឲ្យមានឯកភាពជាតិ។
អ្នកស្រី មូរ សុខហួរ៖ «រូបភាពនេះមិនមែនជារូបភាពការពារឆន្ទៈអ្វីដែលជា... មែនទែនយុវជនដែលជាទំពាំងស្នងឫស្សីមានកិត្តិយសខ្ពស់ណាស់ ហើយបង្ហាញនូវឧត្ដមគតិគ្នាខ្ពស់ណាស់ចំពោះព្រះមហាក្សត្ររបស់ខ្លួន ដូច្នេះខ្ញុំយល់ឃើញថា ការមកឃាត់ឃាំងនេះ គឺជាការមួយដែលនាំឲ្យខាតដល់ជាតិយើងទាំងមូល»។
ឆ្លើយតបនឹងការលើកឡើងរបស់ក្រុមយុវជន និងតំណាងរាស្ត្រគណបក្ស សម រង្ស៊ី នេះ ទីប្រឹក្សារាជរដ្ឋាភិបាល និងជាអ្នកនាំពាក្យអង្គភាពព័ត៌មាន និងប្រតិកម្មរហ័សនៃទីស្ដីការគណៈរដ្ឋមន្ត្រី លោក ទិត សុធា ប្រតិកម្មតបថា សកម្មភាពរបស់ក្រុមយុវជននៃគណបក្ស សម រង្ស៊ី នេះ ធ្វើឡើងផ្ទុយទៅនឹងនយោបាយជាក់ស្ដែងនៅក្នុងប្រទេសកម្ពុជា និងបង្ហាញពីភាពងប់ងុលផ្នែកនយោបាយរបស់ក្រុមបក្សប្រឆាំង។
បន្ថែមលើនេះ លោកបញ្ជាក់ថា ប្រទេសកម្ពុជា បានទទួលឯកភាពជាតិយូរមកហើយ ដូច្នេះរដ្ឋាភិបាលមិនចាំបាច់ត្រូវការផ្សះផ្សាអ្វីនោះឡើយ តែអ្នកនយោបាយណាប្រព្រឹត្តខុសនឹងច្បាប់ព្រហ្មទណ្ឌ ពួកគេត្រូវប្រឈមនឹងការចោទប្រកាន់ពីសំណាក់តុលាការ។ រដ្ឋាភិបាលមិនមានសិទ្ធិលូកលាន់លើរឿងនេះនោះទេ។
លោក ទិត សុធា៖ «ការតវ៉ាឲ្យលើកលែងអ្នកទោសនយោបាយ គឺជារឿងមួយមិនពិត ហើយគឺជាការផ្សព្វផ្សាយព័ត៌មានមិនពិត ភូតកុហកសាធារណៈមតិ ដើម្បីគិតតែពីយុទ្ធនាការប្រឆាំង ក៏ប៉ុន្តែវាបានដើរបញ្ច្រាសអំពីអ្វីដែលជាទិដ្ឋភាពច្បាប់ដែលត្រូវបានដោះស្រាយនៅប្រព័ន្ធតុលាការ គឺគេបានចាត់ទុកប្រព័ន្ធតុលាការនៅកៀនជញ្ជាំង។ ផ្ទុយទៅវិញគេហាក់បីដូចជាធ្វើយុទ្ធនាការមួយបំពុល ដែលធ្វើឲ្យមានការភាន់ច្រឡំរដ្ឋាភិបាលនេះរឹតបន្តឹងសេរីភាពបញ្ចេញមតិ ឬក៏គាប់សង្កត់ទៅលើបក្សប្រឆាំងអីជាដើម»។
ទោះយ៉ាងណាមន្ត្រីជាន់ខ្ពស់អង្គការសិទ្ធិមនុស្សលីកាដូ លោក អំ សំអាត មានប្រសាសន៍ថា សកម្មភាពហាមឃាត់របស់អាជ្ញាធរលើក្រុមយុវជននេះ គឺជាការរំលោភសិទ្ធិមនុស្ស៖ «ការបើកសេរីភាពនេះ វានៅមានភាពចង្អៀតបំផុត ទាក់ទងនឹងសិទ្ធិសេរីភាពក្នុងការបញ្ចេញមតិ»។
មន្ត្រីសិទ្ធិមនុស្សបានចាត់ទុកការរារាំងរបស់អាជ្ញាធរនេះ គឺកំពុងអនុវត្តផ្ទុយនឹងសន្ធិសញ្ញា និងកតិកាសញ្ញាផ្សេងៗស្ដីពីសិទ្ធិមនុស្ស ដែលរដ្ឋាភិបាលបានព្រមព្រៀងថា ខ្លួននឹងធានាឲ្យមានការគោរពសិទ្ធិមនុស្សក្នុងប្រទេសឲ្យបានល្អត្រឹមត្រូវ៕
No comments:
Post a Comment
yes