២៥-វិច្ឆិកា-២០១២៖ ជនជាតិដើមចារ៉ាយ ភូមិចង ឃុំញ៉ាង ស្រុកអណ្ដូងមាស ខេត្តរតនគិរី
ប្រជាពលរដ្ឋខេត្តរតនគិរី បានអះអាងថា សកម្មភាពបោះបង្គោលកំណត់ព្រំដែនគោកកម្ពុជា-វៀតណាម របស់រដ្ឋាភិបាល នាំឲ្យបាត់ភូមិដូនតាពួកគាត់ចំនួន ៤ភូមិទៅឲ្យប្រទេសវៀតណាម។
ប្រជាពលរដ្ឋខេត្តរតនគិរី បានចាត់ទុកសកម្មភាពបោះកំណត់បង្គោលព្រំដែនគោកកម្ពុជា-វៀតណាម របស់រដ្ឋាភិបាលនាំឲ្យកម្ពុជា បាត់បង់ទឹកដី និងពលរដ្ឋខ្លះជួបភាពក្រីក្រ គឺមិនដូចលោកនាយករដ្ឋមន្ត្រី ហ៊ុន សែន បកស្រាយក្នុងរដ្ឋសភាទេ។
លោក សារិត ភិត មេភូមិចង ឃុំញ៉ាង ស្រុកអណ្ដូងមាស ខេត្តរតនគិរី បានអះអាងថា សកម្មភាពបោះកំណត់ព្រំដែនកម្ពុជា-វៀតណាម នាមូលដ្ឋាននេះ បានបាត់បង់ភូមិចំនួន ៤ភូមិទៅឲ្យប្រទេសវៀតណាម ហើយថា សព្វថ្ងៃនេះពលរដ្ឋទាំង ៤ភូមិ បានរើលំនៅឋានបង្ខិតចូលក្នុងទឹកដីកម្ពុជា ទៅតាមការរុញច្រានរបស់ប្រទេសវៀតណាម។
លោកប្រតិកម្មចំពោះការបកស្រាយរបស់លោក ហ៊ុន សែន ក្នុងរដ្ឋសភា កាលពីថ្ងៃទី៩ ខែសីហា ឆ្នាំ២០១២ ដែលថា ការបោះបង្គោលព្រំដែនកម្ពុជា-វៀតណាម មិនធ្វើឲ្យកម្ពុជា ខាតបង់ទឹកដី ជារឿងមិនពិតទេ។
មេភូមិរូបនេះមើលឃើញថា ប្រទេសវៀតណាម មានឥទ្ធិពលទៅលើរដ្ឋាភិបាលកម្ពុជា ចំពោះសកម្មភាពបោះកំណត់ព្រំដែនគោករវាងប្រទេសទាំងពីរ នាខេត្តរតនគិរី។ លោកថា បញ្ហាបោះកំណត់បង្គោលព្រំដែនគោកកម្ពុជា-វៀតណាម វៀតណាមបានធ្វើសកម្មភាពតាមចិត្តចង់បាន ហើយមន្ត្រីខ្មែរហាក់មិនហ៊ានចេញមុខតវ៉ាចំពោះបញ្ហានេះទេ។
ពលរដ្ឋជនជាតិដើមចារ៉ាយ រស់នៅភូមិចង ឃុំញ៉ាង ស្រុកអណ្តូងមាស ខេត្តរតនគិរី សរុបមានចំនួន ១១២គ្រួសារ និងមានមនុស្សជាង ៥០០នាក់កំពុងរស់នៅ។
បុរសវ័យ ៧០ឆ្នាំ ឈ្មោះ វ៉ង ចែវ ជាជនជាតិចារ៉ាយ រស់នៅឃុំញ៉ាង ជាឃុំជាប់ព្រំដែនវៀតណាម បានឲ្យដឹងដែរថា សកម្មភាពបោះបង្គោលកំណត់ព្រំដែនក្នុងមូលដ្ឋាននេះ ប្រទេសវៀតណាម បានចូលបោះបង្គោលក្នុងទឹកដីកម្ពុជា និងបោះបង្គោលនៅលើដី ឬទីតាំង តាមចិត្តពួកគេចង់បាន។
លោកបន្តថា អាជ្ញាធរវៀតណាម មិនញញើតមន្ត្រីរដ្ឋាភិបាលខ្មែរចំពោះសកម្មភាពបោះបង្គោលព្រំដែនគោកនៅលើទីតាំងដែលពួកគេចង់បាន នាស្រុកអណ្ដូងមាស ខេត្តរតនគិរី នេះទេ។
មិនខុសគ្នាទេ បុរសជនជាតិចារ៉ាយ ឈ្មោះ រចំ បូស ជាអនុប្រធានសហគមន៍ភូមិចង ឃុំញ៉ាង ក៏បានឲ្យដឹងថា សកម្មភាពបោះបង្គោលព្រំដែនគោកកម្ពុជា-វៀតណាម ត្រង់ម្ដុំបង្គោលលេខ ១៦ ក្នុងស្រុកអណ្ដូងមាស នាំឲ្យបាត់ភូមិពលរដ្ឋចំនួន ៤ភូមិទៅឲ្យវៀតណាម ពិតមែន។
លោកច្រានចោលចំពោះការអះអាងទាំងឡាយណាដែលថា ការបោះកំណត់បង្គោលព្រំដែនក្នុងមូលដ្ឋាននេះ មិនបាត់បង់ទឹកដីជារឿងមិនពិត និងទាមទារចុះអង្កេតដល់មូលដ្ឋាន។
ទាក់ទិនបញ្ហានេះ មន្ត្រីដឹកនាំខេត្តរតនគិរី បានបដិសេធមិនធ្វើអត្ថាធិប្បាយទេ ដោយបញ្ជាក់ខ្លីថា បញ្ហាព្រំដែនត្រូវលោកនាយករដ្ឋមន្ត្រី ហ៊ុន សែន បកស្រាយក្នុងរដ្ឋសភាអស់ទៅហើយ។
ទោះយ៉ាងណា លោក ហ៊ុន សែន នៅក្នុងកិច្ចប្រជុំសភា ថ្ងៃទី៩ ខែសីហា ឆ្នាំ២០១២ បានបញ្ជាក់ថា សកម្មភាពបោះបង្គោលព្រំដែនគោកកម្ពុជា-វៀតណាម គឺមានគោលដៅកាត់បន្ថយភាពក្រីក្រ ការពារការគ្រប់គ្រងដីធ្លី និងជំរុញការប្រកបរបរចិញ្ចឹមជីវិតរបស់ពលរដ្ឋរស់នៅតាមបន្ទាត់ព្រំដែនឲ្យបានប្រសើរ។
លោកនាយករដ្ឋមន្ត្រីបានបញ្ជាក់ថា ការកំណត់ព្រំដែនថ្មីបែបធ្មេញរណារនេះ អាចប៉ះចំភូមិខ្មែរ និងភូមិវៀតណាម តែមិនត្រូវកាត់ចេញទេពីផែនទីទេ គឺត្រូវទុកនៅដដែល ហើយធ្វើការដោះដូរដីគ្នាទៅវិញទៅមកតាមសភាពជាក់ស្ដែង៕
No comments:
Post a Comment
yes